2021-10-21

靠近石板潭!本地鳳眼藍9月再盛放 鹿頸南涌魚塘角落零距離觀賞浪漫紫花海【2021賞花地圖】

鹿頸 鳳眼藍 9月再盛放 (完全零距離)

個人瀏覽過





5月份屬花開季節,清爽怡人,元朗、上水鄉郊一度有鳳眼藍花海,壯觀得有如日本富良野花田,錯過咗唔緊要,皆因9至10月亦為鳳眼藍開花季節。最近粉嶺鹿頸一個魚塘角落有一片正在盛放嘅鳳眼藍,紫調花海豐盛而壯麗,媲美上兩次於本地出現嘅鳳眼藍花海,想拍拖兩個人去賞花打卡,謹記留意下文注意開花時間呀!

延伸閱讀﹕【2021賞花地圖】近期大熱!5月鳳眼藍季節 元朗超大魚塘藍紫色花海限時賞花

延伸閱讀﹕1.5小時北區邊境遊!上水賞壯觀鳳眼藍花海 穿越兩條河畔步道 走訪古洞河上鄉 人氣景點大水管/塱原濕地/博文學校打卡【2021賞花地圖】

鳳眼藍以浪漫小紫花姿態屹立魚塘當中,可算係性格之花,每日鍾意開花就開花,隨時花落就花落,花期看似難以預測,事實上鳳眼藍係有固定開花時間嘅。可愛嘅鳳眼藍每日限時開花,一般開花時間為朝早,有太陽或猛烈陽光時就會開花,陽光暗淡時會逐漸枯萎花落,即是說黃昏時、陰天時、雨天時花朵會較少,故此建議中午之前到魚塘觀賞。而鳳眼藍翌日又會如常開花,枯萎後又會重新盛放,開花條件係要有充沛陽光,一日限定嘅開花期雖然短暫,但生長迅速。

今次鳳眼藍開花位置為粉嶺鹿頸南涌魚塘,鳳眼藍於魚塘角落悄悄盛放,未有被廣泛報道,所以目前人流唔多,大多係於附近行山嘅山友。編輯認為粉嶺鳳眼藍比元朗、上水嘅更為豐盛,同時亦更接近,可以近距離觀賞。

粉嶺鹿頸南涌鳳眼藍拍攝時間為11至12點左右,可見滿屏淡紫小花,呈現嬌嫩狀態,畫面壯麗而浪漫,令人心情放鬆,心花怒放。而鳳眼藍係一種生長於魚塘嘅植物,屬漂浮水生植物,又叫布袋蓮或浮水蓮花,紫色花朵中央帶有黃色斑點,葉子直立似葫蘆,可愛非常。鳳眼藍生長快速,兩星期可繁殖一倍,不過鳳眼藍有入侵性,可吸收水中有毒物質,極速覆蓋水面,令其他生物或植物死亡。

離開魚塘鳳眼藍花田,可以繼續前往嘉龍潭方向,穿過山路離開,亦可折返原路,到海旁遊走鹿頸、鳳坑、谷埔,輕鬆進行邊境一日遊,遙望沙頭角、深圳鹽田區,甚至觀賞天然景色。

延伸閱讀﹕沙頭角邊境遊! 賞紅樹林/蘆葦花田/童話村夢幻場景 一文輕鬆遊走鹿頸鳳坑谷埔

    

小編講吓嘢﹕

當日於魚塘位置靜靜地觀賞鳳眼藍,影吓相嘅編輯遇上一對正處鬧交嘅中年情侶(或夫婦),因玩航拍而大聲對話,一把刺耳女聲不斷用口「教路」男人點用航拍拍攝鳳眼藍花海,兩人聲量極高,到後來男人將航拍撞跌,女人崩潰大聲責備,兩人嘈交聲量響徹雲霄。編輯暗忖,玩吓航拍姐,唔使咁激動啩?事實上,魚塘附近為村民居住地方,應該要遵守禮儀,保持安靜,再者,魚塘小紫花沉靜而浪漫,愛好觀賞花卉之人,大多會想安靜地賞花,而非於嘈雜環境下賞花,奉勸大家一句,請保持安靜!(編輯有相有片,但無必要就無謂公開)


E.A.Tips :

(1) 於粉嶺小巴總站乘搭56K小巴,終點站為鹿頸,可於強記士多或南涌亭路口落車,路口為南涌兒童遊樂場。

(2) 只需沿南涌指示牌方向走,直入南涌路,左邊沿途一直可見一片紅樹林,第一個分岔口無需理會,只係村民居住地方,而且唔係轉右,只需留意左邊方向,其後分岔路口轉左,可以前往魚塘,然後留意右邊魚塘,即會逐漸見到一片鳳眼藍花海,花海旁邊亦可接駁嘉龍潭上山路。

(3) 雖然向南涌亭方向走,但並唔係前往南涌亭,而係之前一個路口進入。

(4) 是次鳳眼藍可以近距離觀賞,但謹記眼看手勿動,唔好觸碰,唔好採摘!

(5) 注意開花時間,最好中午前前往觀賞,黃昏時間大多數未能構成花海。

(6) 要留意天氣變化,雖然鳳眼藍每日會開花,但條件係要有充足陽光,愈曬愈熱嘅環境愈有利鳳眼藍開花。

(7) 南涌路不時有車經過,要小心個人安全。

(8) 魚塘旁邊小路有碎石,雖然大多寬闊易走,部份路面狹窄,步行時要加倍小心。

(9) 既然要陽光猛烈先有花睇,就記得要做足防曬措施。

(10) 行遠少少會發現可以步向花田,兼零距離觀賞鳳眼藍,但愈見魚塘,地面愈多濕泥,盡可能唔好企太近。

(11) 謹記自己垃圾自己帶走,同時勿丟石仔入魚塘。

(12) Last but not least,必須要注意嘅係,保持安靜,附近有村民居住,唔好做老鼠屎令大家都無得賞花。


南涌亭

船灣(近北區粉嶺南涌路)

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook啦!

ΔPlease Like & Follow & Subscribe /
歡迎讚好、追蹤、訂閱


【3低本地遊】周末穿梭舊工廠/壁畫村兼上山探險打卡 荃灣西海旁歎咖啡睇日落 $650行程包早午晚餐下午茶
隱藏版藍田後花園打卡 穿梭五桂山茅湖山直通將軍澳
赤柱唯一!市集背後街坊小店 每日推出限時午餐益自己友
【3低本地遊】錦田慢活文青遊 必食2間街坊店 探訪城中古村連2日1夜懶人露營地
大角嘴定食版海南雞飯 霓虹燈牌現4款招牌菜式
【3低本地遊】原為客家村落? 秘道探索柴灣戰時遺跡 體育館藏迷你定食屋
【3低本地遊】小西灣前身有料到? 百呎小店有水準 闖入軍事建築遺址
【3低本地遊】何文田歎平價和牛丼 連走4條山徑超簡單路線 邊條路線先係紅燈山?
【3低本地遊】油麻地激厚蛋吐司早餐/石燒牛晚餐 上空中花園兼漫遊紅磚屋打卡
全港5間本土中式點心酒樓 沙田富東閣超抵食「一盅兩件」下午茶 邊間有加大版糯米雞?邊間雞札重有火腿魚肚?
厚切魚生款式眾多 太子日式丼飯外賣店離始創僅1分鐘步程
【3低本地遊】曾擠身全球最型格社區3甲!深水埗歎高水準健康跑友餐 探索草根小區兼輕鬆上山睇日落
岩石媲美東平洲馬屎洲!暢遊荔枝莊地質步道+攀登雞麻峒/蛇石坳 深涌閒遊全港最大草地打卡 兩條路線任揀!
山頂加設欄杆!格仔山重修還原紅白格仔 老虎岩石屋活化探索昔日寮屋區
新蒲崗廣場泰日餐廳Crossover 隨時邊食丼飯邊歎冬蔭公
躲藏大角嘴舊商場 微舖獨沽一味只賣越南包

撰文﹕Miss A ;攝影﹕Mr E, Miss A;設計﹕Mr E

View all posts by 撰文﹕Miss A ;攝影﹕Mr E, Miss A;設計﹕Mr E →