2021-09-19

連影193燈塔+日系碼頭唯美暮色!西貢海鮮街徒步三星灣路線 泳灘碧綠玻璃水清澈見底

三星灣泳灘+麻籃笏+沙咀+193燈塔+白沙灣遊艇會碼頭

個人瀏覽過





盛夏向來係玩水季節,唔少人都遍尋水質良好嘅沙灘,編輯就帶大家去西貢三星灣,向來係水質良好嘅泳灘,海水碧綠得如玻璃水,不過今次唔係搭船入去,而係步行入去,兩個人簡單行完山再落水,感覺會更爽!離開三星灣泳灘後,並唔代表唔再有景點,來往三星灣至白沙灣,細心留意會發現一座神秘燈塔,寫有近月最紅嘅一組數字,而到達白沙灣碼頭亦可觀賞遊艇海上嘅唯美日落景。

三星灣泳灘 (Trio Beach) 位處白沙灣東南面麻南笏半島,沙灘全長僅約131米,唔算深長,比半月灣更細,但風平浪靜,沙灘靠近白沙灣碼頭。根據環境保護處嘅最新泳灘評級,三星灣泳灘長期為一級良好水質狀態,沙灘水質良好,海水清澈見底,沙粒尚算細膩,而且基本設備充足,既可從海路進入,亦可由陸路步行而至,相當方便。

由西貢海鮮街出發,穿過市場街、西貢大街,前行至海旁方向,經過翠塘路對面海長廊休憩處,於盡頭迴旋處轉入山路,前行達官門漁民新村,穿過官門漁村可直上到康健路,可見萬宜漁村互助委員會辦事處,不過路段稍斜坡幅度較高,若想避開走呢段15至20分鐘路段,可以於西貢街市乘搭小巴路線4A或4號到對面海邨落車。其後,於康健路轉入康富路,沿途仍為對面海邨,只需3分鐘步程即會見到登山口,旁邊為對面海配水庫。

由對面海配水庫旁邊登山口出發,沿康富路徒步至三星灣泳灘,全程約需1小時,至於步行到分岔口則約30分鐘,路段基本上只有2個分岔口,一個係從蕉徑篤路至西頁遊艇會花園方向步入三星灣,另一個係三星灣與麻籃笏分岔路口。由西貢步行到三星灣,路段並非石屎路,基本上大部份路段都係山路、沙泥路,落雨後地面未乾透更會有泥氹,路段亦並非完全平坦易行,不時有上落位,直到分岔路口先會見到麻石徑路段。不過,整段路程遍佈樹蔭,視野雖然狹隘,但少有陽光直射,算係走得舒服嘅山徑路段。

想再簡單啲,可以由西頁市中心走到西貢消防局,然後轉上康健路,經過西貢戶外康樂中心後到分岔口即可轉入康富路,時間約20至25分鐘,但平路較多,路段比較清晰;又或者於西貢公路轉入輋徑篤路,前行至西貢遊艇會碼頭上山,亦可以接駁康富路山徑,所走嘅山路就更少。

前行至三星灣山頂一段路較為陡峭,但路段唔算長,山頂位置可眺西貢海、橋咀島,另一邊可回望白沙灣遊艇會碼頭,千隻遊艇停泊於海面甚為壯觀。由山頂向下行,沿途已經可見沙灘,大概步行10至15分鐘後,穿過山路再走過麻石徑,就可以到達三星灣泳灘。

三星灣泳灘平日比較少人,更能感受清幽恬靜環境,但假日難免會見到有人,皆因乘搭街渡方便,不過假日人流尚算正常,唔算見縫插針。沙灘由救生亭、岩石分為兩邊,雖然沙粒唔算好幼細,但亦算細膩,赤腳踩上沙堆亦唔會有唔舒服感覺,即使純粹吹海風亦感覺悠閒。而海水則長期為1級水質,海水碧綠,非常清澈,似足玻璃水,配合藍天白雲嘅話畫面更優美,有如港版馬爾代夫,可以全身浸落水游水之餘,亦可以放心潛水。

      

沙灘對面可見麻南笏村旁邊嘅三星海景燒烤場、三星釣魚場,即剛才於分岔口前往麻籃笏方向,黃昏時份會傳來BBQ香味,有興趣可以轉往燒烤場方向作下場。不過,今次臨尾想講吓屹立海旁嘅白色燈塔,大多由英國製造,一直為商船引航,而每座燈塔上皆有一組黑色數字,有指代表香港第幾號燈塔,但來源無從稽考。

「193」為於今屆東京奧運奪得金牌嘅張家朗及人氣組合Error成員郭嘉駿之稱呼,乘搭街渡返回白沙灣碼頸,於三星灣至白沙灣之間驚現一座寫有「193」號碼嘅燈塔,總算係一組近月當紅嘅熱門數字,編輯想稱呢座難以步行而至嘅神秘燈塔為「193燈塔」。

折返白沙灣碼頭,落船後可以觀賞黃昏日落景,亦可以環瞰海上壯觀暮色,正好為拍拖一日遊作結。


E.A.Tips :

(1) 前往三星灣有幾個方法,一係於白沙灣遊艇會碼頭旁邊街渡碼頭坐街渡直接前往三星灣,船程約10至15分鐘,來回人均$20,單程$10;或者於西貢步行到三星灣泳灘,由西貢海鮮街起步,腳程需約1小時,另乘搭小巴路線1或1A可於北港路之後消防局落車,從西貢消防局起步,沿康健路轉入康富路即到登山口;又或者由西貢街市乘搭小巴路線4A或4號到對面海邨落車,免卻西頁海鮮街至對面海邨一段路,直接到達登山口。

(2) 由西貢對面海邨旁邊康富路登山口上山,路段並非石屎路,而係山路,由登山口到沙灘,單程需時45分鐘至1小時。網上部份資料只為嘩眾取寵,網媒如是,當中所寫嘅平坦易行謹記係不能盡信,路段有幾次需要上行,只不過前段山路比較寬闊,行到接駁遊艇會花園分岔路口先會到達石屎路,其後為山路,而隨後三星灣、麻籃笏分岔路口先會再見到石屎路,而前往三星灣嘅路就較陡峭,穿過山頂後落山,前行10分鐘就會去到沙灘,故整段路其實仍有危險度。

(3) 三星灣泳灘為康文署正式泳灘,內有基本設施,包含更衣室、洗手間、浮台、遊樂場、20個燒烤爐、小食亭,當中雖然有男女更衣室,但有淋浴設備就無分男女。

(4)
沙灘有救生員,當值時間為09:00至18:00,假日則為08:00至19:00,冬季救生服務則暫停,浮台亦會暫時移走作保養維修。

(5) 巴士路線92,92R,299X,792M、小巴路線1,1A,1S,101M 皆可到達白沙灣碼頭,轉乘街渡就可以到達三星灣,不過街渡一般星期六、日及公眾假期先行駛,詳情要向船方詢問。

(6) 山路沿途無補給點,最好於西貢買齊糧水,因為三星灣泳灘內小食亭亦不必次次開。

(7) 留意白沙灣碼頭街渡有分藍旗船、紅旗船,前者可聯絡石天有 9053 2520,而後者則可聯絡石堅秀 9620 6603、9484 8487,謹記要保留來回船飛。

(8) 行山謹記量力而為,要做足準備功夫,查看路程。

(9) 無論行山定去沙灘,謹記自己垃圾自己帶走。

(10) 西貢三星灣海水清澈,記得要好好保護海洋。


(11) 三星灣泳灘水質於雨後有機會被地面逕流、泳灘腹地內排放影響,故最好避免雨後或風暴後兩三日落水。


(12) 白沙灣碼頭有停車位,但車位唔多,常滿,前行至遊艇會方向路邊反而有更多停車位。

(13) 白沙灣碼頭街渡船期方面,網上顯示返回白沙灣尾班船為18:30,但船上通告寫有夏季尾班船為19:30,不過最好時間上都係唔好咁抆啦。


編輯步行路線﹕

建議路線﹕

193燈塔位置﹕

白沙灣至三星灣碼頭﹕

三星灣泳灘

西貢白沙灣三星灣

2792 3672,2791 3100

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook啦!
ΔPlease Like & Follow & Subscribe /
歡迎讚好、追蹤、訂閱

       

銅鑼灣推限定二人套餐 人氣店燈籠滷味啖啖台北夜市風味
靠近石板潭!本地鳳眼藍9月再盛放 鹿頸南涌魚塘角落零距離觀賞浪漫紫花海【2021賞花地圖】
Bauhaus風格豈止中環街市? 中上環博覽館活化必列啫士街街市 直上半山探索童話式大宅
盛夏Kayaking!西貢海灣3條路線出發獨木舟 小島玻璃水清澈見底 探索海洋生態享異國風靚景
筲箕灣東大街平民價正宗泰國菜 冬蔭公湯底濃郁可口 蝦醬炒飯惹味有驚喜
深井村西式咖啡店只限7月?All Day Breakfast 配料自選 罕見櫻花蝦炒蛋+熱香餅有新鮮感
深水埗基隆街泰北麵口味正宗 家鄉湯底香口惹味恍如穿越泰國
【中秋好去處2021】大澳水鄉花燈節取消開幕儀式 走勻大街小巷尋幻彩手繪燈籠 同場加映元朗大橋街市五彩燈籠街+灣仔利東街紅噹噹燈籠海
光屋係乜東東?深井村歷史文化半日遊 農村變工業邨再變住宅地 探索舊式工廠+廢校牌坊
九十後部落觀塘新分店開業 懶人週末悠閒上樓歎All Day Breakfast
夏日去邊個沙灘?粉藍情人橋重開打卡地再現 石澳盡頭闖大頭洲回望小漁村尋靚景
大角嘴街角星馬菜餐廳 大大塊厚切豬扒上枱就聞到香味 最出色唔係菜式係乜?
大角嘴角落手打烏冬專門店 經濟型街坊價定食有乜揀?
尖沙嘴鬧市藏港版粉紅教堂 哥德式設計逾百年歷史 尖頂似浪漫童話古堡
中環半山藏薄荷綠摩羅廟 全港最古老清真寺被列一級歷史建築
【西藏偽旅行】五彩經幡隨風飄揚 山上滿佈彩旗寓意吉祥?

撰文﹕Miss A ;攝影﹕Mr E, Miss A;設計﹕Mr E

View all posts by 撰文﹕Miss A ;攝影﹕Mr E, Miss A;設計﹕Mr E →