兩個人醫吓肚,  和你Taste,  小食甜品,  港式

「食街」搵食遊!西貢巷弄7間夏日必去本土小食店 離碼頭僅2分鐘步程

瀏覽次數: 62
個人瀏覽過





今年天氣提早開始炎熱,意味又係即將出海玩水嘅季節,西貢向來係熱門地點,當中西貢小巴站旁邊嘅「食街」敬民街、福民路之間小巷就係唔少戶外玩樂人士嘅首選搵食之地,但當中有幾多間可以幫襯?今次編輯就同大家逐一嘗試,數一數有幾多間稱得上係良心食店,方便大家拍拖兩個人去搵食。

(1)牛牛

第一間係食街中較新嘅小店,有留意EATWO嘅讀者都應該睇過我哋新店介紹,話明牛牛,當然係以牛肉為主要食材,而沙嗲配牛肉更加係港式風格中不可或缺嘅小食,適合「牛魔王」情侶們。牛肉小食包含牛肉、牛脷、牛頰肉,再配搭麵包、撈麵等,更有Shake Shake系列小食,除咗薯條亦有雞翼、雞翼尖。

延伸閱讀﹕西貢驚現地下鐵路站!全新牛肉小食店毗鄰碼頭 驚喜酥脆炸麵+5款口味Shake Shake薯條

牛牛

西貢福民路58號高富樓A座地下32號舖
星期一全日休息、星期二至日 12:00 – 20:00
4611 6216

(2)嘰哩咕嚕

另一間係以台式拌麵為主打嘅小店,另有台式小食如鹽酥雞、芝士脆脆丸、南瓜脆脆餅等,只有戶外一張二人座位,當中有麻醬手撕雞冷麵$36,手撕雞、麻醬份量唔少,平舖麵底之上,冷麵拌入手撕雞、麻醬之餘,亦有青瓜絲,入口清爽,適合夏天食用。拌麵系列當中有一款係季節限定嘅溫泉蛋肉燥拌麵$45,並非冷麵,而係熱麵,麵條暖笠笠,拌入青瓜絲、溫泉蛋,更有平常台式肉燥飯先有嘅肉燥,加上蛋汁後帶有黏稠感,幾開胃。更特別之處係一樽樽嘅冷泡茶,有檸檬茶、茉莉花茶,亦有柚子檸檬茶,膠樽上無商標Logo,為自家製飲品,茶味充足而解渴,可以帶走循環再用,適合戶外活動如行山後飲用。

嘰哩咕嚕

西貢敬民街9號地下24號舖
12:00 – 20:00
5346 3940

(3)Chip In Fish & Chips

小巷當中有間以英式炸魚薯條為主打嘅小食店,即叫即炸,係一間外賣小食店,據悉Fish係含Omega-3嘅深海鱈魚,加入啤酒生炸,相對一般魚肉較紮實,而Chips就係比利時薯條,粗身而有薯香,然後再配搭他他醬,招牌作為炸魚薯條、炸Oreo、炸魷魚圈等。

Chip In Fish & Chips

西貢敬民街9號高勝樓地下11號舖
11:00 – 19:30
6418 6575

(4)松記車仔麵

整條食街最為人認知嘅一定係松記車仔麵,既係最接近小巴站嘅一間,亦係地方最大嘅一間,自選車仔麵每碗$30起,除咗一般車仔麵有嘅麵底,最特別係有銀針粉,而車仔餸則每款加$13,當中有豬紅、蘿蔔、雞翼尖、魚餅、墨魚卷、豬大腸、牛腩等,湯底為正常腩汁湯底,不過不失,無乜特別,選擇困難症亦可以直接點選盆滿缽滿八寶麵$68等款式,內有雞中翼、魚蛋、紅腸、豬皮、豬紅、魷魚、蘿蔔跟菜,免去選擇時間,加多一杯凍豆漿$10,不過豆漿偏甜。

西貢松記車仔麵

西貢福民路高勝樓19-21號地下
星期一至二 07:30 – 19:30、星期三全日休息、星期四至六 07:30 – 19:30、星期日 07:30 – 20:00
2792 9172

(5)阿四糖水

小巷內連甜品、糖水都有,呢間糖水舖包含台式珍珠奶茶,又或者可以揀水果茶、沙冰等,無論糖水定飲品,大多數其實都偏向中式居多,價錢較一般茶飲店平少少,平均大概$20左右,只接受Cash交易。

阿四糖水

西貢福民街58號高富樓C座地舖

9558 0935

(6)Hushush Ice Cream Coffee

除咗上述中式糖水店,小巷內亦有西式甜品店,不過就係一間以咖啡為主嘅甜品店,因為小店提供獨特精品咖啡,招牌作就係咖啡雪糕,Affogato係必試之作,店內座位只有約10個,同時只接受Cash交易。

Hushush Ice Cream Coffee

西貢福民路58-72號高富樓地下33號舖
星期一至二全日休息、星期三至日10:30 – 18:00

(7)金豚亭

隱藏於食街最後方嘅金豚亭,係西貢食街當中,每日比較早營業嘅小店,雖然唔太顯眼,座位唔多,但可以方便出海或行山前食個早餐,每份價錢親民,食物簡單,比如撈丁、腿通呢啲茶記食物,人均僅約$40。比如自選扒餐早餐$46,雞扒、豬扒、牛柳粒或魚柳任揀一走,配煎蛋、炒蛋或烚蛋,再加腸仔、火腿、餐肉或煙肉,重有牛油多士、茄汁豆,加$8有法蘭克福腸,牛柳粒重黑椒味,份量唔算多。而典型茶記食物沙嗲牛肉麵$38,配煎蛋、炒蛋或烚蛋,腸仔、火腿或煙肉,亦可加$8轉法蘭克福腸,就係一份不過不失嘅早餐。

金豚亭

西貢敬民街9號高勝樓地下37號舖
06:30 – 21:00
5260 5037




E.A.Tips﹕

(1) 小巷位處西貢敬民街與福民路之間,離小巴總站只係1分鐘步程。


Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


長假期後人氣熱點頓變空蕩蕩巨石陣 30分鐘從炮台山日式庭園登北角後山新手路線紅香爐峰
【野餐隨行】鰂魚涌香港人高水準兩餸飯最平$32 闖北角清靜海邊公園野餐近汽車渡輪碼頭
新田加州花園保留罕見赤紅色殖民時代電話亭 英式小庭園探索圓柱形皇冠郵筒/貴族風時鐘
【野餐隨行】黃大仙近30年騎呢《西遊記》公園野餐 本土自家製熱狗店推分店限定優惠
大圍舊式茶樓客香邨現已恢復24小時營業 火鍋店616班底接手保留經典糯米包/魚翅餃
非來自台灣?本土製牛肉麵旺角/長沙灣有得食 外賣自取折後$50有找
近屯門碼頭!屯門蝴蝶灣泰國冬蔭功蝦湯奶白變橙紅 估吓一碗有幾多隻蝦?
鑽石山出發勇闖石礦場!山中秘道探索高聳東南亞樹屋 上中下三條路線直抵城市後山入口
【野餐隨行】登紅燈山觀九龍半島!何文田勝利道姊妹店廚房打通 兄弟邦x鮮丼家一舖兩用賣日式丼飯
太子人氣車仔麵湯底鹵汁混腩汁 16款麵底任揀必試低卡蒟蒻麵
薄扶林榕樹小徑驚現獨特樹洞仙境!一條路線走過殖民建築玫瑰邨+歷史古蹟伯大尼教堂/舊牛奶公司牧場
全港7間兩餸飯專門店良心地圖!港九新界遍地開花間間平靚正低至$32!(最新消息﹕5月鰂魚涌有新店)
近天澤商場!天水圍後山矮過嘉頓山 秘道闖淋坑山賞北方黃昏景【野餐隨行】
【野餐隨行】鴨脷洲海邊歎有料車仔麵 前臨南區純白燈塔眺東博寮海峽3支煙囪 30分鐘輕鬆走完小玉桂山
月前旺角設分店齊齊叫雞!上水鳳鳴居足料無味精雞湯麵濃郁可口 醉雞嫩滑+10款湯底回頭率極高
油麻地香噴噴鐵板魷魚鬚惹人垂涎 廟街招牌流心芝士玉子燒香甜不膩