[sig_post_pv label=””] 個人瀏覽過
踏入盛夏，又係時候去沙灘玩吓水，不過熱門沙灘人流極多，往往需要見縫插針，難以享受陽光與海灘環境。今次編輯帶大家去一個人流比較少嘅沙灘，車輛無法進入，只可以兩個人靠雙腿去沙灘位置，最適合拍拖情侶靜靜遊沙灘！
目的地為龜背灣，乘搭巴士或小巴路線均可以抵達大潭道，沙灘入口靠近紅山廣場、紅山半島，前行有正式路口，可望無際海景，不過比較方便嘅係位於大潭道、白筆山道交界嘅小路口。步入大潭道旁邊小路，向下行可以接回正式入口樓梯級，只需轉左繼續沿石級向下行，5分鐘即達龜背灣海灘。
沙灘背靠龜山、大潭水塘，位處大潭東面海灣，左邊可見皇府灣、紅山花園，正對大潭灣，可眺望鶴咀方向，螺洲、蒲台島於前方若隱若現，而另一邊雖然未能望向大潭廢堡、石灘，但亦可回望赤柱，風景不俗，黃昏時依夕陽光線漫步沙灘亦夠浪漫。
對比赤柱沙灘，龜背灣海灘面積雖小，長約不足100米，但人流同時亦較少，於龜山、白筆山之間位置自成一角，亦位於石澳、赤柱之間，一端可見別墅成群，正對大海，有如高尚住宅旁嘅私人小沙灘，屬港島南區比較少人嘅沙灘。
龜背灣沙灘水質不俗，清澈，據悉1998年至今維持於良好級別，而沙粒幼細，唔算粗糙，總算係可以找尋一個安靜角落玩吓水，感受陽光與海灘，感覺悠閒，倍添愜意。
沙灘旁邊有一面崖壁，破舊牆身有如戰時遺址，隱藏於沙灘、別墅之間，從海旁觀望，可遠眺赤柱方向，享赤柱正灘相同景色，但相對更清靜、舒適。
E.A.Tips :
(1) 龜背灣泳灘一般24小時開放，但救生員當值時間只限09:00至18:00，而冬季11月至3月則暫停救生服務，浮台亦會暫時移走以進行保養維修。
(2) 由小西灣或西灣河乘搭巴士路線14號或314號，又或柴灣乘搭小巴路線16M，均可於龜背灣落車。
(3) 落車後可沿海旁走找尋龜背灣泳灘入口，位置靠近紅山廣場，背靠大潭，從馬路旁邊小路入口向下行，沿下行階梯、斜路走，5分鐘內可以步行到龜背灣泳灘。
(4) 龜背灣泳灘為康文署正式泳灘，有基本設備，包含洗手間、更衣室、淋浴設備，亦有遊樂場，更有疫情期間封閉嘅燒烤區。
(5) 龜背灣位處石澳、赤柱之間，可望赤柱方向，而又無需同人逼沙灘。
(6) 沙灘旁邊有疑似歷史建築遺址，可以影吓相。
(7) 謹記保持安靜，自己垃圾自己帶走。
(8) 最好預先準備充足糧水，而且要做足防曬、防蚊措施。
龜背灣泳灘
香港赤柱大潭道
24hours 
2813 0386
