三門仔+馬屎洲(天使之路)
兩個人影吓相,  新界

零難度遊走三門仔至馬屎洲賞吐露港八仙嶺 港版小豆島天使之路尋連島沙洲 近距離望全條大美督水壩

瀏覽次數:565
個人瀏覽過





龍尾灘近月正式開放,久未出埠嘅香港人連人工泳灘都見縫插針,其實離龍尾灘不遠處都有一個石灘,而且係一個連島沙洲,恍如日本小豆島「天使之路」,唔需要拍拖搭船去橋咀島,一樣都可以兩個人去拍攝連島沙洲㗎!

「天使之路」係日本香川縣小豆郡土莊町銀波浦地區內一個沙洲,全長約有500米,於退潮時會出現一道沙灘小徑,連接兩個小島,可以輕鬆步行到對岸,相傳情侶兩個人一齊走過「天使的散步道」後會願望成真。即使未有得去日本,亦可以於香港找尋港版「天使之路」,同樣有無敵海景,等待漲潮、退潮,觀察自然現象,掌握潮汐時間就可以穿越淡黃色而細長嘅連島沙洲步道,完全係時間限定。

由陸路步行而至嘅連島沙洲,位處大埔汀角路比華利山別墅對入嘅三門仔村,而三門仔為一條漁村,內有三門仔棚屋,以蜑家人為主,即水上人,對出有三門仔漁排,內裏亦有一個泥灘,更有大埔區鹽田仔,而南面正正靠沙洲連接馬屎洲,當中嘅純樸感覺係平時石屎森林中難以搵到。

由三門仔行到馬屎洲,並非神秘路線,基本上只係一道容易受忽視嘅路線,沿途一直可以回望慈山寺嘅巨型純白觀音聖像,由三門仔村步上梯級,大概走15分鐘樹林路,中段會見到一個個山墳,之後就會見到吐露港,亦可眺望馬鞍山、中大,前臨吐露港,背靠八仙嶺,盡頭更可以超近距離望丫洲、白沙頭、白排角、大美督水壩、船灣淡水湖,以至東頭洲方向,位置可享全海景,海灣中有漁船點綴,而慈山寺純白觀音聖像亦清晰可見,左右兩邊都係風景。



大埔鹽田仔於潮漲時會被海水淹蓋沙洲,只有潮退時先可以從大埔鹽田仔步行到馬屎洲盡頭位置,唔使過水濕腳。馬屎洲僅高海拔114米,佔地133英畝,對比出名有連島沙洲嘅橋咀島,交通更方便,正常情況下唔需要搭船都可以抵達,同樣因潮汐生態而出現連島沙洲,走到盡頭大概係30分鐘步程。

馬屎州自然教育徑目前人流唔多,係相對比較舒適嘅地質公園,由涼亭走到沿海步道,可選擇走小山路或石灘路,輕鬆易走之餘,風景亦優美。而馬屎洲最特別嘅地方係擁有古老岩石,甚至受保護嘅岩石,比如2.8億年前形成嘅沉積岩,重有火山岩,地質上亦非常獨特,可見斷層、褶皺嘅泥岩、粉砂岩、砂岩,形態各異,當中更有唔少岩石受海蝕、風化影響,都係值得觀賞同保留。

折返三門仔,亦可以找尋大埔地質教育中心了解更多資訊。另外,三門仔村內亦有趣味打卡位,村內可見迷係彩虹階梯、有趣壁畫,位置靠近士多,部份以小貓為主題,而必經之路更有一隻又一隻真實貓咪遊走三門仔村,都係村民所養,可愛非常。而三門仔碼頭亦不時有釣魚客垂釣,碼頭既有白色燈塔,亦可飽覽黃昏日落景緻,正好為一日遊作結。


E.A.Tips :

(1) 乘搭巴士路線74K或小巴路線20K,可以直接抵達三門仔,當中小巴係總站落車,步行約45分鐘可以穿過連島沙洲到達馬屎洲盡頭位置,全程約3.4公里。

(2) 最好搭車前預先準備好糧水,但三門仔村內亦有少量士多可作補給。

(3) 建議預先準備好防曬、防蚊用品。

(4) 要事前查看天文台網站,睇吓當日潮汐漲退時間,以免潮漲時岩石被海水淹沒,一般下晝3至4點前就好穿越連島沙洲,以免潮漲時進退兩難。雖然有艇家於連島沙洲提供服務,但就要額外俾錢。

(5) 最好穿著波鞋、防滑鞋,皆因石灘非常凹凸不平。

(6) 而馬屎洲石灘旁邊亦有小路,比較容易行走。

(7) 由三門仔前往大埔鹽田仔、馬屎洲時,必須經過一堆山墳,僅記唔好大聲喧鬧,尊重仙人。

(8) 由三門仔走到馬屎洲時,中段不時會有野豬出沒,尤其係有一堆垃圾嘅地方,遇上野豬時記得唔好舉機拍攝,盡量遠離野豬,唔好有挑釁動作,同時要自己垃圾自己帶走。


(9) 注意三門仔村有狗吠聲,要小心安全。


三門仔新村

香港新界大埔區鹽田仔

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


免加2蚊!太子親民居食屋靠近雷生春 日式料理丼飯套餐外賣抵過堂食
流浮山海鮮街酒家林立藏殖民時代皇冠郵筒 海味場旁眺后海灣日落觀60年歷史神秘建築物
【野餐隨行】九龍城人氣泰國菜皮蛋炸蝦餅x潮州粉麵上等牛坑腩 賈炳達道公園野餐大玩Crossover
西貢外賣限定英式炸魚薯條專門店 最高人氣係邊款小食?
經偽鳥居登長洲最高點北眺亭 關公忠義亭附近躲藏超隱秘殖民時代懷舊T形街牌/皇冠郵筒
【野餐隨行】牛頭角消失的後山?鱷魚山81米高隱蔽小公園眺海景 歎近50年老牌上海菜館米芝蓮正宗滬菜
後生仔主理!旺角女人街$50海南雞飯 4款口味有咩揀?
【野餐隨行】元朗人氣壽司丼飯店係驚喜定驚嚇?公園大草地野餐望姆明小屋百鳥塔
旺角點心專門店外賣自取!$56一個人點心拼盤唔使怕選擇現分歧
娛苑起步!142級樓梯登元朗後山豬黃嶺 超矮標高柱眺望雞公嶺淋坑山
樂富唯二!茶餐廳中伏食物多?尋隱藏三和砵仔蒸飯水準不俗
東梅古道起步登昂坪救援徑現代棧道 一隅400米高近距離下瞰香港赤臘角機場宛如觀景台
【野餐隨行】天水圍新北江商場消暑刀削麵 實試公園湖邊草地旁用餐到底有咩問題?
離潮流特區僅3分鐘步程!旺角砵蘭街越南河內料理必食牛柳粉 牛湯濃郁菜式地道
【土瓜灣半日遊】前馬頭圍大廈朝聖193 Cafe!香港花見小路/日系粉紅橋打卡 牛棚藝術公園探索牲口棚遺跡【野餐隨行】
免搭船!穿梭大橋徒步過海往返香港仔鴨脷洲 360度探視珍寶海鮮舫最後景象