[sig_post_pv label=””] 個人瀏覽過
氣溫仍然炎熱，代表依舊處於盛夏季節，想抓緊夏天尾巴就當然要出海玩水啦！今次帶大家由西貢出發，挑選最易租借獨木舟嘅三條路線，交通亦非常方便，可以輕鬆隨意感受陽光與海灘，觀賞豐富海洋生態，充滿異國感，拍拖想出吓海嘅話，不妨玩吓獨木舟啦！
今次三條路線嘅目的地划獨木舟難度都唔高，而且係最容易租借獨木舟嘅地方， 獨木舟類型以SIT ON TOP為主，艇身寛度大，沒有船艙 ， 速度比較慢 ，但平穩不易反， 適合新手或無經驗人士大玩Kayak。獨木舟有分單人船或雙人船，以一支長船槳於艇嘅左右兩邊輪流划水，划槳可以前進，而艇內有腳踏，方便伸直雙腳休息或借力，兩個人可以撐一隻雙人船或每人一隻單人船，基本上正常划槳唔會太危險。
延伸閱讀﹕潛入神秘紅樹林隧道！獨木舟遊大美督闖馬屎洲連島沙堤 羊洲有羊群眺慈山寺觀音像 黃昏登龍尾灘觀夕陽賞夜景
（1）海下灣出發至海岸公園
第一條路線為海下灣，可於香港一個海岸公園保護區玩吓獨木舟。由西貢前往海下灣，由西貢出發，目的地為位處西貢半島北岸嘅海下灣，靠近西頁西郊野公園，於海下路落車後，到達海下村，繼續向前走約2至3分鐘即達沙灘，可以前往海下灣海岸公園，近海下灣碼頭可眺望銀洲、磨洲。海下灣西南面叫海下，意指近海地方，而海下灣嘅海洋生態物種豐富，海水無雜質，對比市區海水係比較清澈，可算係西貢後花園。
海下灣既係獨木舟好地方，亦係浮潛勝地，編輯當日所見兩樣海上活動都有人參與，浮潛更可睇珊瑚，但潛水就需要特別申請。雖然海下灣以海上活動為主，但事實上早年係盛產石灰，目前仍可見石灰窟，西貢白沙澳村大屋就係採用海下灣石灰原料。
物種豐富嘅海下灣，不單有珊瑚，亦有大片紅樹林，甚至無脊椎生物，據聞全港88種珊瑚當中有59種可於海下灣搵到，令海下灣水域活動充滿外國感。沙灘水清沙幼，水質清澈見底，既可享受陽光與海灘，亦可逐步探索海洋生態，划獨木舟找尋珊瑚礁，甚至海參、海膽、海星等生物，海風輕撫，確實可以零距離接觸，單單遊覽吓海下灣已經有如出國。
海下灣算是三個遊玩路線之中停留點最多最密集。新手可於週邊石灘停留參觀，如串爆角咀，三抱石等。如屬中階程度 ( 例如擁有相關星章資格) ，可到海中心珊瑚群帶落艇浮潛。時間充裕及經驗豐富者更可到塔門或鬼手岩等景點參觀。
海下灣沙灘背後有海下自然教育徑，前行可見石窰，甚至可見世界自然基金會成立嘅賽馬會匯豐世界自然（香港）基金會海下灣海洋生物中心，可於展覽中再細心認識各種海洋生物，更可乘坐玻璃船探索海底珊瑚群。
E.A.Tips :
(1) 由西貢碼頭市中心總站乘搭小巴路線7號，於海下村總站落車，經小路入村可以去到海下灣海岸公園，基本上都有指示牌，車費為$13.1。
(2) 海下灣海岸公園為西貢海下灣獨木舟或浮潛好去處。
(3) 西貢碼頭開出小巴路線7號每班次大概相隔20至30分鐘，車程約25至30分鐘，星期一至五行走時間為07:55 – 18:25，
而星期六為07:55 – 18:25，星期日及公眾假期則為07:55 – 18:35；
至於海下灣開出小巴路線同樣每班次相隔20至30分鐘，星期一至五行走時間為08:25 – 18:55，星期六為08:25 – 18:55，而星期日及公眾假期則為08:25 – 18:45，
留意離開時間，18:45至18:55為小巴路線尾班車。
(4) 揸車入海下灣需要預先申請禁區紙，有需要可致電西貢郊野公園遊客中心3129 3056 / 2792 7365查詢，又或者停泊於西頁北潭涌停車場，再轉乘公共交通工具。
(5) 出海玩獨木舟亦要謹記帶備充足糧水，以免中暑，同時準備好防曬同防蚊用品。
(6) 記得唔好帶走任何海岸生物，甚至貝殼，但自己垃圾就要自己帶走。
(7) 想玩獨木舟或浮潛嘅話，可於好景士多或雲海士多租借，每人約$100至$200， 但留意要俾Cash。
(8) 交還獨木舟時間為16:00， 比其他地方為早 。
(8) 如自備設備，注意回程時間，入夜前要返回海下村，以免水流急遇危險，最好黃昏前返回安全地方 。
(9) 好景茶座有沖身設備，相當方便。
(10) 海下灣沙灘並非正式泳灘，無基本沖身設備或救生員，要小心安全。
其間不時會遇上的士兜客，但會有司機另收附加費 (注意此行為或違法！)
海下灣
西貢 
景觀 : ★★★★☆
水質 : ★★★★☆
價錢 : ★★★★★
（2）相思灣出發至綠蛋島
第二條路線係西貢相思灣，周邊路線景點不算密集， 最方便嘅係前往綠蛋島，有經驗者亦會到牛尾洲或吊鐘洲一帶。 相思灣係3條路線當中最海陸相連嘅一個地方。綠蛋島靠近龍蝦灣，從陸路可經龍蝦灣郊遊徑到海旁，而從水路則可由相思灣划獨木舟前往。
相思灣與綠蛋島皆位處香港西面，而相思灣位處龍蝦灣至檳榔灣之間，正對牛尾海，補靠釣魚翁，係另一個方便租借獨木舟嘅海灣。由相思灣出發前往位於清水灣嘅綠蛋島，只需划45分鐘至1小時，沿右邊海岸線一直撐就可以到達綠蛋島，沿途不時可見海蝕洞，划獨木舟時要注意海浪洶湧時可暫停划槳，亦要避免接近岸邊岩礁。
從上而下觀望綠蛋島，其實原本叫爛排，只係海域中一個石礁排，但後來被發現有如一隻綠色荷包蛋，其實中央有大量綠葉灌木，構成小森林，形狀酷似蛋黃，色調翠綠，因而得名。綠蛋島海邊有沙灘，而對面就係龍蝦灣石灘，潮退時更可從水路澗水步行穿過兩岸，不過就水深及腰。唔少人都會於石灘附近浮潛，探索海洋生態，海膽群、珊瑚群、海葵群應有盡有，魚類亦繁多，綠蛋島海水清澈碧綠，方便觀賞海底世界。
天空湛藍，海水碧綠見底，晶瑩剔透有如玻璃水，如同馬爾代夫或泰國蘇梅島，適合浮潛或划獨木舟。將獨木舟泊岸即可攀上綠蛋島，觀賞另一面景色，綠蛋島岩石質感特別，有如歷史悠久地質公園，一個個水窪有如馬大石澗嘅貴妃池，都可輕易構成「翡翠之鏡」，並非單純嘅「天空之鏡」。
E.A.Tips :
(1) 巴士路線91,91A,91R皆可到達相思灣路，而小巴路線16,103,103M亦可到達相思灣路，
分別由鑽石山、坑口、寶林出發，皆於清水灣道落車，而的士由坑口至相思灣海旁車費則約$60。
(2) 由清水灣道至相思灣路交界起步，沿下行路走向海旁方向，全程約需15分鐘，無需要理會中途啲分岔路，
一直向海濱別墅方向走，就會見到幾間租借獨木舟店舖，中途可見小坑口路、公廁。
(3) 從相思灣出發，大多會前往綠蛋島，距離並唔遠，1小時絕對足夠往返。
(4) 出海玩獨木舟亦要謹記帶備充足糧水，以免中暑，同時準備好防曬同防蚊用品。
(5) 記得唔好帶走任何海岸生物，甚至貝殼，但自己垃圾就要自己帶走。
(6) 租借獨木舟地方會有救生衣、基本沖身設備、更衣帳篷，亦可要求物品托管。
(7) 綠蛋島雖然清澈見底，物種豐富，但同時要小心尖石、礁石、蠔殼，會容易𠝹傷。
(8) 雖然綠蛋島目前係人流眾多嘅小島，但沙灘並非正式泳灘，並無救生員，要小心安全。
(9) 謹記要預先查詢天氣預報，留意風向、浪向、浪高，雷暴、大雨都要避免划獨木舟。
(10) 其中海賊皇獨木舟單人艇收費$150至$200，雙人艇收費$250至$300，可租借全日，由09:00至17:00。
(11) 最好穿著深色長袖衫褲，既可防曬，亦可減輕受傷機會。
相思灣
西貢
景觀 : ★★★★☆
水質 : ★★★★★
價錢 : ★★★★☆
延伸閱讀﹕潛入神秘紅樹林隧道！獨木舟遊大美督闖馬屎洲連島沙堤 羊洲有羊群眺慈山寺觀音像 黃昏登龍尾灘觀夕陽賞夜景
（3）沙下灣出發至橋咀洲
第三條路線係由最接近西貢市中心嘅沙下灣起步，離市中心基本上只有一段小距離，但遊人較少，當中有一個小沙灘可以兩個人拍拖散吓步、影吓相，夏天更可以於附近租借獨木舟出海。
由沙下出發，最直接係前往橋咀洲，即橋咀島，甚至前往被稱為廈門灣嘅半月灣，係一道比較熱門嘅路線。而中途更會經過多個小島嶼，例如白沙洲、羊洲、枕頭洲、大剷洲，休息點眾多，而距離唔算長，約有5至6公里，來回約2小時，適合新手。
白沙洲可作中途休息站，水質不俗，白沙洲有小沙灘，環境優美，穿過小沙灘可以直接前往橋咀島或鹽田梓方向，無需繞過小島。白沙洲離橋咀島不遠，大概再撐多15分鐘就可以到達，過程不算艱難，但要小心安全，唔好接近船隻。橋咀島係世界地質公園之一，當中菠蘿包石就係著名岩石，經長年累月風化而造成，一道連島沙洲可以貫穿兩邊，水漲時可以直接通過，但水退時謹記要提起獨木舟穿過，至於另一邊被稱為廈門灣嘅半月灣都係海水清澈嘅地方，浮潛可以輕易觀賞珊瑚、魚仔。
假若有力氣嘅話，可以撐到東面嘅鹽田梓、滘西洲方向，再登島遊覽，不過白沙洲附近係船隻航道，最好唔好橫越，唔經小島嶼直接從左邊前往鹽田梓就比較方便同安全，時間約需1小時。鹽田梓一度盛產海鹽，現時仍可觀賞小島舊有客家村落風光，亦可欣賞島上紅樹林，有時間可以環島遊，不過就比較費時。
前往羊洲、枕頭洲非常接近岸邊，建議先到較遠嘅島嶼，最後先返回羊洲、枕頭洲、大鏟洲。到達白沙洲亦只係15至20分鐘，而大剷洲位處白沙洲附近，於小島嶼停留，最大好處係人流較少，而且景色優美，有如身處無人島之中。
E.A.Tips :
(1) 由西貢碼頭出發，步行約10至15分鐘可以去到沙下灣。
(2) 橋咀島、鹽田梓都有小食亭作補給站，但最好預先準備好糧水。
(3) 世界地質公園海陸受到保護，謹記唔好破壞岩石或帶走任何海洋生物。
(4) 謹記自己垃圾自己帶走，唔好遺留海上。
(5) 記得做足安全措施，穿著救生衣。
(6) 沙下有幾個地方可租借獨木舟，基本上無需要預訂，人均約$100至$110，分單人、雙人艇，雙人艇比單人艇平$10，一般下晝5點要準時歸還艇。
(7) 租借獨木舟嘅地方無沖身設備，但有一個小型更衣地方，沖身需要步行到游泳池或網球場或體育館。
(8) 陽光猛烈，最好穿著深色長袖衫褲，外塗防曬，同時穿著包腳鞋。
(9) 大防水袋、手機防水袋亦係不可或缺之物。
(10) 記得預留至少1小時回程。
(11) 登岸時要將獨木舟綁實，避免被海浪沖走。
(12) 兩個人坐雙人獨木舟會比較方便，而且慳力，如果兩個人配合同步划水，速度會比單人獨木舟快，
新手挑選雙人獨木舟會較安全，可互相照應，而有經驗人士則可挑選單人獨木舟。
(13) 沙下灘附近都可以見到租借獨木舟嘅地方，例如水上活動中心，有獨木舟、直立板、風帆等，甚至浮潛套裝。
沙下灣
西貢
景觀 : ★★★☆☆
水質 : ★★★☆☆
價錢 : ★★★☆☆
在〈盛夏Kayaking！西貢海灣3條路線出發獨木舟 小島玻璃水清澈見底 探索海洋生態享異國風靚景〉中有 1 則留言
留言功能已關閉。