瞰鋼線灣景色！穿梭山頂至薄扶林水塘尋港版《千與千尋》場景新哥德式風格大學堂/伯大尼教堂打卡薄扶林村都有秘地？

[sig_post_pv label=””] 個人瀏覽過

連接太平山山頂有幾條路線，除咗纜車小徑，薄扶林家樂徑亦係其中之一，但夏日炎炎，由山腳或山腰向山頂進發係比較疲憊，編輯建議逆線而走，由山頂折返薄扶林，路段林蔭眾多，落山輕鬆易行，適合拍拖情侶散步，30分鐘可以走完薄扶林水塘道，亦可兩個人探索水塘秘道，再走訪歷史建築。

從山頂廣場步行到薄扶林郊野公園入口，只係1分鐘步程，起步點前可先觀賞維多利亞港風景，再沿山頂薄扶林家樂徑走到水塘道郊野公園薄扶林管理站，全程為石屎路，只係2.2公里，僅需約30分鐘步程，為夏日炎炎亦適合步行嘅路線。

離薄扶林家樂徑入口不遠處，會發現一個貌似日本動畫電影《千與千尋》嘅場景，路段兩旁遍佈青苔、雜草，而牆邊亦滿佈樹根，畫面綠油油，場景有種唔太真實嘅感覺，有如動畫一樣，值得打吓卡。

沿薄扶林家樂徑走，樹蔭茂密，草香怡人，不時可見旁邊有流水淙淙嘅石澗，而中段可連接港島徑一號，支路可通往西高山、龍虎山，而繼續前行則可以前往薄扶林郊野公園、薄扶林水塘，沿途可見翠綠山坡。

薄扶林水塘有幾分似靠近鴨脷洲嘅香港仔水塘，家樂徑盡頭可見郊野公園薄扶林管理站，途中可見雀鳥圍繞樹枝頂悠閒飛翔，甚至聽到鳥唱聲，有如置身雀鳥天堂。而薄扶林水塘於1863年興建，年份比大潭水塘更早，為最早建成嘅水塘，用作收集雨水作供水之用。而土堤為香港二級歷史建築；由花崗石砌成嘅量水站則為香港法定古蹟；至於郊野公園薄扶林管理站前身為看守員房舍，採古典風格設計，內有中式瓦頂，目前亦同樣係香港法定古蹟。

郊野公園薄扶林管理站旁邊有一道神秘登山小徑，拾級而上可通往薄扶林一號食水配水庫，斜度稍高，但唔算長，總比上山頂容易。穿過天梯後，即可到達一個大草地，一旁有鐵絲網圍繞配水庫，而大草地內不單有蚊蟲，更有比較少見嘅蜻蜓低飛、蜜蜂採花蜜情境。

今次呢個配水庫並無建成配水庫遊樂場，只有一塊草地，雜草叢生，大草地外可俯瞰薄扶林、鋼線灣一帶海景。折返樓梯口，可見另一端小路通往配水庫閘口，配手庫建築寫有「H.K.1940 W.W.」，意指建造年份，由此可見該配水庫歷史悠久。

折返原路，沿管理站路段直行到底，沿途會經過薄扶林公眾騎術學校及傷殘人學騎中心、香港大學大學堂，薄扶林道對面更有伯大尼小教堂，而香港大學大學堂、伯大尼小教堂風格獨特，都係充滿異國風嘅建築物。香港大學大學堂由蘇格蘭商人建成，以城堡外貌設計，以新哥德式、都鐸時代建築設計，華麗優雅，電影《川島芳子》、《情聖》、《今夜星光燦爛》都曾於大學堂取景，現時為香港法定古蹟。

而伯大尼小教堂又名伯大尼修院，法國巴黎外方傳道會於1875年興建，原為傳教會士休養地方，有逾130年歷史，2006年起由香港演藝學院租用至今，最特別之處係同樣採新哥德式建築風格設計，包括外廊、尖頂拱柱遊廊，以至純白牆身、扶欄都充滿異國風情，目前為香港法定古蹟。教堂內有彩繪玻璃窗、教堂祭壇，更有金字型屋頂，設計獨特。

於薄扶林道路口左轉，前往薄扶林村，可尋找舊牛奶公司高級職員宿舍，而宿舍有咩特別？牛奶公司牧場曾經為本地人提供新鮮牛奶，養過逾千頭牛隻，而兩幢宿舍之間曾經有一道超長滑梯，而主樓、傭工宿舍、車庫3幢建築物更獲封為香港一級歷史建築，當中宿舍嘅牛眼窗則可以通風兼防潮，但牧場目前已經荒廢。

但編輯近日走訪現場，發現舊有滑梯已經拆除，宿舍亦由被封閉，大門口同樣被圍封。事實上，近月署理發展局局長黃偉綸曾介紹指將會活化成「薄鳧林牧場」，變成博物館展覽地方，甚至文物徑。

E.A.Tips :

(1) 於中環交易廣場乘搭巴士路線4,30X,91,94號、小巴路線22,22X，可以直上山頂廣場，沿薄扶林郊野公園路線而走；若從下而上走向山頂廣場方向，可乘搭巴士路線4,91,970,970X,7,37A,40,40M,71、小巴路線22,22S,23,23M,31,63，於薄扶林水塘道落車，穿過馬房到入口處，位置近郊野公園管理站。

(2) 薄扶林郊野公園內有野餐點、涼亭、洗手間。

(3) 薄扶林道有巴士路線22X, 94, 970, 970X, 973，可以往返中環等地。

(4) 香港大學大學堂、伯大尼修院一般都唔算對外開放，但後者間中會有開放時間，詳情請參閱香港演藝學院官方網站。

(5) 保護歷史建築物，唔好作任何破壞。

(6) 自己垃圾要自己帶走，唔好留低郊野間。

(7) 行山要保持安靜，都郊野係為咗戶外環境，唔係為咗聽人聲。

(8) 薄扶林一號食水配水庫可以連接港島徑一號，通往西高山、龍虎山，但薄扶林水塘道就可以近距離望水塘景。

(9) 伯大尼小教堂唔需要係教徒都可以結婚行禮，有關租用場地資訊請查詢香港演藝學院官方網站。

(10) 更多有關舊牛奶公司高級職員宿舍「薄鳧林牧場」資訊，請參閱官方網站。