2021-08-03

零成本遊迪士尼海邊小鎮! 港版琉森湖+復古燈塔打卡 走訪1公里無人之境 賞金黃雙莢決明/雞蛋花花海【2021賞花地圖】

迪士尼渡輪碼頭+燈塔+節果決明雞蛋花+ 迪士尼海濱長廊+直昇機停機坪+迪士尼度假區海鳴路最美坑渠草地格格境無人之境釣魚單車+ 迪欣湖 臘腸樹/豬腸豆

個人瀏覽過





本地迪士尼樂園入場費人均每次要$639,即使年票亦要$1278起,去一次主題樂園可以去普慶餐廳食到至少一次Buffet,主題樂園絕對唔係經濟型拍拖情侶好去處。今次編輯推介兩個人遊走迪士尼周邊景點,既可以於港版琉森湖散步,亦可於找尋古奇城堡、復古燈塔打卡,觀賞季節限定雞蛋花同金黃色節果決明,更可以到訪一道長達2.5公里嘅海濱小路,其中1公里路更加係無人之境。今趟精彩嘅迪士尼海邊小鎮遊成本極低,唔計車費,全程都係$0!

相信大眾都識得去迪士尼樂園,唔搭港鐵迪士尼線,亦可以經青嶼幹線繳費廣場乘搭巴士路線到香港迪士尼樂園度假區,落車後穿過迪士尼樂園門牌入口處、噴水池,無需要轉右入迪士尼樂園,只需繼續向前走到最盡頭,就可以遊走迪士尼海邊小鎮。

沿途人流比樂園稀少,大多為釣魚客、假日放假嘅「姐姐」,小公園維持一貫維多利亞式風格,包括涼亭、柱子。而中段更可觀賞連綿雞蛋花,一個地方可以望幾個品種嘅雞蛋花,包含白花黃心、粉紅色,加上正宗嘅紫紅色,一朵朵雞蛋花佈滿鹿角形樹椏上,清麗脫俗。

延伸閱讀﹕【2021賞花地圖】荃灣赤橙色隧道頓變港版千本鳥居 海濱逾10棵雞蛋花燦爛盛開

除咗雞蛋花,更有另一棵矗立小徑中央、散發串串金光嘅花朵,同中環美利大廈外嘅非常相似,只係顏色唔一樣,原來金黃色小花為雙莢決明,同美利大度粉紅色嘅節果決明相比,只係唔同品種。涼風輕吹下,鮮黃花瓣、黃蕊不時飄落,構成黃金雨點,充滿夢幻感。

呢棵雙莢決明樹同樣高約2米,樹頂全為黃色花瓣,有陽光就會開花,尤其溫暖濕潤嘅環境。黃花品種雙莢決明同美利大廈粉紅、白花品種花冠結構近似,花瓣灑落時有如黃金雨。雙莢決明姿態優美,金黃燦爛,有如蝴蝶翩翩起舞,花語為晶瑩、脫俗,被稱為黃槐。除咗迪士尼樂園對出小徑,迪欣湖近門口位置亦可找尋得到金黃色雙莢決明樹。

延伸閱讀﹕【2021賞花地圖】中環紅棉路美利酒店打卡 4月百年古樹綻放粉嫩奪目節果決明

繼續向前走向南端,會到達離迪士尼樂園僅15分鐘步程嘅迪士尼渡輪碼頭,設計採維多利亞風格,極具特色,內有東、西側碼頭,兩邊同樣復古而典雅,而且寬闊舒適,加上欄杆、天花均為米奇老鼠圖案,吊扇、吊燈、長櫈都有韻味。

西側碼頭可以望向狀似城堡嘅香港迪士尼樂園酒店,有如瑞士古奇城堡,對出為海濱長廊;而東側碼頭更有一座復古燈塔,正對坪洲方向。

不過,現時編輯於碼頭觀察,發現2005年造價1.68億嘅迪士尼渡輛碼頭現時近乎荒廢,一方面無人於詢問處當值,另一方面外面寫住「Ferry Schedule」告示版亦唔見有任何航班,未知碼頭目前仍否繼續運作。整個碼頭只有一眾釣魚客於碼頭垂釣,亦有於碼頭散步嘅閒人,附近海面上亦只間中有私人遊艇、舢舨停泊。碼頭曾受颱風「山竹」吹襲,設施受到損毀,但至今似乎仍未有人修復。

      

離開渡輪碼頭,可以轉入迪士尼海濱長廊,會經過香港迪士尼樂園酒店、迪士尼好萊塢酒店、迪士尼探索家度假酒店,同右邊呢竹篙灣三間酒店相比,絕對係人跡罕至。兩個人漫步海濱長廊,環境清靜,海天一色,風景秀麗,可回望迪士尼碼頭燈塔,亦可由西環環瞰至大嶼山愉景灣方向,景觀遼闊。於海旁步道可以吹吹海風,感受大自然,有如歐陸海邊小鎮,同右邊迪士尼樂園緊張刺激嘅氣氛構成對比。

沿海濱長廊直行到尾,係竹篙灣內一個直昇機停機坪,僅限直昇機升降使用。而對面就有一道小路,從小路直走,會發現係一個無人之境,地上石屎路上間中會有小草地格格,左邊風光如畫,有如中國九寨溝,但礁石無人踐踏過,非常難得,不過又點會估到海鳴路對入只係一道由渠務處管理嘅坑渠。

穿過海鳴路旁邊小路後,可隨時折返海鳴路、神奇道上嘅車路,沿路可以經神奇道前往迪欣湖活動中心,內有著名人工湖、野餐區等,空間呈舊式歐陸風格,加上湖光山色,亦似度假小鎮,環境有如瑞士琉森湖!漫步遊園,迪欣湖設施完備,不單恍如瑞士琉森湖,可輕鬆拍攝天空之鏡,而內裏白色木橋加上尖頂,狀似瑞士卡貝爾橋,適合影吓偽旅行照片。


E.A.Tips :

(1) 可以乘搭巴士路線到香港迪士尼樂園的公共運輸交匯處,而香港迪士尼樂園度假區亦有R字頭專營巴士路線,而市區的士、新界的士、大嶼山的士都可以到達迪士尼樂園,由落車到步行到港鐵迪士尼線旁邊入口處,步程僅約5分鐘。

(2) 度假區酒店穿梭巴士會經過香港迪士尼樂園酒店、迪士尼探索家度假酒店、迪士尼好萊塢酒店,每10至20分鐘一班車。 青嶼幹線繳費廣場可以乘搭迪士尼樂園巴士R8線,經過迪士尼樂園,直達迪欣湖活動中心,全程$7,半程$3;亦可以於屯門乘搭迪士尼樂園巴士R33線,全程$22.3,直達迪士尼樂園;而迪士尼樂園巴士R42線則可以往返大圍、荃灣至迪士尼樂園,全程$22.3。

(3) 若自駕遊去迪士尼樂園,可以經香港8號幹線到竹篙灣公路,經神奇道到幻想道。

(4) 原本從尖沙嘴天星小輪碼頭、中環3號碼頭、愉景灣碼頭,都有船可以往返香港迪士尼樂園度假區,但留意尖沙嘴每日只有一班船來回,而愉景灣亦只限週六、日、公眾假期,不過目前碼頭無渡輪,幾近荒廢,門口詢問處亦無顯示有任何航班,只有間中靠岸嘅遊艇、舢舨。

(5) 建設由迪士尼碼頭為起點,經迪士尼酒店、海濱小路,穿過秘道,再前往迪欣湖,步行時間約30分鐘。

(6) 除咗步行方式,亦建議可以踩單車由碼頭到迪欣湖,會更方便,而且路段人流極少。

(7) 迪欣湖內有7-11雜貨店、人工湖、植物園、兒童公園、緩跑徑,補給可以去7-11。

(8) 謹記迪欣湖係嚴禁攜帶寵物入活動中心範圍,同時亦嚴禁放風箏或玩航拍。


(9) 迪士尼渡輪碼頭東側洗手間已被關閉,而西側碼頭洗手間則仍然可以使用。

(10) 海濱長廊盡頭有大閘鎖上,中途不時會見到單車客,前面為直昇機停機坪,再前面就有一道小路通往無人之境,但點去就要自己諗辦法啦。可以選擇折返迎樂路,再前往幻想道、神奇道,甚至轉入海鳴路,大路邊其實可以再行入小路。


迪士尼碼頭

香港迪士尼樂園度假區
24hours

迪欣湖(Inspiration Lake)/ 迪欣湖活動中心

香港新界大嶼山望東坑、香港迪士尼樂園度假區
09:00-19:00

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook啦!
ΔPlease Like & Follow & Subscribe /
歡迎讚好、追蹤、訂閱

       

深水埗大南街咖啡店共享空間 設計藝廊真係值得睇?
【英國偽旅行】本地4個必去英式庭園 英國文學作品場景/海拔最高公園/法定古蹟遍佈港九新界
【美國偽旅行】穿越邁亞密探索海量棕櫚樹 港版千島群島景觀開揚 爽歎美式口味漢堡Comfort Food
【歐洲偽旅行】本地挪威式小花園/城堡打卡 歐式別墅前臨靜謐沙灘 無敵海景盡曬日光浴
青馬橋底睇日落!青衣西草灣賞景打卡秘地 細山步行徑近三支香談心好地方
【意大利偽旅行】穿越「東方威尼斯」 感受香港水鄉小島風情 兩大賞景地眺黃昏夕陽
錦田高埔村天空之城離市中心僅1公里 No Boundary姊妹店HOLA Chill住歎加料厚多士
【澳門偽旅行】迷你葡萄牙羅卡角海岬/倒模路環彩虹屋打卡 歎地道澳門豬扒包兼暢遊黑沙海灘
【泰國偽旅行】港島迷你泰式小屋打卡 海邊恍若峇里島度假 歎過江龍正宗船麵
驚現男團Mirror/Error主題月餅!中秋黃金月餅巡禮2021最完整名單!即睇港九新界連網店月餅預訂攻略!
【台灣偽旅行】遊走新界3大壁畫村 歎地道肉焿湯/台式牛肉麵
【日本偽旅行】全港5個本地「日式庭園」 秒到鳥居/神社/繪馬/動漫場景打卡
超隱秘!素肉骨茶湯底!荃灣巷弄素食車仔麵$50有找 24款純素/蛋奶素車仔餸任揀
消失的「萬壽無疆」? 旺角懷舊東方色彩工業風咖啡店五金味重
入場有限制!大埔慈山寺偽旅行驚現仿日本神社御手洗 必睇全球第2高巨型純白觀音像
瞰鋼線灣景色!穿梭山頂至薄扶林水塘尋港版《千與千尋》場景 新哥德式風格大學堂/伯大尼教堂打卡 薄扶林村都有秘地?