山頂公園+前港督山頂別墅守衛室+山頂食水配水庫+酒紅色山頂纜車第五代退役+文利小食店
兩個人影吓相,  兩個人醫吓肚,  和你Taste,  小食甜品,  港島,  神秘之地

型格酒紅色山頂纜車退役! 英式貴族風秘密花園野餐打卡 登上太平山真正最高點環瞰香港島

瀏覽次數:219
個人瀏覽過





早前,山頂纜車有限公司宣佈第五代山頂纜車會於今年6月28號正式退役,到時纜車服務會暫停6個月,而第六代纜車預計會於今年底至下年初開始服役。唔少攝影發燒友都專程走上山頂為第五代酒紅色登山纜車留倩影,今次編輯都趁機帶大家登上太平山遊覽山頂,走遍山頂最鮮為人知嘅影相位,帶埋大家從最佳位置於第5代山頂纜車前打個卡啦!

現時酒紅色山頂纜車上印有嘅並非廣告,而係由8位本地藝術家繪畫創作嘅限定告別新裝「山頂纜車藝術號」,意味第五代登山纜車已經進入倒數階段,內容包含文化、大自然、標誌性地標、電影主題。

山頂纜車由1888年啟用至今逾130年,絕對歷史悠久,飽歷風霜,為香港首條繩索鐵路,可連接中環花園道至太平山頂,目前全長近1.4公里,中環花園道僅高海拔28米,而山頂凌霄閣總站海拔高近400米。纜車由最先燃煤蒸氣渦爐推動變成採用電力推動,經鋼纜拉動纜車;從木製車廂演變為全金屬車廂;由載客30人到可容納120人;從70週年綠色車廂變成現時嘅全鋁製紅色酒紅色車廂。而山頂纜車向來都由英國、瑞士製造,據知第六代仍然會係瑞士製作,但未知第六代山頂纜車會係何等設計呢?

中段幾個纜車站、山路都比較狹窄,所以大多只係單軌模式,不過白加道站、梅道站則採用雙軌模式。而中段其他纜車站如堅尼地道站、麥當奴道站可取景拍攝,但編輯推介從白加道站、梅道站拍攝山頂纜車,景觀、構圖都比其他車站優勝,既可站台拍攝,亦可拍攝整架纜車。撇除上述提及嘅纜車站,其實重有一個寶雲道站,離麥當奴道站約100米,近馬己仙峽道石拱橋,只係已經於1985年停用,現時只可以見到月台、梯級痕跡。

太平山係全港最高山峰,有「東方之珠」之意,維多利亞女王(Victoria)更冠以象徵香港嘅三大地標之一。遊覽太平山,最舒服方法一定係環繞夏力道道、盧吉道而走,飽覽維多利亞港兩岸風景,雖然有412米高,但始終未係賞景最高點,本台編輯又點會介紹一啲咁普遍嘅景點呢?

編輯賣個關子,先帶大家從山頂廣場行到柯士甸山遊樂場,於歐陸式小花園、噴水池打卡,再沿路直上海拔高約506米嘅山頂公園,沿路兩旁都係高尚住宅區。山頂公園為全港島最高嘅公園,以英國19世紀維多利亞時代為主題,只需由山頂道轉上柯士甸山道,5分鐘到達柯士甸山遊樂場,再走10分鐘即達山頂公園。

遊覽山頂公園前,會經過一座藍白色小屋,面積唔多過500方呎,帶有幾分文藝復興風格,連旁邊象牙白色樓梯都充滿古典味,其實就係舊總督山頂別墅守衛室,因別墅曾經歷損毀、拆卸,只保留有守衛室,而守衛室更被列為香港法定古蹟。事實上,山頂公園於1867年原本係香港總督山頂別墅,為蘇格蘭風格大宅,有濃厚19世紀英國維多利亞式風格,公園只係別墅前嘅空地,但由於交通不便,30年代後就無港督居住,50年代先改建成山頂公園。

山頂公園採英式庭園風格設計,尤其係維多利亞風格嘅海藍色圓頂涼亭,既有貴族古典風格,亦有童話感。公園有有大花圃,亦有多塊無敵大草地,草地平坦,綠草如茵,方便戴頂草帽、舖上餐墊、帶上鬆餅小食去優雅地野餐,可算係本地一個秘密花園。



從山頂公園後面小樓梯拾級而上,可以去到一個大涼亭,內有觀景台,不單可近望西高山,亦可同時居高臨下俯視大嶼山、南丫島風車、薄扶林水塘,仰望山頂無線電站,更可眺望藍巴勒海峽,為觀賞日落景、夜景好地方。涼亭附近有同樂徑,可接回盧吉道、夏力徑,英文為Governor’s Walk,意指總督散步小徑。

山頂公園同附近太平山頂電波發射站一樣海拔高506米,而山頂涼亭位置則高約511米,而太平山高約552米,隔離西高山亦只係高約475米,今次就帶大家從可以輕鬆步行而至嘅最高點觀景,目的地係海拔高536米嘅山頂食水配水庫。

山頂食水配水庫建於1897年,屹今有124年歷史,外面為一小塊草地,據稱內部同深水埗主教山配水庫一樣有拱門設計,亦有紅磚,但就從來無公開圖片。從最高點觀景,絕對有君臨天下感覺,有如大地在我腳下,可環瞰全港島,景觀遼闊。


E.A.Tips :

(1) 上山頂可以於靠近香港公園嘅中環山頂纜車站,頭班車由07:00到尾班車為22:00,每15至20分鐘一班纜車,車程約10分鐘;或者於中環乘搭新巴巴士路線15號,每7至15分鐘一班車,於山頂纜車站落車,比纜車車費平逾一半,比較經濟;亦可以乘搭小巴路線1號,往返山頂至中環IFC。

(2) 自駕則可以駛上山頂,車程約10分鐘,但要注意停車位置,小量停車錶位。

(3) 由山頂廣場先轉入柯士甸山道僅需約5分鐘步程,然後繼續向上山方向走,約10分鐘會去到舊總督山頂別墅守衛室,5分鐘步程就會去到山頂公園,。

(4) 從山頂公園折返舊總督山頂別墅守衛室前面分岔路口,向另一個分岔路口繼續向上行,5分鐘步程可以直上山頂食水配水庫,先係山頂真正嘅最高點。

(5) 以山頂廣場為起點,可沿纜車旁邊小路落山,代替乘搭纜車,步行至白加道站僅需5分鐘,而由白加道站步行至梅道站則需約20分鐘,而由梅道站步行到麥當勞道站則約15分鐘,而步行到由麥當勞道站步行到堅尼地道站、Tram View Cafe只係約5分鐘,從Tram View Cafe步行落返中環花園道山頂纜車總站只係3分鐘。

(6) 從中環花園道山頂纜車總站折返中環天星碼頭,需要約20分鐘步程。

(7) 山頂為高尚住宅區,謹記保持安靜,同時自己垃圾自己帶走,尤其係去山頂公園野餐嘅人。

(8) 山頂纜車去程成人$37,回程$15,特惠車資為成人價錢一半;而長者更可於呢段期間以$10乘搭纜車登山,連同觀景台入場券優惠,重有送出限量紀念套裝等。


(9) 山頂食水配水庫高約536米,比隔離西高山更高,而山頂位置全無圍欄,而且平
地外就係懸崖,絕對要小心個人安全!

(10) 走到半山唔知食乜好?堅尼地道有一間屬同路人嘅文利小食店,可以稍作休息。


山頂公園

山頂柯士甸山道
24hours
2853 2605

山頂纜車站

香港中環花園道33號

舊總督山頂別墅守衛室

山頂
24hours

山頂食水配水庫

山頂
24hours

文利

半山堅尼地道6號
08:00 – 18:00
2522 2617

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


免加2蚊!太子親民居食屋靠近雷生春 日式料理丼飯套餐外賣抵過堂食
流浮山海鮮街酒家林立藏殖民時代皇冠郵筒 海味場旁眺后海灣日落觀60年歷史神秘建築物
【野餐隨行】九龍城人氣泰國菜皮蛋炸蝦餅x潮州粉麵上等牛坑腩 賈炳達道公園野餐大玩Crossover
西貢外賣限定英式炸魚薯條專門店 最高人氣係邊款小食?
經偽鳥居登長洲最高點北眺亭 關公忠義亭附近躲藏超隱秘殖民時代懷舊T形街牌/皇冠郵筒
【野餐隨行】牛頭角消失的後山?鱷魚山81米高隱蔽小公園眺海景 歎近50年老牌上海菜館米芝蓮正宗滬菜
後生仔主理!旺角女人街$50海南雞飯 4款口味有咩揀?
【野餐隨行】元朗人氣壽司丼飯店係驚喜定驚嚇?公園大草地野餐望姆明小屋百鳥塔
旺角點心專門店外賣自取!$56一個人點心拼盤唔使怕選擇現分歧
娛苑起步!142級樓梯登元朗後山豬黃嶺 超矮標高柱眺望雞公嶺淋坑山
樂富唯二!茶餐廳中伏食物多?尋隱藏三和砵仔蒸飯水準不俗
東梅古道起步登昂坪救援徑現代棧道 一隅400米高近距離下瞰香港赤臘角機場宛如觀景台
【野餐隨行】天水圍新北江商場消暑刀削麵 實試公園湖邊草地旁用餐到底有咩問題?
離潮流特區僅3分鐘步程!旺角砵蘭街越南河內料理必食牛柳粉 牛湯濃郁菜式地道
【土瓜灣半日遊】前馬頭圍大廈朝聖193 Cafe!香港花見小路/日系粉紅橋打卡 牛棚藝術公園探索牲口棚遺跡【野餐隨行】
免搭船!穿梭大橋徒步過海往返香港仔鴨脷洲 360度探視珍寶海鮮舫最後景象