[sig_post_pv label=””] 個人瀏覽過
香港咖啡店愈開愈多，競爭力愈來愈大，無乜特色都難以生存，近一年於上環、旺角皆有分店嘅半路咖啡，就以舊香港為主題，據悉最特別之處係印有「萬壽無疆」嘅中式陶瓷杯、紙杯，不過「萬壽無疆」杯原來只限上環店，旺角店並無呢種中式「萬壽無疆」設計咖啡杯。
半路咖啡室內裝潢貫徹香港懷舊風格，玻璃門旁邊座位似舊式剪髮舖，室內則較重工業風格，水泥牆配木傢俬，加上牆身掛有鐵絲網，可能受附近店舖影響，整體帶有五金味道，似巷弄中嘅咖啡店。
小店開業後最令人有印象嘅地方係店舖中央牆身掛有「堅強貿易行」牌匾，白底紅字尤其搶眼，其實為上手牌匾，現時變為裝飾品。加上非常有特色嘅70至80年代「萬壽無疆」杯，配合咖啡有中西合璧感覺，難怪唔少人都慕名去打卡。
如果咁樣飲咖啡，的確有「倒潮流」感覺，可惜「萬壽無疆」杯原來只限上環店先有，旺角店只有中式印花陶瓷杯，雖然同樣有地道風味，但難免稍有失望。
咖啡款式有黑咖啡、白咖啡，如一杯Flat White $38，奶泡較薄，比Latte細滑，咖啡味稍濃，有回甘味。以中方色彩為主嘅印花陶瓷杯盛載意式咖啡，令咖啡略帶復古風，更顯獨特東方韻味。
另外，亦有茶類、鮮奶類可擇，玻璃門上寫有輕食選擇，而落地玻璃窗上雖然貼有幾塊發泡膠，似足街市賣水果，如土耳其金桃、牛油果、富士蘋果、意大利青瓜、甜菠蘿等，但其實只係裝飾品之一。
E.A.Tips﹕
(1) 雖然叫旺角店，但位置比較靠近大角嘴，於香港旺角希爾頓花園酒店隔離。
(2) 小店沒加一服務費，但不准攜帶外來食品，每人最低消費一杯飲品。
(3) 先飲啡，後俾錢。
(4) 一般咖啡價錢透明度高，但輕食透明度比較低，並無寫低任何價錢，編輯望望隔離枱一份蛋糕之類約$40。
(5) 咖啡除咗牛奶，亦可按個人口味選擇燕夢奶。
(6) 「萬壽無疆」杯於上環店先有，原來旺角店只有中式印花杯。
(7) 店員非常細心，會將咖啡杯耳仔方向轉向客人右邊，方便大家飲咖啡。
半路咖啡
旺角豉油街6號地舖 
09:00 – 18:00 
2606 1160
