[sig_post_pv label=””] 個人瀏覽過
越南胡志明市有一座粉紅教堂，非常夢幻，充滿少女心，教堂於市中心內鶴立雞群，向來係人氣景點，唔少人都會專程前往打卡，不過目前拍拖兩個人未能出國，短時間內要搭飛機去旅行，幾乎係無可能嘅事。而事實上，香港鬧市內都隱藏一座粉紅教堂，離尖沙嘴海旁只係15分鐘步程，可算係中隱隱於市。
越南粉紅教堂叫耶穌聖心堂，而座落尖沙嘴嘅夢幻粉紅教堂則叫天主教玫瑰堂，似足迷你版耶穌聖心堂，係市中心時尚購物區內一個神秘粉紅打卡點。
尖沙嘴天主教玫瑰堂於1905年正式落成，有逾百年歷史，為九龍區歷史最悠久嘅天主教堂，由天主教香港教區管理，整個教堂空間唔算大。教堂以粉紅、白色為主調，採哥德式建築設計，以羅馬公共會堂為藍本，目前被列為香港一級歷史建築。
教堂旁邊有一個小型噴泉，狀似迷你花園，而從側門走入教堂，會發現教堂樓底特高，相當簡潔，窗戶透光，有彩繪玻璃窗，中廊則呈拉丁十字形，前端可見祭台，中央有聖洗池，導向半圓形聖所，代表生命經死亡得永生。
媲美越南粉紅教堂嘅天主教玫瑰堂，尖塔狀似童話城堡，滿滿古典美，小教堂有別於中環平常見到嘅歐洲式嘅華麗大教堂，陽光猛烈時配上藍天白雲，異常浪漫，環境清幽，令人放鬆身心。
E.A.Tips :
(1) 位置於尖沙嘴漆咸道南，大概於漆咸道南、柯士甸道交界，正對香港歷史博物館，轉個彎至柯士甸道可見著名女子中學嘉諾撒聖瑪利書院，離香港理工大學亦只有5分鐘步程。
(2) 謹記保持安靜，唔好騷擾前往禮拜嘅教友。
(3) 從左邊拍攝可同時拍攝藍天白雲，唔會影到樓，而從右邊拍攝就會影到樓。
(4) 必須留意開放時間，同時唔好星期日去。
(5) 教堂可以舉行婚禮，但禁止商業用途攝影。
(6) 教堂內有小商店，內有天主教相關書籍、產品。
天主教玫瑰堂/九龍玫瑰堂
尖沙嘴漆咸道南125號
約07:00 – 17:45
2368 0980
