在家居酒屋

大圍全新日式居酒屋主打串燒丼飯 $88即食本地罕見味噌牛腸鍋

[sig_post_pv label=””] 個人瀏覽過





飲食業雖然仍處於低潮,但都有唔少餐廳於疫市開業,匿藏於大圍村屋內就有一間上年尾開業嘅日式居酒屋,以串燒、丼飯為主,人氣招牌菜係非常講究、似加料親子丼嘅旋風滑蛋丼,除此之外重有咩特別?事實上,餐牌有唔少選擇,未必要跟隨大方向而選擇,編輯認為比較特別嘅反而係本地食肆少見嘅日式牛腸鍋。

據悉,小店由上年12月尾起開業,位置上稍為偏遠,由大圍市中心起步,要步行約20分鐘先可以到達,乘搭巴士會比較方便。最後轉上小路就會見到一間以灰調水泥風設計嘅居酒屋,裝潢簡潔,狀甚型格,外面有壁畫,出面有幾個戶外茶座,室內亦有正常餐廳座位,小店內大多係年輕人,而客人則似附近街坊多於街外人,其實室內環境雅緻,亦略有氣氛,適合拍拖情侶兩個人用餐或三五知己聚會。

丼飯係其中一款主打菜式,上枱材料同色彩分佈平均,滿碗魚生刺身,顏色亦吸睛。以松露油甘魚海膽丼$148 為例,兩片海膽、一堆松露、三片油甘魚,橙黃色調海膽甘甜細膩,略有Creamy感覺,入口即溶;油甘魚唔算薄切,油花平均,魚肉滑嫩,較清甜;而松露略有菌香,相對比較重味,充滿鹹味,加上份量充足,適宜撈飯。口痕加兩件三文魚壽司$32,三文魚近腩位,夠新鮮,軟嫩而有油香。



從日本福岡品嚐過當地牛腸鍋後,編輯先發現原來牛腸鍋係一種有驚喜嘅食品,不過香港則比較難搵到牛腸鍋。原來呢間新開嘅小店都有一款秘製日式味噌牛腸鍋$88,熱辣辣上枱,可暖身,湯底似為白味噌,比較淡身,容易入口,唔會太鹹。一鍋牛腸鍋甚豐富,既有牛腸,亦內藏粗身粉絲,配料則有娃娃菜、金菇、冬菇、京蔥等,可以止吓旅行癮。

不過,如果硬同日本當地嘅牛腸鍋比較,就有欠公平,因為日本牛腸鍋雪白而香濃撲鼻,肥美而唔膩,有陣陣濃郁肥牛香,呢間小店牛腸份量充足,湯底亦不俗,唯獨欠嘅就係嗰種肥牛香味,估計係食材上有啲唔同,相信小店要更上一層樓就要再調校吓味道。

飲品有一款叫在家特色水果伯爵紅茶$22/杯,果味唔太重,紅茶味帶微甘,果味唔係死甜感覺,只係一杯價錢比較高。


E.A.Tips﹕

(1) 由大圍站公共運輸交匯處起步,上天橋往田心村方向,落橋會見到紅梅谷路遊樂場,穿過遊樂場同田心村,會到達雲疊花園商場、田心街,對面係隆亨邨,於保良局朱敬文中學、保良局王賜豪(田心谷)小學中間小路穿插,穿過屋邨小路到達路德會愛心幼稚園,沿路直出返富健街,對面會見到田心消防局,轉入大圍顯徑街,對面係田心救護站,左面下徑口村就係目的地,唔需要走入村內,上去就會見到在家居酒屋。

(2) 倘若唔小心行咗入村,就搵另一間良心店肆年八月米線,然後直行轉右出返大路,轉右就會見到在家居酒屋。

(3) 乘搭小巴68K, 68S 可以直達隆亨邨善心樓,靠近富健街公廁,向田心消防局行,轉入顯徑街就得。

(4) 午餐Menu會比較抵食,編輯睇完餐牌,食完埋單先發現黑板有更抵食嘅套餐,蝕咗,眼見套餐由$68至$108都有,午餐無加一。


在家居酒屋

大圍下徑口村154號地舖
11:30 – 15:00;18:00 – 22:00
2646 3668

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!