[sig_post_pv label=””] 個人瀏覽過
銅鑼灣麻王受唔少麻辣迷歡迎，往往大排長龍，想堂食都難以入場，最近北角炮台山就已經開分店，雖然座位同樣唔多 (只得兩個)，但相對銅鑼灣比較少人，大可以坐低堂食，等候時間亦比較短，拍拖兩個人坐低食亦可。
平時食酸菜魚或水煮魚，埋單都要3位數字，銅鑼灣起家嘅麻王係一間麻辣專門店，一碗一人份量嘅酸菜魚或水煮魚賣$68，價錢的確幾相宜，另有湯麵麻辣燙，重有麻辣鴨血、麻辣蜂巢豆腐等小食可擇。
招牌酸菜魚配白飯$68 賣相吸睛，表面舖有香蔥、魚片，比較薄身，但滑嫩無骨，魚片之下係大量配菜，除咗比較明顯嘅酸菜醬味、黃綠色調嘅酸菜，亦包含爽口嘅海帶絲、娃娃菜、脆口嘅厚切蓮藕、芽菜、津白、雪菜等，比起魚片係海量式墊底，配菜可吸收湯汁精華。湯底酸味中帶微辣，幾開胃，少辣更容易入口，湯底似加入上湯，比純用水明顯較濃味。
而招牌水煮魚配白飯$68 全碗紅噹噹，遍佈鮮紅色乾辣椒、辣椒粉，比酸菜魚更重口味，麻辣味充足，滿口麻辣鮮香感，麻中帶辣，麻味有餘韻，愛麻辣者大可挑戰吓，但感覺辣椒粉味、麻粉味溝埋比較多。魚片同樣份量唔多，只有薄薄幾片舖於表面，以海量配菜墊底，基本同酸菜魚嘅配菜大同小異。
延伸閱讀﹕秒遊京都！ 炮台山配水庫旁秘藏日式公園 30分鐘直上紅香爐峰山頂
E.A.Tips﹕
(1) 由北角城中心行過去，經過油街實現、AIA大樓，步行到店舖只係3分鐘腳程。
(2) 其實魚片份量唔多，大多係墊底菜，但湯汁的確濃味豐厚，另一建議食法係買酸菜魚或水煮魚一份，然後返去自己加魚片，可以係街市魚片或即食魚片，放入煲內再煮，拍拖兩個人食既可有原汁原味辣湯，亦會更化算。
(3) 座位靠近街邊，最好快食。
(4) 如果想食大量魚片嘅酸菜魚，建議去粉嶺琭玥玖堂食，但如果純想要酸菜魚或水煮魚湯汁，就可以喺麻王買。
麻王
天后炮台山宏安道2-12號宏輝大廈地下6號舖 
6633 2603
麻王
銅鑼灣禮頓道106-126號禮信大廈地下4號舖 12:00 – 21:00
6636 9935
麻王
灣仔灣仔道177號保和大廈地下H鋪 12:00 – 21:00
9298 6557
在〈平食重口味酸菜魚/水煮魚 麻王北角開分店 唔使再逼去老銅！〉中有 1 則留言
留言功能已關閉。