太子泰國菜餐廳惹味鹽燒烏頭魚 搶眼芳華絕代霓虹燈飾
兩個人醫吓肚,  和你Taste,  東南亞菜

太子泰國菜餐廳惹味鹽燒烏頭魚 搶眼芳華絕代霓虹燈飾





位於太子轉角位嘅餐廳,以芳華絕代命名,諗起嘅只係懷舊嘢,甚至已故歌手梅艷芳嘅經典歌曲,編輯實在完全聯想唔到竟然係同泰國菜有關!

餐廳由酒吧餐廳轉為以泰國美食為主,前身係三十六酒店,即酒店36,該酒店足足有50年歷史,餐廳保留其灰色牆身,室內外設計亦比較懷舊,充滿Vintage感,旁邊更有大玻璃透視陽光或鬧市景。另外,室內樓高兩層,佈滿霓虹燈裝飾,唔少少女都會喺發光燈牌前面打卡,一個個燈牌寫有「芳華絕代」、「風月」、「嚴禁吸煙」,不過編輯覺得霓虹燈牌其實無乜美感,反而加速製造光污染。

據聞招牌菜有鹽燒烏頭魚、黃咖喱醬炒軟殼蟹、肉碎生菜包、泰式香葉肉碎煎蛋飯等,而一份單人套餐要$138、拍拖兩個人去食雙人套餐要$338,雙人套餐包含小食、湯、2款主菜、2杯飲品,另可加甜品。

小食拼盤包含蝦餅、雞卷丸、素菜春卷、雞翼,各2件,重泰式風味,簡稱重味,炸物帶辛辣味,加上酸甜味嘅泰式辣醬更香口。炸蝦餅夠爽口,但每粒比較細小,份量偏少;炸雞卷丸微鹹、質感彈牙,略有香茅味;素菜春卷則為脆炸嘅素食,春卷皮比較厚,唔夠脆;而脆炸雞翼表面有層炸漿製嘅脆皮,雞肉似乎以辣粉醃製過,帶有辛辣味。而正宗冬蔭公湯內含一般湯料,蝦肉唔見,菇類等配菜就有,味道不過不失。

一款主菜可揀泰式去骨海南雞飯或+$38 鹽燒烏頭魚,需要等待比較長時間,但即叫即燒,魚皮脆卜卜,魚肉嫩滑,算幾大條,啖啖肉,唔多骨,而魚皮表面灑有粗鹽,比較鹹。另一款主菜有泰式鮮蝦炒金邊粉、泰式香葉肉碎煎蛋飯、炭燒豬頸肉飯、炭燒雞扒飯、青咖哩、馬沙文咖哩、泰式菠蘿炒飯或滷水豬髀飯,當中泰式菠蘿炒飯雖然炒得均勻,唔油膩,但略嫌香口,肉鬆份量適中,但菠蘿肉偏少,而且偏酸,比較遜色。

單點一客炭燒豬頸肉配糯米飯$88,份量唔多,糯米飯比較硬,反觀豬頸肉經炭烤後香口,甚至有木炭香、香茅味,肉質軟嫩,為半肥瘦質感,豬油唔多,啖啖肉,蘸上帶有輕微酸甜味嘅醬汁更惹味。

珍多冰+$10 略有椰汁味,只係比較稀,水份多,內含大量綠色粉條,煙韌有咬口;荔枝菠蘿梳打+$10 適合夏天飲用,清爽又解渴;至於紫薯鮮奶$34 就係重甜之選,奶味、甜味唔太平衡,紫薯味嘅薯香有待加強。

泰國必食嘅甜品要選芒果糯米飯,今次+$58嘅芒果糯米飯有半個芒果,挑選熟透芒果,甜度適中,糯米飯則有雙色,以綠色拼藍色,綠色帶班蘭香,藍色就係蝶豆花味,糯米飯熱辣辣,入口黏口而煙韌,比鹹點炭燒豬頸肉嘅糯米飯明顯軟身,加上脆米、芒果粒粒更有層次。

延伸閱讀﹕Cafe Paradise超抵石燒牛 100蚊樓下有交易


E.A.Tips﹕

(1) 由始創中心步行到界限街與砵蘭街交界,腳程約8分鐘。

(2) 晚餐價錢需要加一服務費。

(3) 如果係3至4人,建議叫二人套餐再另加小食、飲品,計計邊款飲品貴啲嘅,可以加入套餐,平啲嘅散叫,泰式飲品一般加$8至$10,散叫就貴啲。

(4) 洗手間設於樓上位置。


(5) 食物可揀辣、唔辣或素食。

(6) 泰式糕點2件套餐+$18,但單點只係$12。


芳華絕代

旺角界限街36號1-2樓
星期一至五 12:00 – 20:30;星期六至日 09:00 – 20:30;公眾假期及公眾假期前夕 12:00 – 20:30
2366 2113

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


鄰近車公廟!沙田大圍廢校轉化綠色空間 環保博物館將藝術融入生活
全港3間分店!復古裝潢還原屋邨走廊賣懷舊點心 老馮茶居不如用一款點心單飛?
藜麥紅白米飯配滋補燉湯 大角嘴$48健康港式便當
荃灣清靜秘密花園 大會堂劇院咖啡店歎下午茶
大角嘴街坊刺身壽司專門店 丼飯全日供應最平$40
元朗錦田路邊大排檔毗連公園街市 超高水準街坊醉雞麵/海南雞飯回頭率高
荃灣人氣新式大排檔旗艦店 與時並進改良舊餸菜吸斯文客人?
石崗軍營賞楓!雷公田起步遊200年歷史甲龍古道 直搗川龍家樂徑眺青馬/昂船洲大橋【秋季紅葉2021】
大角嘴高水準台式手工芋圓店月底將結業 滿$100送2件芒果糯米糍
【年糕巡禮2022】新年最黃賀年糕點完整名單!近50間港九新界實體店連網店年糕蘿蔔糕即刻預訂!
野餐隨行【大嶼山及離島篇】有View有草地!全港100個近鬧市近食肆安心野餐點 梗有一個喺左近!
野餐隨行【港島篇】有View有草地!全港100個近鬧市近食肆安心野餐點 梗有一個喺左近!
野餐隨行【新界篇】有View有草地!全港100個近鬧市近食肆安心野餐點 梗有一個喺左近!
野餐隨行【九龍篇】有View有草地!全港100個近鬧市近食肆安心野餐點 梗有一個喺左近!
荔枝角程班長台灣美食宣佈即將結業 台灣味牛肉麵營業至3月!
露營地全禁?赤徑藏荒廢小教堂!西貢東100%瀝青路穿越鹹田灣+西灣沙灘