2021-05-17

東涌馬灣新村咖啡店飲薑汁Latte 見字飲啡濃而有新意

啡濃

73 個人瀏覽過





東涌區內良心小店唔多,最近馬灣新村就有一間被稱作新開業嘅咖啡店,同前身咖啡店無太大分別,只係店舖名有異,店員比之前年輕,內含唔少近期潮語,可見比前身趨向年輕化,的確可以拍拖兩個人去食個飯、飲杯咖啡。

據稱,店內咖啡豆由Mad Coffee Roaster提供,都係自家烘焙手沖咖啡豆,室內幾個潮語如「見字飲啡」、「我真係好撚鍾意沖啡」、「阿姨我不想努力了」,都係近期網民嘅常用語句,變得年輕化,唔通小店已經易手?

不過,店內仍然係附近村民飯堂,無論早餐、午餐,款式都係4至5款可擇,當中有啡濃咖哩牛腩飯$65,牛腩有嫩有韌,薯仔、紅蘿蔔等配菜比較出色,咖哩汁比較稀,咖哩味稍淡,唔夠濃味,撈飯欠缺咖哩味。反而豆醬四季豆炒豬柳$58就稍有驚喜,屬是日精選特餐,送蒜蓉炒時菜,白飯份量充足,雖然四季豆無味道,但豬柳幾軟稔,有豆醬香。

     

凍檸茶不過不失,而比較特別嘅係自家製薑汁鮮奶咖啡,跟餐加$18,薑汁Latte有凍有熱,奶泡下藏有啖啖薑味,咖啡平平,唔算高水準,但咖啡內含唔少薑粒,咖啡雖削胃,加入薑末則可暖胃,既中和一下,又有新鮮感。薑汁Latte攤一段時間後,表面會有突起狀,其實係薑粒浮面,部份薑粒沉底,帶有薑味。

延伸閱讀﹕東涌鄉村藏小店 歎All Day Breakfast飲咖啡

延伸閱讀﹕更快到起點方法! 快閃大嶼山路線東梅古道 輕鬆由東涌行到梅窩睇銀礦灣瀑布

延伸閱讀﹕遊東涌寺廟群山上靜土 石門甲行1小時直上昂坪營地 仰望人氣木刻群心經簡林


E.A.Tips﹕

(1) 啡濃前身正正係咖啡窩,位置一樣,裝潢無變。

(2) 門口有一個偌大停車場,停車格為咪錶位,需要入錶,揸車比搭巴士更方便。

(3) 戶外茶座為可吸煙位,室內有一個高枱櫈座位,比較Chill。

(4) 每日朝早07:15至11:15為早餐時段,想平啲就要留意時間,但一到11:15即會轉為供應午餐,11:15至11:30需要等待11:30午餐時段,而14:30又到下午茶時段。

(5) 小店位於馬灣新村內,靠近北大嶼山醫院、逸東邨、東涌炮台。


啡濃

東涌馬灣新村10號地舖
星期一全日休息;星期二至日 07:30 – 18:00
2960 0303

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ Please Like & Follow & Subscribe /
歡迎讚好、追蹤、訂閱