值得Encore 日式全蝦宴

灣仔拉麵值得Encore 歎日式全蝦宴



大門之前小編因為黃店食過一次,encore食多次,今次兩個人再食就係全蝦宴!

大門有幾間分店,灣仔店呢間緣屋限定店嚟,都係揀緣屋札幌元祖蝦湯拉麵,蝦濃湯底都有幾款口味揀,味噌、醬油、鹽味、辣味、焦香醬油、火炙味噌、味噌叉燒,有2人餐同1人餐,2人餐就多咗沙律同多幾款小食揀,價錢睇一個$268,另一個$118,都要加一,小編廢事揀咁多嘢就揀咗2個1人餐算,有拉麵、小食、飲品,拍拖食份量充足,都好足夠。

味噌蝦濃湯拉麵
呢碗鹹味稍重,適合比較重口味嘅人,好多櫻花蝦喺面,仲有隻原味味玉嘅溏心蛋,塊叉燒嘅豚肉都算厚切,同較瘦唔係好薄切呃秤嗰種,湯底味道蝦味好濃,味噌令湯變得更厚。拉麵麵質一個叫咗正常,一個叫咗偏硬,麵質都算彈牙同掛湯,未算好Top,但總算過到合格線喺香港做到中上算係咁。

醬油蝦濃湯拉麵
呢碗味道較簡單,無味噌咁重味,唔鍾意鹹可試呢碗,一樣有櫻花蝦溏心蛋厚切唔算薄切嘅叉燒豚肉,一樣較瘦,小編就比較鍾意呢款湯底,都係蝦濃湯,但無咗味噌就無咁重味,仲有少少麻油香咁。

乳酪蝦多士
蝦多士、乳酪好特別,似乎將蝦打成蝦膠放落多士度,多士只輕輕炸過,唔算太油膩,加上軟滑蝦膠,上面舖上少少乳酪,乳酪酸甜味令人開胃,亦可減底油炸嘅肥膩感。

炸日本赤蝦
炸蝦特別推介!皮脆、蝦肉嫩,蝦殼都食得,有啲似食軟殼蟹,今次變成軟殼蝦,蝦肉雖經油炸,但質感仍然爽口彈牙,炸過嘅蝦肉口感層次豐富。

唐揚炸雞
一樣係炸物嚟,不過炸雞度度都有就無咩太大特別,只係炸粉唔厚,少少脆就,入面雞肉都算軟嫩,只係無咩特別。

值得一提係如果好似小編咁食得慢,可以先拎起隻溏心蛋,否則隻蛋浸太耐喺熱湯會愈嚟愈熟,無咗溏心感。

檸檬柚子蜜
食完炸嘢飲返杯熱飲潤返好啲,平時有啲地方飲柚子蜜通常要加錢,今次包埋,柚子蜜可去除剛才炸物嘅油膩感,而且滋潤返無咁熱氣,加上呢排天氣轉涼,飲返柚子蜜潤吓喉嚨都好。

大門食堂
地址﹕灣仔軒尼詩道8-12號中港大廈地下C號舖
營業時間﹕星期一至五 11:00 – 22:30;星期六至日 12:00 – 21:00
電話﹕2523 7710

延伸閱讀﹕灣仔有銀針粉嘅車仔麵 必食炸燒賣

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!