每年本地櫻花綻放，都會吸引一眾市民同攝影發燒友前往賞花同打卡，最近太和農墟亦一棵櫻花盛開，櫻花樹滿滿粉紅色花朵，現時非常茂盛，色調浪漫，最啱情侶拍拖兩個人賞櫻。
雖然日本櫻花最靚，但武漢肺炎持續整整一年都仍未完全控制，本地人旅行嘅機會都被剝削，唯有繼續留喺香港睇櫻花啦！未必只有公園先有櫻花嘅，近日太和農墟就有一棵粉紅櫻花燦爛盛開，為鐘花櫻桃，開花期為2月下旬至3月。
據臺灣植物誌指出，鐘花櫻桃又名山櫻花，屬台灣品種，英文名亦叫Taiwan Cherry，高3至8米，花瓣呈粉紅色，五瓣合一，下凹，為倒卵狀長圓形，花蕊則為桃紅色，原生長於山谷林中、林緣。現時，緋紅花朵鮮艷奪目，一朵又一朵綿密櫻花掛於樹上極壯觀！
太和呢棵櫻花只有一棵，但圍觀嘅群眾唔少，大多都係手揸長鏡頭嘅叔叔嬸嬸，大概係天氣日漸和暖，大家亦被閉關太耐，想趁賞花期出嚟影吓相啩。
E.A.Tips :
(1) 櫻花位置並非於太和農墟正門，而係後門，靠近進發停車場。
(2) 影相還影相，謹記保持安靜，附近都係住宅地，大多係該區居民。
(3) 唔好遺留任何垃圾，記得自己垃圾要自己帶走
(4) 櫻花期一般只得一至兩個星期，要注意櫻花花期，唔好太遲去啦！
大埔農墟
太和邨大埔太和路12號 
星期一至六休息、星期日 09:00–17:00 
2471 1169
