[sig_post_pv label=””] 個人瀏覽過
本地唔少山路都已變成熱門景點，城市中要搵鮮見人嘅地方避疫都唔係易事，今次帶大家去大草地野餐、睇日落，位置偏僻，少見人群，絕對係兩個人好去處。
提到西環，一般人都會去西環碼頭、西環泳棚影吓相，近期唔少人都會去近數碼港嘅瀑布灣、沙灣徑，其實摩星嶺亦有好地方。除咗摩星嶺炮台，2013年啟用嘅摩星嶺配水庫休憩花園更加係野餐、賞景嘅秘密花園，清涼天氣下，於大片青蔥草地散步，又或開個帳幕野餐，Hea吓、放空吓都係一個好好嘅拍拖活動，而大草地中央更有一間小白屋，可以打卡呢！相對幾近營貼營嘅佐敦谷公園、西九文化區、啟德跑道公園，摩星嶺配水庫休憩花園人流疏落，目前簡直係天堂一般嘅絕佳假日野餐點。
沿斜坡而上的確係稍花體力，不過遍佈樹蔭，無需要汗流浹背，去到頂端亦只不過係10至20mins步程，摩星嶺配水庫休憩花園草地面積寬廣，但人流甚少，環境舒適，大草地約有2個足球場般大。加上位置近摩星嶺南方半山腰，景觀遼闊，背山面海，既可仰望西高山，俯首沙灣、數碼港、港島西、西博寮海峽無敵大海景，亦可清晰眺望南丫島三支煙囪、坪洲、長洲。
黃昏時份，金黃色夕陽光線灑落草地上，頓感和暖，微風輕吹，令野餐亦倍添秋意，天朗氣清時，藍天白雲下風景更優美，適合短線郊遊兼鍾意輕鬆行山嘅朋友。晚間時份，亦可以相約另一半到大草地上數星星，呼吸新鮮空氣之餘，亦會更浪漫呢！
野餐後，趁太陽未落山，可折返摩星嶺徑，直落約300級樓梯到海旁嘅日落觀瀾亭，顧名思義可近距離觀賞日落晚霞，亦可賞廣闊嘅港島海景，海天一色時景觀更優美。位置於芝加哥大學香港校園，旁邊不單有日落觀瀾亭，校園內亦有一個曾經歷二戰嘅銀禧炮台。
芝加哥大學香港校園係一個古蹟校園，原為域多利道扣押中心，即50年代末嘅港英警務處政治部，用作收集情報、打擊間諜活動，同時俗稱為「白屋」。現時表面望落係一間波浪形設計嘅玻璃屋，但內裏其實保留軍事遺跡，亦有展板介紹，包括英軍於二戰時用作防禦用途嘅銀禧炮台遺址。銀禧炮台即Jubilee Battery，直譯為租庇利炮台，取自域多利道舊名域多利慶典道。炮台於1939年落成，有3個炮床，以防日軍，炮台曾經歷香港保衛戰、第二次世界大戰，最終改建為域多利道扣押中心「白屋」。及後「白屋」於2018年活化，變成美國著名學府芝加哥大學香港分校校舍，保留歷史文物古蹟。
從2004年啟用嘅域多利道日落觀瀾亭指示牌走落長長石梯，涼亭臨海而建，除咗日落靚景，亦可以邊走邊觀賞天色變化，尤其夕陽落山時可觀賞日夜交替一刻，落到底更可以走到石灘睇睇，賞日落或影吓相都可為一日遊作結。相對西環碼頭或西環泳棚，呢邊拍攝鹹蛋黃會比較少人呢！
E.A.Tips :
(1) 部份人會教從堅尼地城臨時遊樂場嗰邊去，但其實最簡單直接嘅方法係於金鐘、灣仔或中環乘搭1號巴士到摩星嶺總站落車，車站對面係芝加哥大學香港校園；又或者於堅尼地城乘搭小巴58號，亦可於摩星嶺道巴士站落車，然後轉入摩星嶺徑上山。
(2) 沿摩星嶺徑斜路上山，約步行10至20mins可到達摩星嶺配水庫休憩花園，上到頂後向右邊行到尾可以去到入口。
(3) 摩星嶺配水庫休憩花園白屋附近有Security看守，而垃圾桶就靠近入口處，最好都係自己垃圾自己帶走啦。
(4) 上得休憩花園都係想得到片刻寧靜，謹記玩還玩、影相還影相，唔好大聲喧嘩騷擾其他人。
(5) 沿摩星嶺徑直行到底，橫過馬路後，沿芝加哥大學香港校園旁邊樓梯走，行約5mins可以到達日落觀瀾亭。
(6) 通往日落觀瀾亭嘅樓梯，中段有一段小分岔路，可直通芝加哥大學香港校園內嘅銀禧炮台，另可於正門進入校園範圍，通往炮台嘅小路靠近觀景台右邊。
(7) 芝加哥大學香港校園其實只係離西環泳棚入口10mins腳程，而離沙灣泳棚亦只係5至10mins腳程，處處皆風景，無必要排隊或同其他人爭位影相嘅。
(8) 摩星嶺配水庫休憩花園不足之處係無洗手間，所以最好上山前或落山後先去洗手間，如若野餐，就避免飲用太多水。
(9) 日落觀瀾亭石梯基本上無街燈，只有芝加哥大學香港校園嘅少量燈光，所以都係唔好太夜走啦，或者自備頭燈。
摩星嶺配水庫臨時花園
半山摩星嶺徑 
06:00–19:00 
2853 2575
日落觀瀾亭 Jubilee Battery Pavilion
摩星嶺域多利道 24hours 2189 2819
銀禧炮台（Jubilee Battery）ｌ號
摩星嶺域多利道180號白屋芝加哥大學香港校園 24hours
