木人巷

天水圍冷清商場搵食 木人巷藏手打牛堡雞堡



天水圍以新北江商場較多優質美食點,其實區內都有唔少美食點,相對有啲隔涉,例如屏欣商場,人流極少,據記者觀察所得,堂食唔多,大多做外賣生意。有連登網民曾推介屏欣鮮匯站當中嘅屏欣仔傾下計、木人巷,前者已經結業,所以今次兩個人就去後者睇睇。

木人巷原指少林寺秘地,為滿佈兩大排木人嘅小巷,機關重重,木人會向路過者發動攻擊,屬最後試煉。商場內水靜鵝飛,少見人影,超靜嘅屏欣商場,似乎係天水圍區內一個試煉地方,選址此處難度自然增加。

Classic 經典漢堡(牛)$48 以錫紙包實,漢堡包厚身,牛肉、生菜、蕃茄都新鮮,難得係漢堡扒為手打製作,有咬口,有肉汁,的確係幾有水準,略嫌漢堡扒以手壓得唔夠實,再有厚實感會更好。麵包表皮微脆,有少量牛油香同芝麻香,幾厚吓,漢堡包內有醬汁,貌似BBQ醬味道,更有些微洋蔥碎。

至於木人巷Deluxe 雞堡(雞)$68,同樣以錫紙包裹,比經典漢堡更厚身,餡料由牛肉漢堡變成雞肉漢堡。雞堡內有雞扒之餘,亦有大塊菠蘿、煙肉,同樣有生菜、洋蔥碎,最特別係雞肉都係手打狀,雞堡同牛堡一樣,雞肉打成蓉,稔滑易入口,但不失咬感。雞堡以菠蘿取代牛堡嘅蕃茄,菠蘿相對難一啖完整咬開,但配搭雞肉亦有解膩感覺。雞堡唯一問題只係內餡太重胡椒味,蓋過本身雞堡香味。

本身加$15有田園沙律朱古力草莓奶,但無沙律,加$10叫咗一杯草莓奶。草莓奶唔太甜,奶味重,入口香滑,拍拖飲一杯尚且可解雞牛帶出嘅膩感。


E.A.Tips﹕


(1)巴士路線269D,276C,276P、小巴路線33,34,34A,35,621都可達港鐵天水圍站,巴士路線33,35,53,276則可到達附近上璋圍,可步行到屏欣商場。

(2)位置上其實只係聚星樓、屏山文物徑、上璋圍對面,約5分鐘腳程。

(3)餐廳老闆二人即時炮製,等候時間比較長,需要耐性。


延伸閱讀﹕天水圍超高質小店做到無停手 鰻魚炒飯勁有鑊氣

木人巷

天水圍屏山屏廈路65號屏欣商場鮮匯站·屏欣地下MK10號舖

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!