【區區有小店】實試將軍澳日日食3間小店 全港CP值最高Food Court （上）

 

已結業

 

今年6月，將軍澳有一個美食廣場開業，名為「日日食美食廣場」，被譽為「全黃Food Court」，旁邊亦有 「日日·食良」街市，絕對係貼地情侶們嘅拍拖好去處，行日資Don Don Donki之前，不妨先去Food Court醫吓肚先啦！

【延伸閱讀﹕將軍澳全黃美食廣場4間小店中西任你揀 斧頭炸髀似咖哩炒蟹？ （下）】

• 

• 

匯集良心食店嘅Food Court，位處將軍澳The Parkside商場1樓，初時被網民指場內門堪羅雀，非常冷清，但目前有8間小店已開業，另有3間小店即將登陸美食廣場，記者當日見到有2間無開舖，不過大部份都有營業，場內100%由黃店經營，目前門庭若市。

【Like Facebook / MEWE 緊貼最新資訊，一個Like一個鼓勵，支持原創文章，向Content Farm說不。】

• 

商場前身餐廳租戶有札幌拉麵、翠河餐廳、大家樂、Campfire Campus、 AFTER 3 at Campfire，更有地產代理利嘉閣等，但通通已經結業。上年由宏安集團購入商場後，將商場翻新，今年1月率先打造「日日·食良」街市，「日日食美食廣場」於6月再開業。不過，近月經營商博朗專業管理有限公司收到管理公司宏集策劃警告信，被要求移除場內「與准許用途無合理商業關連的標語、文字及海報等物件」，包含多張文宣，否則可能終止合約，追討相關損失、費用。

• 

• 

• 

• 

• 

• 

• 

現時，場內海報似乎已經移除，只淨返幾張宣傳海報、甚至連登豬公仔，適逢聖誕節，呢度連聖誕樹都被染得金黃，相當有心思。

• 

今次先試其中3間小店，包括中式點心店蒸心、港式粉麵五一牛腩、茶飲店奶茶聯盟，買齊3間埋單僅約$100！

（1）蒸心

場內有2間點心店，蒸心係其一，$20點心有2件，方便兩個人share，雖然每樣睇落$20，但有9折平均10幾蚊，價錢於坊間算合理。三權分立、缺一不可 $22 包含燒賣、蝦餃、叉燒包，每樣一件，不過記者試咗老點燒賣皇、晶瑩鮮蝦餃、陳皮山竹牛肉，9折後總數$54。燒賣豬肉、鮮蝦比例適中，唔肥膩；蝦餃表皮有少少厚，但仍可透視微紅鮮蝦，蝦肉彈牙，蝦量唔少，表皮微黏；最值得推介係山竹牛肉球，既有腐皮墊底，牛肉球內有馬蹄粒，同坊間粉狀牛肉球明顯有分別，配搭喼汁更有鮮味，不過醬汁需於中央自取。

• 

• 

• 

• 

• 

• 

• 

• 

（2）五一牛腩

話明五一牛腩，必食之選相信一定係招牌五一牛腩麵 $38，9折後$34，屬一般粉麵價錢，但Food Court比茶記環境食得更舒服。去親粉麵店通常都會叫牛腩麵，今次價錢上以為同茶餐廳質素無咩分別，估唔到一碗牛腩麵都好有水準，湯底清甜，有菜底，唔肥膩，牛腩軟腍，有腩香，略帶爽口，肉質唔嚡口，咬落鬆化，腩汁溢出更滋味，只係略嫌有一兩舊肥膏多、肥瘦不均。

• 

• 

• 

• 

• 

（3）奶茶聯盟

呢間茶飲店款式幾特別，大部份都唔係普通奶茶款，除咗黑糖奶茶，重有奶茶牛、奶茶紅豆冰等。今次記者挑選紫薯奶茶 $35，跟餐飲有折，再9折後只係$20，同坊間茶飲差唔多價錢。奶茶以紙杯盛載，內有紫薯香，飲落只係微甜，紫薯香味唔重，只散發少量薯香。

• 

• 

• 

• 

• 

Food Court旁邊係乾貨店，對面就係街市，官方講明「食良知味」、「食其自然」，食材新款，不時有折扣優惠。於街市行個圈，會見到有西式牛扒、傳統魚檔、海鮮檔、菜檔、鮮菓檔、豬肉檔，甚至可以買到火鍋湯包、羊腩煲材料，最啱一眾懶人。

• 

• 

---

---

延伸閱讀﹕將軍澳全黃美食廣場4間小店中西任你揀 斧頭炸髀似咖哩炒蟹？ （下）

延伸閱讀﹕【黃店巡禮】將軍澳4間隱藏小店 午餐最平50蚊埋單

E.A.Tips﹕

（1）經將軍澳唐俊街、寶邑路十字路口，由PopCorn、將軍澳廣場方向沿海邊行，位置於寶盈花園對面，於至善街轉右，1分鐘即達The Parkside商場日日食美食廣場入口；另可經天晉匯商場，由小路直入，沿路會經過黃店Cafe蜜蜜見，隔離係四季花店，The Parkside商場另一個入口靠近大型露天停車場，步行2分鐘即達日日食美食廣場。

（2）沿扶手電梯直上，左邊為「日日·食良」街市，包含街市魚檔、菜檔，右邊則為「日日食美食廣場」，而「日日食美食廣場」左邊亦有少量乾貨店，如鮮花店、單剪理髮店、水族店、冷氣水電店、養生店。

（3）場內不時有折扣優惠，例如聖誕期間全場有9折，早輪全場有8折；更有跨店優惠，如買主食後，飲品有折扣優惠。

（4）由即日起至2021年1月31日，更有抽獎，只需於「日日·食良」街市憑有效會員卡以電子消費滿$80，亦可合拼消費，即可於每日08:00 – 20:00到G/F顧客服務部換領抽獎券獲得抽獎券乙張，每張可抽獎一次，獎品有iPhone 12 64GB、飛利浦空氣無油炸鍋、樂聲牌25公升微波爐、特福9公升焗爐，抽獎結果會於下年2月5日公佈，會有專人聯絡領獎，有需要請自行聯絡顧客服務部電話3974 5085。

---