小編間中都會同閨蜜去歎High Tea，上次試咗香港文華東方酒店同護膚品牌AMOREPACIFIC聯乘嘅雨前仙境下午茶，價錢有啲貴，但幾特別。
個器皿中間不斷散發縷縷輕煙，勁有仙氣，絕對要相機食先！不過用乾冰整出嚟唔可以加太多次水，我哋影到加咗幾次水，有啲食物有變淋跡象。
Tea Set用綠茶做主角，用雨前一綠茶做甜品同泡茶，雨前一泡茶勁清香，有啲似雨前龍井，沖泡幾次仲好有綠茶香味。
唔少鹹點同甜品用綠茶製作，好香茶味。甜品唔會太甜，酒店出品真係幾高質，兩個人食都足夠。
英式鬆餅特別，仲有限定綠茶口味，仲有本身嘅玫瑰花果醬、牛油忌廉夠香甜。
7款鹹點其實同綠茶無咩關聯，但勝在造型精緻，例如煙燻味韓式酒香煙燻三文魚千層酥、鵝肝醬金葡萄法式奶油包完全唔膩、仲有龍蝦咯嗲三文治、紫蘇帶出清新味嘅蘆筍脆餅等。
甜品就多用綠茶製作，例如用綠茶粉點綴1963年文華芝士餅、士多啤梨撻，仲有帶甘香茶味嘅綠茶歌劇院蛋糕、造型似足石頭嘅綠茶軟心朱古力玄武岩石，連旁邊似足海草嘅蛋糕都食得架！
食完仲有護膚品送，幾抵食吖！無論拍拖定同閨蜜Gathering都好適合。
雨前仙鏡下午茶 *
地址﹕中環干諾道中5號香港文華東方酒店閣樓快船廊
供應日期﹕即日起至6月30日
供應時間﹕星期一至五 14:30 – 18:00；星期六及公眾假期 14:00 -16:00 / 16:15 -18:00；星期日 15:30 – 18:00
價錢﹕518/1位（另收加一服務費）
電話﹕2825 4007
* Tea Set每日限量供應30份，需要預訂
每位惠顧Tea Set客人可獲贈券換領價值$370的AMOREPACIFIC護膚禮品
延伸閱讀﹕喜來登酒店Guerlain平價海景Tea 仲有護膚品Sample送
延伸閱讀﹕香格里拉歎蜜桃主題High Tea 香桃下午茶勁Sweet
延伸閱讀﹕Hello Kitty迷召喚！ 半島酒店主題限量下午茶
在〈香港文華東方酒店High Tea 歎綠茶主題仙境下午茶〉中有 5 則留言
留言功能已關閉。