2021-01-27

平食牛大人 荃灣2小時台式火鍋放題回本推介 睇埋訂位Tips~

平食牛大人 荃灣2小時台式火鍋放題回本推介(睇埋訂位Tips~)


牛大人台式火鍋抵港後,風靡唔少本地人,間間分店都經常爆滿,大排長龍,今年初更進駐荃灣。最特別係不單有9款湯底任揀,更有台式直送火鍋美食,而台式火鍋都有3套餐,包括精選嫩牛、美國安格斯、澳洲極上和牛套餐,當中澳洲極上和牛餐更加大受歡迎,價錢為$238至$288,逾10款肉類任叫任食,的確係食肉獸天堂,包括安格斯牛小排、安格斯特選牛板鍵、手切封門柳、澳洲和牛M5牛肩卷等,淨係套餐都有17款,兩個人2小時內又食到幾多?以小編食放題方法,係絕對唔會食最貴嘅價錢,反而會用最平嘅價錢去食到回本,因為食親放題只會得第一、二碟有分別,質素通常每況愈下。

秋天轉涼想打邊爐暖暖身,加上去唔到台灣,唯有食吓台式火鍋止癮先,牛大人最平套餐係$158至$198,只得4款肉類,豬牛羊雞各一,以牛肉計,每碟只有人頭份量,其他更少,重要等時間上枱,其實2小時內揀最平嘅已經夠食,亦可以測試到最終食到幾多碟牛肉。

牛大人共有9款台式湯底任揀,聲稱有專人炮製,以更然食材熬煮,無味精,各有特色。多人就揀兩款湯底,一款係招牌貨係牛大人紅燒牛骨鍋,另一款係牛夫人秘方麻辣鍋,另外其實重有眷村白玉酸菜鍋、台灣濃香蕃茄鍋、帝王食補薑母鴨鍋、台灣鳳梨雞鍋、四目養生素食鍋、阿嬤養生濃湯鍋、台中蒜頭雞鍋。紅燒牛骨鍋內含大舊牛骨,材料豐富,湯頭味道濃厚,有藥材味,但入口偏鹹,聞到牛骨味,但飲唔出有牛骨味。而秘方麻辣鍋挑選中辣,同樣有藥材味,初段辛辣度、麻度都唔算好重,但會愈食愈辣,愈食愈鹹,而且湯底會出油。兩款湯底味道都偏重、偏鹹,即使唔蘸醬料,未食完火鍋都已經覺得口渴。

開動食牛肉之前,可以先食啲台灣直送地道熟食當前菜,例如第二市場真滷牛肉飯、梅甘酥脆薯、士林鹽酥雞、基隆甜不辣等。梅甘酥脆薯係地瓜加梅子粉,輕輕炸過,微酸帶甘甜,細細粒,略厚實,好香口之餘都醒胃;而魚香皮蛋豆腐就夠冰涼,食重口味嘢前先食清少少。

以最平嘅價錢嚟計,牛肉選擇只得上腹牛五花,其餘肉類就係西班牙豬梅肉片、紐西蘭羊卷肉、花雕酒雞件。牛肉其實都已經可以接受,牛肉有雪花,油脂尚算分佈均勻,有牛肉香,部份油脂較多,但肉質都軟腍,唔嚡口。豬肉、雞肉都比較容易飽肚,而且一般貨色,所以唔需要太多,羊肉亦只係試吓有無羶味,味道幾濃,最終都係主攻牛肉。不過,牛肉份量唔多,每次每碟只得每人1塊,部份少咗1塊,每次叫4至5碟,叫足3至5次,每人大概食到最多15至25塊牛肉,未計有啲嚟少咗。以任食火鍋嚟講,的確算有水準,但如果最平嘅價錢都無信心回本,咁就唔使諗最貴嘅套餐啦。

而其他火鍋配料包含唔少台灣直送美食,微辣嘅私房鴨血絕對係必食之選,本地好少有真鴨血打邊爐,鴨血無腥味、唔鬆散,新鮮嫩滑鴨血一定要放麻辣湯底先會更惹味!而好快溶化嘅士林豬血糕、勁煙韌嘅手工大黑輪、爽口彈牙嘅澎湖花枝漿、台式蝦餃、嫩滑嘅美人花膠、超入味嘅牛媽秘製滷大腸、鬼馬老油條等都夠晒特別。而真台灣鯛魚片、脆肉鯇魚片就唔太出色,海蝦、沙白就可接受,反而即炸厚切牛餐肉、炸魚皮夠香脆,有驚喜。特別推介係台灣直送嘅水蓮,屬蔬菜類別,雖然每次得幾條,似足夾糖嘅鞋帶糖,微微爽脆又軟嫩,而且吸收到湯底精華,唔會吸收得太多,令入口太鹹。至於平時嘅火鍋配料,當然係可免則免,好多都係飽肚款式,食完連應該食嘅精選推介都隨時食唔落,無謂浪費Quota啦!

外面有一整列好長嘅飲品櫃,擺放各式飲品,包含汽水、自家製冷泡茶,用手機點單重有微甜嘅冬瓜茶、金桔椰果、酸梅汁等,而必揀嘅係冷泡茶就有清甜嘅白桃烏龍、清香嘅桂花烏龍、甘甜兼驅胃氣嘅洛神花茶、消滯嘅菊花普洱等,好啱配搭重口味火鍋,亦有麥味重嘅盒裝麥仔茶、麥香紅茶。至於手工啤酒就另外收費,荃灣同旺角限定嘅流水落花$48/450ml 入口清爽,有微微啤油花香同果香,唔算太苦澀,有回甘味,重有生啤 ASAHI、白啤酒1664等。

甜品每人可揀一款Movenpick雪糕,可揀瑞士朱古力味、士多啤梨味或意大利奶凍Panna Cotta口味,亦有期間限定嘅台中仙草凍。仙草凍內含仙草、紅豆、珍珠、粉條、花生等,入口豐富,唔算好甜,仙草尤其滑嫩,有台灣感。

延伸閱讀﹕平食自助餐! 普慶餐廳半自助甜品Buffet $120任食10款Mövenpick雪糕

延伸閱讀﹕小資收藏觀塘零打卡位法餐 穿越普羅旺斯歎足2小時

延伸閱讀﹕樂富店9月尾開幕! 回顧4間Sushiro壽司郎限定推介 醒你3招輕鬆訂位攻略

E.A.Tips﹕

(1)可先從網上預訂,可Book定7日後嘅座位,同壽司郎一樣要靠同人搶位,用GULU App會連結睇到最新輪候狀況;亦可以打電話或電郵至info@masterbeef.hk聯絡訂位。
(2)其實Walk-in都未必無位,如果想食頭段18:00,早少少17:00或17:30攞位其實無乜人;只要18:00或18:30攞定位,就基本上可以食到大概20:00嘅第二段時間;第三段時間22:00的確無咁多人,但最好都係同樣早1至1.5hour攞定位。

(3)Download Strollet APP登記做會員有優惠,coupon有9折,亦可儲分升級。

(4)午餐限時90mins,晚餐限時120mins。

(5)埋單前會有張甜品卡,兩個人去食,甜品最好一個叫Movenpick,一個叫期間限定嘅台中仙草凍,就可以拍拖Sweet住食晒兩樣啦。
(6)湯底5至6人都係得一個鍋,鴛鴦鍋要加$50,星期五六日要加$10,特別日子要加$20,埋單另有加一服務費。
(7)大部份食物都可以用手機Scan QR Code自助落單,出面有飲品櫃、醬料區、蔬菜、熱茶同一般打邊爐食物,亦有台式滷肉飯,不過出去攞嘢食時,記得要戴返口罩。
(8)重有個普通打邊爐知識提示,淥完牛肉之後,記得撇去火鍋表面浮沫。
(9)火鍋湯底其實已經夠鹹夠重味,唔需要攞任何醬料,因為醬料區往往好多人,唔好浪費時間排隊等候。
(10)每款湯底內有2舊白蘿蔔,食到最尾一定要食埋,吸收晒湯汁精華,超入味。
(11)倒數45mins已經Last Order,所以手機點餐只得1.5hour時間。

牛大人台灣火鍋吃到飽(荃灣分店)

荃灣眾安街55號大鴻輝(荃灣)中心16樓
星期一至日 12:00 – 16:00、17:00 – 00:00
3953 9330

旺角分店地址

旺角彌敦道620-628號瓊華中心9樓全層
星期一至日 12:00 – 16:00、17:00 -00:00
3953 9320

尖沙咀分店地址

尖沙咀加拿分道20號加拿芬廣場2樓
星期一至日 12:00 – 16:00、17:00 -00:00
3953 9350

銅鑼灣分店地址

銅鑼灣駱克道463-483號銅鑼灣廣場二期5樓
星期一至日 12:00 – 16:00、17:00 -00:00
3953 9340

Please Like & Follow & Subscribe /
歡迎讚好、追蹤、訂閱