回味館

元朗橋底中式小菜窮人恩物 回味館份量價錢啱晒打工仔



元朗國出名多好嘢食,連隨便一間茶餐廳都有驚喜,由平食$40到中式小菜、川菜系列$60至$90都有,透明度高,價錢列晒出當眼處,只係嫌落單姐姐比較隨性。

小店靠近天橋底,位處街市小菜檔旁邊,被街市檔口包圍,隔離係香燭舖,不過價錢、份量同質素上都可以算係打工仔啱食嘅菜式,似乎以粉麵飯同川菜為主,套餐全部都會跟例湯、白飯,除咗湯飯,拍拖平食一流,兩個人其實可以$100埋單,都算係窮人恩物。

蠔仔肉碎湯飯 $48,白飯會另上,需要自己逐啲白飯加入湯內,蠔仔份量唔少,可以算肥美,配有大量芫荽同肉碎,重有杞子、薑、冬菜等配料,湯底呈奶白色,大概係魚湯打底,睇嚟幾足料,味道夠濃,有蠔味。

成大碗上枱嘅酸菜魚 $90,擺盤唔錯,配菜幾多,魚肉份量可以接受,魚片嫩滑,少骨,酸辣味都充足,不過唔明點解酸菜魚入面會有片檸檬。

口水雞每半隻 $90,一隻就$150,向來都係重口味之選,主要靠調味,口水雞味道偏辛辣同偏鹹,適合配白飯。

例湯係苦瓜湯,內有豬骨、鹹酸菜、黃豆等配料,平時食苦瓜會覺得苦,但煲老火湯又可以接受,唔會有苦味,反而入口甘甘哋。

延伸閱讀﹕元朗鮮製豆乳清甜解渴 款款無添加豆味濃

延伸閱讀﹕教你分清上白泥同下白泥 真正睇靚日落好地方

E.A.Tips﹕


(1)室內座位唔多,得6至7張枱,唔建議太多人去。
(2)最好避開食飯時間、食環洗地時間同買餸時間,避開外面人流。
(3)星期日有機會休息,最好先留意營業時間。


回味館

元朗俊賢坊18號權益大樓11號地下
06:30 – 21:30
2433 0988

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈元朗橋底中式小菜窮人恩物 回味館份量價錢啱晒打工仔〉中有 1 則留言

留言功能已關閉。