渡船角喺邊？《大事件》取景地八文樓集體回憶係汽笛聲？

翻開地圖，你可能都唔知渡船角嘅位置，實際上渡船角係一個充滿香港歷史嘅地方，而今年渡船角就因新發茶餐廳群組感染武漢肺炎而揚名。

渡船角佔地極細小，近佐敦，屬油尖旺區，該地鄰近來往深水埗區、九龍城區、新界區嘅巴士總站，喺西九龍填海前，曾經有可容納客車兩用雙層渡輪嘅佐敦道碼頭，可來往對岸灣仔區、中環區，不過1996年已停用碼頭，而近年旁邊又興建港鐵柯士甸站，交通便利，值得兩個人逛吓。

點解叫渡船角？渡船角位置靠近佐敦道碼頭，海面不時有砵砵聲嘅汽笛聲，作用係提醒輪船唔好相撞，汽笛聲雖近民居，但唔會持續好耐，所以好少影響八文樓居民。

渡船角現時有兩幢著名新屋苑，包括The Austin、Grand Austin，不過渡船角最出名嘅係八文樓，又名文華新村，靠近佐敦道碼頭，八文樓來自油麻地小輪倉庫，杜琪峰執導嘅《大事件》亦於此地取景。八文樓位處渡船街、佐敦道交界，原本屬高尚住宅區，比較多中產人士入住，但後來連接廣東道，加上近年多咗南亞裔人士入住，亦多咗烹調咖哩嘅地舖，區內環境複雜，恍如迷你版聯合國。而八文樓直指八幢文字頭嘅屋苑，包括文蔚樓、文苑樓、文英樓、文華樓、文昌樓、文耀樓、文輝樓、文景樓。