2020-08-04
7 Days全日禁堂食 疫情下15個外賣小貼士

【提提你】7 Days全日禁堂食 疫情下15個外賣小貼士



疫情持續,幾乎每日過百宗確診,香港政府逾半年仍然堅持唔全面封關,部份境外人士毋須強制檢疫,大量隱形病人通街走,但限制境內市民出入同活動,噚日(27號)又再宣佈收緊防疫措施,香港人聽日(29號)起7日內只准買外賣。提提你,買外賣時亦需要注意買返屋企嘅食物同處理方法,盡可能避免感染病毒機會,肺炎病毒喺唔同環境存活率各有不同,為保障大家外賣都可以安心用餐,今次小編就為大家提供15項疫情下嘅外賣小貼士。

港府最新防疫措施包括所有食肆全日禁止堂食,只准提供外賣,商場內嘅美食廣場亦需關閉,食肆開放同時需為客人量度體溫、提供消毒酒精搓手,限聚令亦由四個人收緊到兩個人,僅公共交通工具能豁免。其他措施仲有強制室外公共地方戴口罩、關閉所有體育處所同游泳池,甚至將擴展檢測街市租戶、小巴司機、約900名特殊學校員工,同時安排慈雲山居民進行檢測,另外唔排除向私人化驗所購買檢測服務,上述最新措施皆由星期三(29號)起凌晨生效,為期7日。

(1)挑選優質食肆

要避免感染病毒,最好挑選優質食肆,避免高風險食肆,已有確診病人嘅食店可免則免,持牌食肆當中,良心經濟圈內嘅食肆衛生環境一般比其他食肆好,防疫控制方面比較嚴格,信譽較好,食物安全亦相對有保證。

延伸閱讀﹕7月第三波肺炎爆發 全港確診者曾到訪餐廳一覽

(2)減少人群聚集

出街買外賣難免會遇上排隊買外賣嘅人群,應該盡量避免人群聚集,呢間食肆係排隊店,可以去第二間食肆買外賣,又或者避免午餐、晚餐高峰時間去買外賣,甚至可以用APP叫外賣,由速遞員將食物送上公司或屋企。

延伸閱讀﹕香港最大食評網精選70間餐廳 編輯推介42間優秀得獎餐廳

(3)外賣食物選擇

買外賣食乜好?疫情下,外賣食物都需要細心選擇,冷食有一定風險,特別係沙律、刺身、壽司,生食或半生食都係容易滋生細菌嘅食物,最好挑選熱食,或者可以加熱處理嘅食物,避免病毒、細菌入侵人體。部份加工類食物如涼拌食品、裱花蛋糕,而經醃、鹵、燻等可直接享用嘅熟肉製品都有可能會容易變質,有問題就要丟棄,但最好避免選擇。至於以食物質素嚟講,湯麵就要分湯上,方便返屋企自行倒入加熱,避免麵底索晒湯汁,影響胃口。

(4)自選飲品類別

無論食肆定茶飲店都會售賣各類飲品,好多人都會忽視呢點,飲品買返嚟要先拭抹包裝是常識吧?而飲品類別亦需要留意,未開封飲品如罐裝類比較安全,非罐裝類存有一定風險。至於港女必飲嘅茶飲,一般係密封狀態,飲管會有飲管套,唔好假手他人開飲管套,最好返屋企清潔雙手後先將飲管取出,避免中途感染病毒。

(5)避免現金交易

買外賣時,大家會用Cash、八達通定Credit Card?建議出街買外賣時盡量避免使用現金交易,因為紙幣、硬幣往往最容易殘留上一手嘅細菌、病毒,找續時雙方都有一定風險,建議一樣要消毒處理。但最好都係以無接觸方式結帳,使用任何電子支付方法進行交易,只需消毒卡面即可。

(6)減少外人接觸

唔少人都會使用外賣APP叫外賣,例如Uber Eats、GOGO Delivery、Foodpanda、Food Delivery等,最好避免同外賣速遞員有接觸,開門前需要戴上口罩,最好保持約六呎距離,即使接觸後亦要消毒雙手同處理外賣袋,或者可以要求外賣速遞員將食物放門口或掛喺門柄上,然後開門自取。此情況同食肆外賣一樣,如果要自己去食肆買外賣,都需要馬上為自己雙手消毒,避免病毒、細菌人傳人。

(7)拒絕外賣餐具

購買外賣時,唔少食肆都會為客人提供外賣餐具,大多數有獨立包裝,但有部份其實並非獨立包裝,甚至只係隨手放入膠袋內,食店職員有可能無戴上手套就接觸餐具。外賣餐具一般都係塑膠製,堅拒使用外賣餐具,既環保、又可減少病毒感染,但建議避免使用易於滋生細菌嘅木質餐具,所以最好都係使用自己屋企可清洗又衛生嘅餐具。

(8)檢查食物包裝

如果係直接去食肆買外賣,拎外賣時要先檢查基本包裝有無唔清潔嘅地方,有問題就要即時同食肆反映,要求退換。事後記得消毒雙手,避免經接觸感染。

(9)食物溫度控制

外賣飯盒由處理到存放,再到運送,買到返屋企大多需加熱處理,抑制微生物生長,但溫度、時間係幾多?事實上,普遍熱食應維持攝氏60度以上,而冷食就應維持攝氏4度或以下,因為溫度喺兩者之間容易令細菌溫床,食物安全中心指屬危險溫度範圍。購買外賣時,可自備保溫袋,若真係想買冷食,就要自備冷藏袋,兩者都有可能維持食物溫度。而易於腐壞嘅食物只能放置2hours或4hours,一般食物置於室溫超過4hours就需丟棄,若不足2hours就可放入雪櫃,但原則上限時4hours內都要食用。

(10)膠袋處理方法

出街買外賣難免會用到膠袋,一般食肆都會採用膠袋盛載外賣飯盒,膠袋其實同口罩情況一樣,隨時會殘留病毒、細菌,返到屋企記得將膠袋立即丟棄,同口罩處理方法一樣,處理完必須馬上徹底清潔雙手。

(11)飯盒清潔消毒

外賣盒買到返嚟,可能已經過好多人碰觸,最好先拭抹整個飯盒表面,然後放喺餐枱上再處理,抹完之後唔好即刻打開飯盒,抹飯盒時雙手有可能已接觸細菌,應先清潔雙手至少20秒,之後先至打開飯盒。

(12)醬料包裝處理

叫外賣時,部份食物可能會有獨立包裝醬料,好多人都忽略小包裝清潔,即使係細小醬料包裝,都需要拭抹消毒,抹乾淨先打開醬料小包裝,將醬料倒出再享用食物。

(13)食物加熱抑菌

坊間大多數外賣飯盒都係用發泡膠或膠盒盛載,由烹調好到送到屋企再打開飯盒,食物有可能已經開始變涼,令食物存在微生物如病原體,可能需要作加熱處理,既可保溫,亦大有可能殺死存活食物上嘅病毒。但膠類製品絕對唔可以放入微波爐或蒸爐內,故必須上碟先加熱,最好將食物轉落家中小碟或碗內先加熱,同時亦可避免食物存放外賣盒太耐,因為膠盒塗層同外賣包裝紙都有可致癌物PFAS成分。

(14)公司用膳環境

若打工仔要買外賣返公司食,就需要留意用膳位置,自己座位嘅電腦鍵盤、滑鼠等容易被細菌溫床,同公司同事共膳亦有可能因接觸感染,最好同共膳同事保持一定距離,唔好面對面食飯,減少用膳時交談,以免病毒經口水或飛沫傳播,獨立同膳就比較安全。

(15)膳後適當處理

用膳後,唔好忘記需要清理枱面,以免細菌滋生,影響同事或家人,除咗將外賣飯盒同膠袋密封丟棄,亦要將剛才用膳嘅小碟、碗同餐具徹底清洗乾淨,將自備餐具循環再用。

Please Like & Follow & Subscribe /
歡迎讚好、追蹤、訂閱