民間組織「大澳非茂里」上年舉辦的「大澳水鄉花燈節」引得唔少人慕名而至，導致大澳被擠得水洩不通，今年即使有街依舊自發掛起花燈，但官方卻宣佈停辦花燈節。但其實想睇花燈未必一定要山長水遠走入大澳嘅，今年編輯就為大家預告，灣仔「藍屋」都可以觀賞花燈，於空地上抬頭可見一個個色彩繽紛的手工燈籠，恍如大澳花燈節，今年中秋不妨拍拖兩個人去睇一睇有無訪個可以令你觸動心靈啦！
事實上，雖然「大澳花燈節」主辦方早就8月中旬（19日），於一片謾駡聲中表示停辦「大澳水鄉花燈節2022」，但就同灣仔藍屋合作，將部份手工燈籠懸掛於藍屋內，位置靠近鬧市，其實更方便市民中秋賞花燈迎接中秋，亦唔會對居民產生影響。
延伸閱讀﹕【中秋好去處2021】大澳水鄉花燈節取消開幕儀式 走勻大街小巷尋幻彩手繪燈籠 同場加映元朗大橋街市五彩燈籠街+灣仔利東街紅噹噹燈籠海
有啲人會選擇去元朗大橋街市入面某一間舖頭構成嘅「燈籠街」影相，但編輯因為某啲緣故，未能進入街市，況且上次已經影過，亦無意欲再前往，所以今次直接去灣仔一個今年先有花燈嘅地方。
「藍屋」一隅有一個空地，一個個手繪燈籠高高懸掛，猶如「大澳水鄉花燈節」，縱然唔係身處大澳，但都有賞花燈嘅感覺，果然如主辦方所言「有燈就有人」，無「亮燈儀飾」都可以賞花燈，快樂其實可以好簡單，但要喺香港保持快樂就唔容易。
今日「藍屋」內嘅手繪燈籠同上年「大澳水鄉花燈節」嘅相近，抬頭看天仰望花燈，多數以卡通為主，亦貫徹藝術創作，花燈配搭戰前建築一屋一瓦，一草一木都別具特色。不過，現場就未見到有人如上年般繪畫男團Mirror主題燈籠，反而有人畫上另一男團嘅Error主題燈籠。更令編輯感恩嘅係，依舊有人繪上為香港人打打氣嘅「香港加油」、「好人一生平安」嘅手繪燈籠，只不過兩者中間擺放咗一個「比卡超」主題燈籠。
位處石水渠街嘅「藍屋」本身只係一座唐樓，現時樓高4層，只不過經過活化之後，被髹上藍色，於2010年蛻變成舉辦專題展覽或社區文化活動嘅「香港故事館」，現時係香港一級歷史建築。有指藍屋前身其實係一座醫院，原本只有2層高，名為「灣仔街坊醫院」，又叫做「華佗醫院」，所以「藍屋」門口會見到「神醫華陀」嘅招牌。其後，醫院於1920年拆卸，「藍屋」一度變成武館、醫館，甚至「義學」，用途眾多，只係於戰後先變成住宅用途。
藍屋既於1922年落成，意指係戰前建築物，後來於2017年更獲聯合國頒發亞太區文化遺產保育保護獎最高榮譽的卓越大獎。故此，藍屋對出可以清晰見到獨特嘅T形街牌，街牌上寫有「景星街」，或者因為建築物獲得活化保存，故呢個戰前街牌相對其他街道嘅T形街牌新簇，而且字體仍然非常清楚。
「景星街」嘅T形街牌係典型英國殖民時期嘅文代產物，多數係30至50年代鑄造，有逾50年歷史，見證香港歷史變遷，香港目前長方形街牌係60年代後嘅產物。而舊式街牌以T形設計，字粒凸出，皆為瓷製，街名為上英下中，英文街名雖由左讀向右，但中文街名則為從右讀向左。
T形街牌最大優點係金屬製造，多數為鐵框瓷製，非常堅固耐用，即使經歷百年都仍舊簇新。雖然「景星街」位於打卡點「藍屋」牆壁之上，靠近石水渠街，但往往係最受到忽略嘅文代產物。
E.A.Tips :
❷ 花燈位置係藍屋空地，可以隨意從路邊進入。
❸ 謹記唔好破壞花燈。
❹ 就算唔係大澳，附近都有居民，記得保持安靜。
❺ 藍屋離舊灣仔郵政局只係2分鐘步程。
❻ 巴士路線6,6A,6X,10, 15,66,109,113皆可到達皇后大道東與石水渠街交界。
藍屋
灣仔石水渠街72A 號街 4 號地舖地舖及慶雲
10:00–18:00；星期三休息
2833 4608