樓上咖啡店自選高水準五品料理!旺角西洋菜南街神秘角落點只賣咖啡綠茶

樓上咖啡店自選高水準五品料理!旺角西洋菜南街神秘角落點只賣咖啡綠茶

旺角Cafe有好多,近年愈開愈多,而且係開到氾濫,要拍拖兩個人搵樓上咖啡店,其實唔難!不過,要找尋一間食物方面有水準嘅咖啡店,就並非易事,因為大多數都只係掛羊頭賣狗肉,食物水準不值一提,卡邦尼意粉隨時食到厭。今次編輯帶大家到一間樓上咖啡店,都算係旺角區內一個神秘角落,望落好似好難搵,但原來入口只係位處西洋菜南街,抬頭可以見到,一個包含五款冷熱盤嘅Full Set精緻料理套餐$100有找。

從旺角西洋菜南街轉上一幢商廈,就能夠登上呢間樓上咖啡店,位置雖然隱蔽,但食物水準反而有驚喜,並非一般Cafe咖啡店。門口已經感覺到陣陣熟悉感,打開大門,步入店內,隨即飄來親切感,唔好問編輯點解。室內似一間典型樓上咖啡店格局,以裝潢嚟講,係日韓式包裝,一端有開放式廚房,外邊座位空間則以L形設計,大扇玻璃窗背後可俯視剛才西洋菜南街入口,都算係鬧市中寧靜一角。

原來呢間以「咖啡綠茶」命名嘅小店,以小茶屋為主打,以官方介紹嚟睇,似係想推廣日本近茶,以及日本茶文化,不過餐牌上嘅食物同飲品款式……似乎大多數同綠茶關係不大,編輯難以感受「綠茶」感。以當日主要餐牌嚟講,菜式係意粉、意粉同意粉,另外固然有咖啡、鮮奶抹茶,亦有焙茶、Pop Milk、蛋糕等,本來以為又係一間普通Cafe,原來餐牌後重有一款五品料理。一Set五品料理$95,包含當日時令或白飯、紅米飯、烏冬,落單時向店員講五品號碼就得,包括有2款熱盤、3款冷盤,簡單嚟講,就係5款食物組合而成,另有一款飯類。

當日只有紅白米飯,熱盤有阿多波燉煮五花腩、糖醋豬柳條、炸南乳雞塊、燒鯖魚、泡菜炒豚肉,而冷盤則有慢煮雞胸柚子醋沙律、煙三文魚薯仔沙律、麻醬秋葵豆腐、北海道溫泉蛋、蔬菜蛋批就變成玉子燒、醬煮南瓜粒,原來每一款都係內有乾坤,巧手都可以變特色。

冷盤都係偏向清淡,慢煮雞胸柚子醋沙律以慢煮雞胸放置沙律菜之上,沙律菜添上酸酸甜甜嘅柚子醋,令人開胃,雞胸入口即融感覺,或者正正因為靠慢煮,令肉質軟腍、唔嚡口,更值得留意嘅係,雞胸含有檸檬汁嘅清新味道,令人想一口接一口。而煙三文魚薯仔沙律亦唔簡單,壓成蓉嘅薯仔質感綿滑,內裏更適當地混合三文魚碎,啖啖有咬口,並非只有薯蓉啤寡感覺。至於醬煮南瓜粒,就係一粒粒南瓜肉,而且粒粒連有南瓜絲,表面平平無奇,但原來經過醃製,有啲似醬漬,南瓜肉內裏軟綿,經特製醬油煮過之後,更帶出香甜味,鹹中帶甜,而甜度仍算適中。

未曾食到熱盤,已經感受到日式料理嘅高水準,唔會油膩,醬汁唔多,以清淡為主,熱盤當中有阿多波燉煮五花腩,本來以為好肥膩,但只有腩肉之間有脂肪層,係半肥瘦狀態,再以阿多波燉煮。而阿多波其實即係來自菲律賓阿多波,菜式固然係流行於菲律賓,只要將五花腩肉浸泡於醋、醬油、大蒜、黑胡椒粉、月桂葉等材料,用作醃製調味,再以文火燉煮,最終可見五花腩呈褐棕色,肉質軟腍,非常入味。另外亦有燒鯖魚,一截鯖魚平舖飯盒內,表面塗有醬汁,魚質軟嫩,魚皮微脆,唔會燒到好乾身,如果再燒脆啲會更惹味。

最後加上一碗紅白米飯,五穀類都有,保持健康水平,食物精緻用心,亦夠飽肚,編輯認為料理套餐欠缺嘅係甜品或飲品,飽餐之後有欠完美,飲品與甜品無半價或附送,係有啲失望,其實只有小小一舊甜品都已經可能會令肚皮更滿足。

至於意粉中亦有素食之選,包括蒜香乾炒雜菌手工意大利麵$78,內含五辛,取外賣時能清楚嗅到香味,意粉炒得好香,隨後再將意粉放入口,係無咗即食嘅香口感覺,變得不過不失嘅水準,但質感總算係乾爽、彈牙,略有煙韌感,有微微蛋香,有蒜味,菇菌類豐富。

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好,
了解更多E.A.Two 資訊

E.A.Tips :

❶ 小店係樓上咖啡店,處於商廈內,門口位於西洋菜南街。

❷ 最低消費為正價飲品一杯或正價食品一份,不包括小食。

❸ 繁忙時間設90分鐘限時用餐時間,但店裏許可就可以任坐,歡迎工作或聊天。

❹ 歡迎打卡影相,但要尊重其他客人。

❺ 有意見可問店內當值店員。

❻ 小店加盟咗HEYPARK,可以方便落單,App內有95折優惠。

❼ 套餐並無飲品供應,必須以正價點選飲品。

❽ 單點飲品加$30有蛋糕一件。

❾ 點選五品料理加$30有蛋糕一件。

EATWO
Miss A

咖啡綠茶

旺角西洋菜南街38-40號萬高商業大廈3樓
13:00 – 00:00
2468 1518

在〈樓上咖啡店自選高水準五品料理!旺角西洋菜南街神秘角落點只賣咖啡綠茶〉中有 1 則留言

留言功能已關閉。