九龍,  兩個人影吓相,  神秘之地

大隱隱於市!尖沙嘴鬧市藏維多利亞時代百年歷史建築物 遊走法定古蹟探視紅磚遊廊金字瓦頂

瀏覽次數: 17
個人瀏覽過





香港歷史建築物向來係值得拍拖兩個人深入探索,其實好多歷史古蹟都係隱藏於身邊,當中尖沙嘴鬧市就有一座歷史悠久嘅建築物,設計獨特,只係位處彌敦道一隅,即使走過彌敦道,好多人都可能未必會留意到呢座建於維多利亞時代嘅建築物,都可算係大隱隱於市。

延伸閱讀﹕尖沙嘴鬧市藏港版粉紅教堂 哥德式設計逾百年歷史 尖頂似浪漫童話古堡

離尖沙嘴美麗華廣場不遠嘅一幢建築物,從彌敦道(Nathan Road)抬頭仰望,會見到一組紅磚遊廊,頂端呈三角形,狀似金字塔,入口亦同樣位於彌敦道。事實上,呢座建築物現時係古物古蹟辦事處(Antiquities and Monuments Office)文物資源中心,不過前身係九龍英童學校。

香港有好幾間英童學校,都係屬於香港英基學校協會旗下嘅學校,只係尖沙嘴嘅九龍英童學校係當中歷史最古老嘅學校,皆因學校於1894年開幕,由港督卜力爵士(Sir Henry Blake)奠基。而目前僅存校舍經當時仍未晉封爵士嘅何東先生捐贈,選址九龍羅便臣道(Robinson Road),即目前嘅彌敦道,並於1902年落成啟用,故係屬於維多利亞時代,走廊旁邊可見奠基石、法定古蹟牌匾。其間,學校曾經叫九龍書院(Kowloon College),然後先易名為九龍英童學校(Kowloon British School),到1902年再改名叫做中央英童學校(Central British School),喺1992年被古物古蹟辦事處用作文物資源中心之前,其實二戰後至1991年之前,舊有校舍曾經被區內街坊福利會(Tsim Sha Tsui District Kaifong Welfare Association)用作會址,亦有提供免費教育。

目前,學校建築古色古香,紅磚舖砌而成嘅寬闊長廓建築,加上高樓底設計,以及頂端嘅金字瓦頂,都係典型維多利亞時代建築物,小樓頂端有陽台,有如《Romeo and Juliet》內嘅Juliet小樓陽台。當初,其實係由於香港嘅氣候環境響,故學校先以寬闊長廊環繞設計,由歷史悠久嘅英國投資建築與工程事務所巴馬丹拿建築(Palmer & Turner)設計,都係典型嘅維多利亞時代建築。前九龍英童學校校舍於1991年中旬被列為香港法定古蹟,復修後先活化改為現時嘅古物古蹟辦事處辦公室,眾所週知,香港法定古蹟係受到香港法例第53章《古物及古蹟條例》保護。

如果細心留意吓,你會發現舊校舍正門右邊僅樓高一層,而正門中間至左邊則樓高兩層,有指中央位置原為禮堂,而旁邊則為課室、教員室、校長室。據悉,學校本身係英國人就讀居多,只有少量華人會於該校讀書,情況就有如國際學校,係以居港英國僑民而設,少有華人就讀,另外,九龍英童學校最初為小學,後來一度改為中學,直到30年代學校學生被遷至九龍城區何文田靠背壟天光道2號嘅新校舍,面積比尖沙嘴校舍大幾倍,亦即係英皇佐治五世學校(King George V School)。當時,大概係1948年,即係英皇佐治五世時代,教育制度等都係跟隨國際學校。

前九龍英童學校毗連聖安德烈堂(St. Andrew’s Church),從學校一端可見斜路之上嘅教堂,而教堂於校舍建成啟用約4年之後興建,兩者都係當時居港英國人集中地。隔離呢幢建築物則為一座基督教教堂,由聖公會(Anglican Church)於1897年提議建成,經遮打爵士(Sir Catchick Paul Chater)捐贈,落成至今約有118年歷史,雖然並非法定古蹟,但其實都屬於香港一級歷史建築物,亦屬「具特別重要價值而可能的話須盡一切努力予以保存的建築物」。當時,聖安德烈堂以哥德復興式(Gothic Revival)風格設計,尖拱形門窗、彩繪玻璃窗等都係經典建築,教堂屬維多利亞教區,主教為霍約瑟主教(The Right Reverend Joseph Charles Hoare, D.D.),而聖安德烈堂內嘅信徒大多為附近英兵,多屬威菲路軍營(Whitfield Barracks),而威菲路軍營位置等同現時嘅九龍公園,只不過日治時期曾經有一小段時間被日軍改為日本神道教神社(Shinto Shrine),至於今日則為香港聖公會西九龍教區教堂。




E.A.Tips :

❶ 前九龍英童學校逢星期五下晝本來有公眾導賞團﹕https://www.amo.gov.hk/b5/education_august_2011_public_1.php,但現時已經無咗。

❷ 前九龍英童學校即係現時嘅古物古蹟辦事處。

❸ 古物古蹟辦事處毗連聖安德烈堂。

❹ 入口位於彌敦道。

❺ 切勿破壞或塗污法定古蹟。


古物古蹟辦事處

  • 九龍尖沙咀彌敦道136號
  • 09:00 – 18:00
  • 一般查詢熱線:2208 4488;文物保育電話專線:2208 4400

聖安德烈堂

  • 九龍尖沙咀彌敦道138號
  • 崇拜時間為(英語)逢星期日08:30、09:30(生命中心)、11:30(生命中心)及17:00、(普通話)逢星期日11:30

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


中環鬧市3條街有6個T形街牌 1幢建築物有4個街牌通通近蘭桂坊?
驚現外賣版Omakase?上水超抵食日式定食店款款外賣限定 專用碗放有蝦茶碗蒸便攜又「靚仔」
老闆娘係姜糖?大角嘴全新兩餸飯店有驚喜 近30款餸任揀三餸飯僅$37!
深水埗黃竹街2間小食店僅幾步之遙 即試黑椒牛漢堡Crossover和牛牛丸
重陽去拜山!上水出發經沙嶺公墓直闖麥景陶碉堡 圓嶺仔一河之隔眺羅湖口岸
旺角鬧市3塊超古老T形街牌探究 快富街/黑布街/奶路臣街成區內碩果僅存舊街道
【野餐隨行】筲箕灣道2間餐廳毗連炸雞店電車站 直闖大浪灣泳灘沖浪勝地野餐
樓上咖啡店自選高水準五品料理!旺角西洋菜南街神秘角落點只賣咖啡綠茶
【野餐隨行】大埔商場便攜素食便當/一口雲吞蝦籽麵 元洲仔全海景公園Chill住歎咖啡
上水Homy Cafe 9月尾結業 咖哩雞扒香口惹味 上水千萬公廁旁小公園野餐
【野餐隨行】上水罨耷微舖小食醬汁乃精華所在 市中心野餐地有枱有櫈兼參觀豪華公廁?
太安樓起家!筲箕灣東大街人氣雪糕班戟 暖笠笠法式甜品配涼浸浸雪糕球 歎埋消暑雪頂茶飲啖啖舔舔脷
近大潭水塘!陽明山莊僅存殖民時代皇冠電話亭 紅噹噹包廂懷舊味濃
【野餐隨行】油麻地一級歷史建築鬧市空中花園野餐 神秘台式廚師發辦$100有找!
【野餐隨行】石硤尾池畔叢林小餐廳歎日式超靚便當 街角文具店兼賣醉雞麻醬蕎麥麵
大角嘴迷你威尼斯西餐廳Risotto出色 中西合璧加臘味賣Fusion?