如果因為拍拖兩個人唔想堂食，可能失去好多機會，因為有部份餐廳係拒絕供應外賣，自助餐就係其中之一，而事實上有啲嘢唔係做唔到，只係店家肯唔肯選擇去做，編輯就用外賣事實證明，有一間全港有5間分店嘅素食自助餐店，屹今依舊供應外賣飯盒，價錢平逾半，但仍可飽肚，絕對比堂食更抵食！
素食文化不單止可追求健康，而且能夠同時支持環保，本地素菜餐廳亦愈開愈多，甚至出現一間間素食自助餐。本來自助餐係並無外賣供應，而早排禁堂食期間，多數餐廳都轉為提供外賣，自助餐亦不例外，對於外賣人士係呈感激而尊重嘅態度，但堂食恢復供應之後，有部份餐廳已經疑似睇唔起外賣人士，對外賣人士唔再尊重，有啲食物只限堂食，甚至唔供應外賣。
事實上，即使係自助餐都可以外賣，今次事實證明，全港有5間分店、主打素食自助餐嘅「無肉食」，向來係素食Buffet始祖，至今仍然堅持繼續為外賣人士提供飯盒，基本上外賣同堂食無異。店舖英文名為「Ahimsa」，其實都有唔殺生嘅意思，名稱係梵語，來自古印度宗教，故店家就取其名，作為素食餐廳招牌。
每份素食自助外賣飯盒係包含一個飯盒加一個碗，價錢只係$50至$68，相對堂食要$85至$155，絕對平近一半。雖然只能夾一次，相對堂食75至90分鐘無限夾係少啲，但其實夾滿外賣盒都已經足夠飽肚，而外賣並無分平日或假期價錢，只係分午市同晚市，整體嚟講都係抵食之選！
與堂食一樣，拎住外賣盒亦可以任夾，夾到幾多就夾幾多，包括主食、炸物、餸菜、糕點、沙律、冷盤、湯、糖水，官方建議夾齊紅黃綠黑白五色素色，健康均衡，編輯夾咗一堆，當日包含炸番薯、小煎堆、芝士撻、粟米、蛋散、炒薯仔粒、壽司、沙律菜、秋葵、紅豆糕馬蹄糕、Pizza、香蒜皮蛋豆腐、涼拌豆皮、蓮藕雲耳、炒麵、雜菜炒粉絲、豆卜炒菜、青綠冷麵等，當中芝士撻有濃郁芝士味，芝士內餡微微溶化，都算係較出色嘅款式，店內當日飲品有羅漢果水、檸檬水、玫瑰花茶、茶、紅豆沙、紅蘿蔔湯。如果兩個人去食，係會比一個人著數，皆因會更容易分類，選擇更豐富。
E.A.Tips :
❷ 佐敦德興街8號地下、九龍灣宏照道38號MegaBox 11樓12號舖已經結業。
❸ 現時分店位處旺角洗衣街88號2樓、荃灣大河道98號如心廣場二期2樓213號舖、北角堡壘街10-16號華曦大廈地下B舖、中環嘉咸街23號My Central地下5號舖、將軍澳唐賢街19號天晉匯II期地下20號舖。
❹ 外賣飯盒每人有一個飯盒加一個碗，可以任夾到滿為止。
❺ 外賣午餐$50，晚餐$68。
❻ 平日堂食午市$85，下午茶$68，晚市$135。
❼ 假期堂食午市$95，下午茶$78，晚市$155。
❽ 午市時間11:30至14:15，下午茶時間14:15至16:00，晚市時間18:00至21:30。
❾ 小童有$20優惠。
❿ 無論係堂食定外賣，都係先付款後進入。
⓫ 店內接受八達通或現金付款。
⓬ 建議外賣盒一個放乾嘅餸菜，另一個就放濕嘅餸菜，膠盒可放糖水、湯、生果盤、甜品。
⓭ 過咗夜晚9點可能未必會再refill。
無肉食
旺角洗衣街88號2樓
11:30 – 15:30、18:00 – 22:00
2889 2938