兩個人影吓相,  兩個人醫吓肚,  台灣菜,  和你Taste,  野餐隨行

【野餐隨行】油麻地一級歷史建築鬧市空中花園野餐 神秘台式廚師發辦$100有找!

瀏覽次數: 56
個人瀏覽過





油麻地與旺角食店眾多,但野餐點極罕見,如果你拍拖兩個人步行到鬧市,因堂食遇過不快事件而唔想堂食用餐,可能只諗到路邊小公園用餐,今次編輯就帶大家去一個鬧市都能夠野餐嘅地方,儼如空中花園,加上一間神秘小店炮製嘅台式便當,而Omakase向來都係出現喺日本菜當中,估唔到食台灣菜都會遇上。

登打士街係位處油麻地至旺角之間嘅街道,即使經歷風雨,亦難掩其熱鬧繁華,一條街道內包含多間食店,而一幢幢大廈內又隱藏一間又一間小店。當中,一幢靠近彌敦道嘅商廈更加係數一數二食店之最,今次就上行其中一層樓,發現一間甚為神秘嘅小店。

「雞蛋與羔羊」係一首值得聽嘅歌曲,兩者之間係一個哲學問題,而如果要作出選擇,必然係揀雞蛋一方,呢間小店就以「雞蛋屋」命名,一直堅持「雞蛋」嘅精神,對於「羔羊」係無畏無懼,小店就係一間保護「雞蛋」嘅「小屋」。

原來小店上年曾經結束營業過,年尾則捲土重來,近月則與另一間小店「後生仔海南雞」夾租西九龍中心舖位,現時重新出發,於旺角一幢商廈內仍然可見蹤影,不過就只做午市,並且採取會員制方式進入小店,並非任何人都可以進入。室內佈局簡單,本土味濃,就似一間普通Cafe,亦有如Partyroom模式,可以玩吓Broadgame,呢點都算係兩個人嘅拍拖好去處,能夠消磨時間,又唔會好悶。

由登打士街向窩打老道方向步行,可以於油麻地消防局旁邊樓梯上行,樓梯盡頭就係油麻地配水庫休憩花園;如果唔想行近300級樓梯,可以於真義里先上行至京士柏休憩花園,到底京士柏公園之前,就可以轉上油麻地配水庫休憩花園。

事實上,油麻地配水庫休憩花園係位於油麻地鬧市,位處京士柏道與窩打老道之間,交通方便,步行到小公園猶如登上鬧市中嘅空中花園。公園內有一條長約270米嘅緩跑徑,不時有人於此處跑步練氣,公園內有大草地,旁邊更有小餐枱、座椅,可以用作野餐。而最特別之處,係公園之下有一個1894年建成嘅配水庫,屹今有128年歷史,甚至早已被評為一級歷史建築物,而公園一旁嘅配水庫則寫有建於30年代,都算歷史悠久。

和風牛肉飯$55,包括有薯蓉沙律、胡麻沙律2款前菜,一盒飯就如同普通飯盒,牛肉飯內混有雞蛋,表面灑有紫菜碎、芝麻,散發微弱香氣。一盒飯量十足,絕對足以飽肚,飯粒香軟,牛肉量亦唔少,肥牛質感軟腍,切得偏薄,唔會好嚡,拌勻之後會發現白飯同牛肉中都夾雜蛋香。鹽酥雞$35 其實都炸得香脆,即使行到空中花園需要時間,仍然有微微脆感,酥香十足,雞肉無乜調味。

更值得留意嘅係九宮格便當$95,係一款台灣菜嘅廚師發辦,一盒便當有9款菜式,當日嘅隨機款式包含有台式魯肉飯、蒲燒鰻魚飯、南蠻炸雞、薯蓉沙律、台灣香腸、胡麻沙律、一口餃子、生果盤、紅豆抹茶蕨餅。Omakase本來只出現於日本菜,台灣菜嘅Omakase都算係少見,便當外賣盒以九宮格模式設計,造型精美,恍如日式便當,呢種便當盒明明唔難搵到,但偏偏香港食店好少會做到,而編輯見到嘅係小店非常尊重外賣人士。

九個小格內嘅食物擺盤用心,賣相不俗,食材新鮮,查看餐牌會發現多數食物都可以喺餐牌內搵到,每款份量雖然的骰,但意味一次過可以試到幾款菜式,原來都算係店內嘅招牌貨之一。先食2款前菜沙律同餃子開開胃;中間有2款飯類,同時有魯肉飯、鰻魚飯,前者鹹中有微甜,只欠魯肉汁,後者有一小舊,入口魚質軟嫩,亦欠少量蒲燒汁;上層有小食台灣腸,中間亦有南蠻炸雞,同樣可口;甜品則有紅豆抹茶蕨餅,紅豆口感綿密,抹茶蕨餅啖啖煙韌,甜度唔高;重有一小格係生果盤,可以清新味蕾,都算係細心。




E.A.Tips﹕

❶ 店舖只接受現金作支付方式。

❷ 內有提供晚市包場服務。

❸ 小店係一間只招待會員嘅餐廳,首次去向店舖查詢做會員手續就得。

❹ 油麻地配水庫休憩花園無洗手間,需要落返京士柏公園先有。

❺ 可以由彌敦道轉入眾坊街,經京士柏休憩公園小路上,一邊小路會去到天文台氣象站,沿路去京士柏公園方向,可於對面抽水站旁邊樓梯直上;另一個入口可以由油麻地消防局直送一條天梯,斜度頗高,大概行300幾級樓梯就會到達油麻地配水庫休憩花園,腳程約15分鐘;重有一個入口就係伊利沙伯醫院方向經京士柏道上山,同樣有小路可達油麻地配水庫休憩花園。


雞蛋屋

  • 旺角彌敦道577號高氏大廈2樓A室
  • 星期一全日休息;星期二至日12:00 – 22:00

油麻地配水庫休憩花園

  • 油麻地京士柏道
  • 24hours
  • 2385 8985

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


中環鬧市3條街有6個T形街牌 1幢建築物有4個街牌通通近蘭桂坊?
驚現外賣版Omakase?上水超抵食日式定食店款款外賣限定 專用碗放有蝦茶碗蒸便攜又「靚仔」
老闆娘係姜糖?大角嘴全新兩餸飯店有驚喜 近30款餸任揀三餸飯僅$37!
深水埗黃竹街2間小食店僅幾步之遙 即試黑椒牛漢堡Crossover和牛牛丸
重陽去拜山!上水出發經沙嶺公墓直闖麥景陶碉堡 圓嶺仔一河之隔眺羅湖口岸
旺角鬧市3塊超古老T形街牌探究 快富街/黑布街/奶路臣街成區內碩果僅存舊街道
【野餐隨行】筲箕灣道2間餐廳毗連炸雞店電車站 直闖大浪灣泳灘沖浪勝地野餐
樓上咖啡店自選高水準五品料理!旺角西洋菜南街神秘角落點只賣咖啡綠茶
【野餐隨行】大埔商場便攜素食便當/一口雲吞蝦籽麵 元洲仔全海景公園Chill住歎咖啡
上水Homy Cafe 9月尾結業 咖哩雞扒香口惹味 上水千萬公廁旁小公園野餐
【野餐隨行】上水罨耷微舖小食醬汁乃精華所在 市中心野餐地有枱有櫈兼參觀豪華公廁?
太安樓起家!筲箕灣東大街人氣雪糕班戟 暖笠笠法式甜品配涼浸浸雪糕球 歎埋消暑雪頂茶飲啖啖舔舔脷
近大潭水塘!陽明山莊僅存殖民時代皇冠電話亭 紅噹噹包廂懷舊味濃
【野餐隨行】石硤尾池畔叢林小餐廳歎日式超靚便當 街角文具店兼賣醉雞麻醬蕎麥麵
大角嘴迷你威尼斯西餐廳Risotto出色 中西合璧加臘味賣Fusion?
【野餐隨行】小西灣角落港式下午茶 鬆軟夾餅拼金黃雞蛋仔粒粒飽滿