深入皇后山邨直通布格仔路軍營 歷史古建築印度廟唔再神秘?

深入皇后山邨直通布格仔路軍營 歷史古建築印度廟唔再神秘?

皇后山邨於近月剛剛正式入伙,位置為著名嘅舊皇后山軍營之地,毗連建築設計獨特嘅皇后山印度廟,編輯曾經帶大家探視過印度廟環境,今次就從皇后山邨另一個角度再次探索,發現屋邨內可以輕鬆直視印度廟,而印度廟入口至今愈趨明顯,不過如果想拍拖兩個人上行探索就要自己諗辦法啦!

皇后山公共運輸交匯處有多條巴士、小巴路線來往粉嶺市中心及港九新界,相對部份本地屋邨,其實都算由山旮旯演變成交通方便嘅地方。「皇后山邨」英文為「Queen’s Hill Estate」,因為「皇后山」本身都係叫「Queen’s Hill」,內有7條邨,雖然以「皇」字為首,但名稱甚為奇怪,包含「皇溢樓」、「皇頤樓」、「皇順樓」、「皇盛樓」、「皇滙樓」、「皇樂樓」、「皇澄樓」,如果你夠細心,應該會發現中間隻字為普通話讀音,與「一」、「二」、「三」、「四」、「五」、「六」、「七」同音或近音,翻查資料先知道,原來屋邨係由中國海外負責管理。

屋邨本身位處軍營之間,故此兩端都能夠見到舊有皇后山軍營蹤影,地方偌大,本身只有一條馬路直達,現時就變得四通八達。軍營本身早已於1992年關閉,並且於1994年因《中英軍事用地協議》而需要被交回香港政府手上,1年後演變為警犬隊訓練基地、警察康樂中心,甚至係警察訓練學校、警察宿舍,其後於2001年已經遷出,其後荒廢,直到2015年起改劃為住宅用途。現時,不遠處有2所小學及3間幼稚園,前者包含救世軍中原慈善基金皇后山學校、東華三院曾憲備小學,兩間都係上年全新創辦嘅小學,附近就只有一個皇后山商場,目前連水牌都未有,只有紙張指示替代,商場內多為連鎖店。

皇后山軍營靠近沙頭角公路,面積等同於銅鑼灣維多利亞公園,係舊駐港英軍營房,本身同本港陸軍尼泊爾踞喀兵(Gurkhas)歷史有關,只係1992年之後變成皇家香港警務處嘅地方,為警犬隊、警察搜查隊等警察單位之用,甚至用作訓練或演習。目前屋邨兩旁仍然可以窺探軍營建築,軍營幾乎清一色以綠色平房設計,每座都設有煙囪,附近頹垣敗瓦,據了解悉數有20座平房。據編輯早年探勘皇后山軍營,綠色平房內不單有草地、宿舍、辦公室,從廢棄掉落嘅籃球架亦可推斷內有籃球場等操場設施,整個空間都佈滿草叢,青綠色林木與翠綠色平房尤如保護色,深入其中真係隨時令人盪失路。

建於60年代嘅印度廟,位置其實毗鄰皇后山邨山麗苑,而停車場一端抬頭一望更可以直視皇后山印度廟,本來神秘嘅歷史建築物,現時能輕鬆望得一清二楚。印度廟附近營地本來係由尼泊爾踞喀兵駐守,而印度廟都係由踞喀兵建造,只不過於1992年已經全部撤走。

印度廟內外設計獨特,歷史悠久,早於2010年就被古物諮詢委員會列為香港三級歷史建築物,後來亦未有重新評級,印度廟為罕有紀念少數族裔歷史嘅建築物。印度廟外面以灰綠色為主色,而內部則以藍色、橙紅色為主調,青翠色調隱藏山林當中,雖然保護色,但附近一帶清幽寧靜。

加上印度廟獨特嘅六角形設計,頂端尖銳,有如皇冠形狀,數一數有約12塊三角形,設計搶眼而美觀。原來印度廟別出心裁嘅設計係理由,因為印度教本身以蓮花代表神聖、美麗,故此皇后山印度廟就以蓮花為藍本,故原名為蓮花廟,後來叫皇后山軍營印度廟(Hindu Temple, Burma Lines)。另外,印度廟內設有幾扇門窗,更窗偏向黃色,陽光射入時更恍如神聖之光,外面亦有一座供崇拜用嘅祭壇,用作供奉降服魔鬼嘅印度教女神,充滿神秘宗教色彩。

山麗苑係能夠正對印度廟嘅地方,不過山麗苑嘅軍營卻被翻新裝修成山麗苑管業處暨業主立案法團業主委員會辦事處。如果想進入印度廟,仍然需要依舊有方法進入,入口同樣位處布格仔路一端公廁背後,只不過可以從皇后山巴士站起步。即使印度廟係位於山崗上,現時卻離平路非常接近,Google地圖上比早年容易發現皇后山印度廟正確位置,只係似乎已經無咗神聖又神秘嘅感覺。

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好,
了解更多E.A.Two 資訊

E.A.Tips :

❶ 巴士路線78A,78X,79X,278A, N78,679,979、新界小巴路線503,503K 均可以到達皇后山公共運輸交匯處,其他巴士路線78K,79K,277A、小巴路線52B,52K,55K,56B,56K 亦可以到達附近地標。

❷ 粉嶺市中心小巴總站乘搭小巴路線52B,於布格仔路落車,車程僅約20mins

❸ 現時可以從皇后山邨直視印度廟,而本來嘅公廁背後山邊入口亦靠近皇后山邨。

❹ 皇后山布格仔路舊狗房嗰邊現時長滿樹叢,可能比較難進入。

❺ 再講多次,印度廟附近係惡蚊滋生地方,必須要做足超強防蚊措施!

❻ 謹記保持安靜,同時唔好破壞歷史文遺跡。

❼ 山上隨時有蛇出沒,建議等蛇冬眠之後先行上山。

EATWO
Miss A

皇后山印度廟

新界北區粉嶺軍地沙頭角公路
24hours

皇后山軍營

新界北區粉嶺軍地
24hours