兩個人醫吓肚,  台灣菜,  和你Taste

採環保餐盒+餐具!土瓜灣舊區鐵路便當地道台式口味 3款配菜期期轉換主食足料

瀏覽次數: 26
個人瀏覽過





土瓜灣早前開始清拆,現時行過區內會發現多條街道已經消失得無影無蹤,如果要搵食,可能要稍移玉步到近馬頭圍或紅磡方向,近馬頭圍方向有一間以台式便當為主嘅小店,由環保嘅便當盒到餐具都睇得出係尊重外賣人士,便當食物滿滿台式風味,恍如台灣旅行品嚐到嘅一樣,值得拍拖兩個人去一試再試。

以「鐵路便當」命名嘅便當專門店,英文直譯為「Railway Bento」,雖然「Bento」其實係來自日本嘅「弁当」,解作「便當」,等同香港嘅「外賣飯盒」,但官方介紹則稱為「台式鐵路便當專賣店」,細看餐牌,果然係以台式美食為主,似乎亦有少量泰式,可隨個人口味挑選。

室內天花吊燈以台灣天燈設計,亦貼有台灣街景照片,反正係賣台灣嘢,當然係以台灣風格設計。店內不時有本日限定便當,當日為松阪肉便當$68,編輯係俾完錢等候期間先發現,故此只能留待下一次嘗試。更值得留意嘅係,小店嘅便當盒係採用環保、可分解物料製造,而餐具雖然係木筷子,但亦係實淨款式,能夠循環再用。

眾多便當選擇中,滷排骨、滷雞塊等都係受歡迎之作,其中有經典滷雞塊便當$64,滷雞唔係代表港式嘅滷雞,其實即係炸雞,只不過台灣滷嘅意思係炸完之後再煮,令食物唔會咁乾身之餘,亦係更加入味,香料味尤其明顯。一盒有3件炸雞,每件都係大舊,完全覆蓋下面嘅配菜同白飯,炸雞表皮脆口,充滿酥香,炸粉部份位置有啲厚,但整體可以接受,內裏雞肉軟嫩,醃料入味,就係台灣當地嘅口味,就似古早味,唔會好油膩,又的確係會令人垂涎。

另一款台式美食係黑糖豬軟骨便當$64,所有便當內嘅米粒都係珍珠米,入口煙韌,芳香軟糯。而豬軟骨同炸雞一樣有3件,黑糖等醬料亦好入味,醬料香口,佐飯一流,豬肉軟腍,豬軟骨稍有黏口,脂肪唔多,亦唔黐牙,火喉充足,黑糖醬汁微甜,美中不足就係醬汁唔夠多。

整體嚟講,食物水準係地道台灣貨色,媲美大角嘴排隊店「那個」,所以話唔一定排隊先有好嘢食,皆因美食往往係躲藏於你未必估到嘅地方。另外,每一款台式便當都包含有3款配菜,而配菜更不時會轉換,確保新鮮感,以當日計算,配菜包括有奶油津白、醬油炒粉絲、蕃茄馬鈴薯、滷蛋、菜脯,但編輯無滷蛋,變成台灣腸,若然係食材缺少而有所轉變,我哋絕對會接受。幾款佐菜都唔簡單,而且份量充足,如果唔計主食,以為係香港三餸飯,當中一小舊台灣香腸亦係台灣夜市水準,腸衣微脆,鹹香味豐富。

套餐加$10可以有一份湯物,每個禮拜各有不同,當日為花旗參麥冬圓肉蓮子湯,寫明有助消暑解熱、生津補氣,似乎適合悶熱嘅夏天飲用。能夠令編輯豎起手指公大讚嘅地方,係小店特別設計一個飯盒,方便外賣客人,如果你夠細心,就會發現飯盒蓋係經過特別設計,剛好可以放置一盒湯物,而湯水唔會搖晃或倒瀉。

套餐部份飲品屬免費,例如有阿薩姆紅茶、茉莉綠茶、蕎麥茶,其他台式飲品加$6至16,比如係草莓奶茶$12、芒果綠茶$10,飲品水準似乎無食物咁高,茶味唔太重。




E.A.Tips﹕

❶ 小店位置為馬頭圍道,離海心公園約5分鐘步程。

❷ 最後落單時間為14:30、20:30,中段有落場時間,通常係30分鐘前Last Order。

❸ 留意部份食物款式係限量發售,售完即止。

❹ 收費方式為Cash或八達通。

❺ 用餐限時60分鐘,最低消費$30,無加一。

❻ 食物即叫即做,需要等候15至20分鐘。

❼ 便當內嘅配菜不時會轉換,每個星期小店會於官方Facebook公佈。






鐵路便當

  • 土瓜灣馬頭圍道278A號地舖
  • 星期一12:00 – 15:00、18:00 – 21:00;星期二全日休息;星期三至日12:00 – 15:00、18:00 – 21:00
  • 2386 6690

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


中環鬧市3條街有6個T形街牌 1幢建築物有4個街牌通通近蘭桂坊?
驚現外賣版Omakase?上水超抵食日式定食店款款外賣限定 專用碗放有蝦茶碗蒸便攜又「靚仔」
老闆娘係姜糖?大角嘴全新兩餸飯店有驚喜 近30款餸任揀三餸飯僅$37!
深水埗黃竹街2間小食店僅幾步之遙 即試黑椒牛漢堡Crossover和牛牛丸
重陽去拜山!上水出發經沙嶺公墓直闖麥景陶碉堡 圓嶺仔一河之隔眺羅湖口岸
旺角鬧市3塊超古老T形街牌探究 快富街/黑布街/奶路臣街成區內碩果僅存舊街道
【野餐隨行】筲箕灣道2間餐廳毗連炸雞店電車站 直闖大浪灣泳灘沖浪勝地野餐
樓上咖啡店自選高水準五品料理!旺角西洋菜南街神秘角落點只賣咖啡綠茶
【野餐隨行】大埔商場便攜素食便當/一口雲吞蝦籽麵 元洲仔全海景公園Chill住歎咖啡
上水Homy Cafe 9月尾結業 咖哩雞扒香口惹味 上水千萬公廁旁小公園野餐
【野餐隨行】上水罨耷微舖小食醬汁乃精華所在 市中心野餐地有枱有櫈兼參觀豪華公廁?
太安樓起家!筲箕灣東大街人氣雪糕班戟 暖笠笠法式甜品配涼浸浸雪糕球 歎埋消暑雪頂茶飲啖啖舔舔脷
近大潭水塘!陽明山莊僅存殖民時代皇冠電話亭 紅噹噹包廂懷舊味濃
【野餐隨行】油麻地一級歷史建築鬧市空中花園野餐 神秘台式廚師發辦$100有找!
【野餐隨行】石硤尾池畔叢林小餐廳歎日式超靚便當 街角文具店兼賣醉雞麻醬蕎麥麵
大角嘴迷你威尼斯西餐廳Risotto出色 中西合璧加臘味賣Fusion?