步入大嶼山東涌區，要找尋美食都唔容易，今次帶大家到離東涌炮台非常接近嘅一間小店，間嘢食咩？你絕對估唔到呢度會有一間印度菜，而且係全印度人主理，菜式都係正宗而地道，但大熱天時無胃口唔食飯，故此今次只買烤餅卷去野餐，但竟然足足有一條下手臂咁長，而且全條都好足料，拍拖兩個人一人一條都夠晒飽肚！
毗連東涌炮店嘅「天湖印度餐廳 / Mansarover Restaurant」，遠離繁囂，地方幽靜，舖位屬於一名印度人，餐廳由印度家族自己打骰，炮製嘅都係正宗地道印度菜，有室內外座位可擇，步入店內已經感覺度一股印度氣息，原來佢哋已來香港多年，室內等候嘅時候可以清晰聽到本地電台嘅聲音，佢哋聽嘅都係廣東話電台，懂得融入一個地方嘅人係會比較值得欣賞。
印度咖哩係印度菜當中主要菜式，反正醬汁係靈魂，著重於香料同椰汁咖哩，店內咖哩更有多種顏色選擇，包含啡、紅、綠、橙、白、黑色。除咗咖哩，主要菜式亦有印度香料黃飯、各款印度炒飯，如果大家同編輯一樣唔想大熱天時捧住盒飯，可以挑選傳統印度烤卷、10吋Pizza、中東炸餅卷、漢堡，餐牌上亦有全日每日精選，單單烤餅卷都有牛雞羊肉可擇。
由毗連東涌炮台嘅天湖印度餐廳起步，步行至無人嘅松慧街兒童遊樂場，步程不足10分鐘，呢個遊樂場於2012年建成，內有多張座椅，中央為兒童遊樂設施，但除咗塑膠滑梯外，其他小朋友嘅玩樂設施都算幾吸引，小店同遊樂場都離東涌逸東邨不遠，遊樂場對面可見油站，附近亦可見城巴東涌車廠。
烤餅卷於阿拉伯文亦叫Kebab，最先烤過垂直肉串，烤熟之後再以捲餅包裹，就似只有麵粉同水製成嘅Pita Bread，連同餡料卷成一個圓柱體，係一款手拿烤餅卷。每一條烤餅卷都有一條下手臂嘅長度，以編輯下手臂計算，下手臂就等同鞋嘅Size，烤餅卷大概有23厘米，原來一條烤餅卷足足有超過20厘米長！餅卷只係經微微烤過，略有烤焗脆感，入口軟腍而煙韌，甚至有麵粉香。
Chicken Roll 土耳其烤雞烤餅卷$75，內餡有土耳其烤雞肉，餡料飽滿，打開錫箔紙時，餡料同醬汁溢出，令人垂涎。雞肉烤過後略有香口，肉質軟嫩，配搭醬汁感覺清新，如果烤雞係配搭咖哩，相信會更出色。
烤餅卷內有粉綠色嘅薄荷醬，質感幼滑，略有水份，淋於餡料之間，打開烤餅卷時甚至從錫紙溢出，呢款醬汁濃度唔高，就似薄荷葉、乳酪等混合而成，唔會膩口，就有少少清新感。
至於Beef Roll 印式牛肉餡烤餅卷$85，內餡則有印度風味牛肉作餡，牛肉非常腍身，牛味濃之餘亦有肉汁，牛脂唔算太重，但唔乾柴，而且每舊牛肉都好厚，牛肉經過醃製、炙烤，原汁原味，口味唔辣，比烤雞肉更香口，牛肉與炸雞肉同樣平均分配，食到底都係餸！
值得一提，每一條烤餅卷都包含大量新鮮蔬菜，包含生菜、蕃茄、洋蔥等，令烤餅卷整體唔會膩，而生菜絲入口爽脆，但唔會太生，啖啖變得更Fresh，為炎熱夏天稍為降溫。此外，蔬菜放置肉類與餅底之間，既可保持肉片嘅濕潤，亦可以緩衝一下，濕度唔會透於Pita Bread餅底上，令餅底浸軟。印度菜未必一定只係重味，都可以感覺健康，烤餅卷飽滿而高水準，絕對係夏天必食之選。
E.A.Tips :
❷ 於東涌巴士總站乘搭34,37,37H,38可以直達逸東邨巴士總站。
❸ 由逸東邨香港街市向逸東一邨方向走，於裕東路過天橋，落天橋繼續前行，對面就會到達東涌炮台。，
❹ 店舖門口已經有QR Code，可以外賣自取同睇餐牌。
❺ QR Code可預先落Order，接受電子付款方式，想俾Cash亦可以同負責人講。
❻ 店內有酒精飲品可擇。
❼ 食嘅時候要小心醬汁從錫箔紙溢出。
❽ Mansarover Restaurant 位處東涌，但位於荃灣嘅 Baba’s Station 就係姊妹店。
❾ 餐牌有中英對照，負責人廣東話同英文都識。
天湖印度餐廳
東涌東涌路嶺皮村21號地下
12:00 – 15:00、18:00 – 22:30
2109 1927
松慧街兒童遊樂場
東涌松慧街
東涌炮台
東涌下嶺皮村
10:00 – 17:00（逢周二休息）
2208 4400
在〈【野餐隨行】逾20cm超長爆餡烤餅卷！高水準正宗印度菜毗連東涌炮台登無人遊樂場野餐〉中有 1 則留言
留言功能已關閉。