艾粒是叻+ 上水花園第一號

【野餐隨行】上水罨耷微舖小食醬汁乃精華所在 市中心野餐地有枱有櫈兼參觀豪華公廁?

[sig_post_pv label=””] 個人瀏覽過





上水有一間只有二、三百呎嘅蚊型小食店,開業至今有6至7年,現時店舖招牌雖然有幾分花俏,但實際上內籠望落非常殘舊,罨罨耷耷,行過未必會想食,小食以港式、台式為主,但原來係有驚喜嘅,醬汁先至係精華所在,難怪受到區內街坊同學生哥歡迎。

從龍琛路可見一間用色搶眼嘅招牌,「艾粒是叻」只要用港式英文讀一次就會明白係「I Love Snack」,經過幾年之後都未有褪色,但只要一將視線下移,就會發現店舖內籠暗暗黑黑,非常殘舊,而且好罨耷,唔通係一間俾錢設計而無俾錢裝修內籠嘅店舖?借題發揮一下,據了解,坊間內籠裝修向來使費較貴,招牌設計則較平,但最先吸引人而最重要嘅地方係招牌,點解每次裝修比設計收得貴幾廿倍呢?難怪設計界一直自嘲於香港做設計慘過食屎,設計變得分毫不值,既然有啲客人覺得裝修同設計係可以劃上等號,願意俾錢裝修而唔願意俾錢設計,咁不如叫裝修佬自己設計埋啦,睇吓到頭來長遠變成咩水準?

講返正題,抬頭可見餐牌,俯首亦可見實體餐牌,只係餐牌油𥹉𥹉,似乎好耐無清潔過。餐牌上似乎有好多選擇,比如係熱狗$32至$50、薯條$26至$50、多士$24至$32、潛艇$32至$42,台式飲品、台式小食$26至$30,例如鹽酥雞、甜不辣、炸地瓜、單骨雞翼,又或者係港式小食$24至$26,比如燒賣、魚蛋、雞翼尖、香腸、魷魚、牛柏葉,比較受歡迎嘅係韓式小食杯、炸大雞肶(髀)$32,選擇眾多。不過,餐牌排列極為混亂,抬頭只見東一忽、西一忽,然後角落原來有寫邊樣可選擇套餐,邊樣配搭可連飲品,未計Printer打印出嚟嘅圖片係完全唔吸引,絕對係無圖好過有圖。

離小店不遠嘅就有一個市中心嘅野餐點,雖然靠近馬會道、龍琛路,但入面又唔算貼近馬路,轉個圈都算空曠,小公園內有一個個淺綠色涼亭,亦有多張櫈,甚至有幾張枱,方便就地用餐。

小公園名為上水花園第一號,離市中心非常接近,甚至靠近石湖墟市政大廈、北區大會堂、上水游泳池、天平邨,從垃圾桶亦發現有唔少飯盒,可見唔少人仍然未有選擇堂食。

小食本身其實好一般,就普通一間小食店嘅水平,皆因都係現成攞貨,並非手打製作,只係店內最有驚喜同最用心嘅地方係醬汁,簡單連食兩款小食,都發現醬汁先係精華所在,原來係有料到。當中曾一度受「香港燒賣關注組」關注嘅秘製燒賣就係其中之一,亦可同時挑選秘製魚旦(蛋)拼燒賣$26,內有6粒魚蛋、9粒燒賣,似乎係落單後先煮,時間等候方面較其他小食店長,但打開盒蓋有煙冒起,上手到入口熱焫焫。

魚蛋採用嘅係陳皮魚蛋,比較難得,因為陳皮魚蛋係由真魚打出嚟,比較細粒,但彈牙感十足,又有陳皮香,成本較發水魚蛋高,至於燒賣就係平常嘅魚肉燒賣,而燒賣上枱時,至少表皮無蒸到軟爛,內裏仍有韌度。

醬汁濃稠,並非平常坊間普通嘅咖哩汁,實情係內有乾坤,係咖哩汁混合沙嗲汁,香料度高,咖哩略有甜味,辛辣味有後勁,但又唔算太辣。另外,醬汁內明顯有再加添洋蔥,甚至係乾蔥,而洋蔥都算係神來之筆,因為洋蔥帶有甜味,可以中和醬汁嘅辛辣味,而又保持香味。醬汁份量充足,能夠完全包裹每粒魚蛋、燒賣,唔會吝嗇,啖啖有輕微辛辣感,又帶有醬汁甜香。

一口牛$32 以小杯盛載,可選原味、辣味、蒜片、咖哩味,牛肉粒為西冷牛,略有牛味同牛脂,內有肉汁,肉質軟腍易入口。不過,醬汁比較驚喜,醬汁濃厚,而唔會太鹹,又或者太重膩感,同時帶有香甜味,入口似係瑞士汁,惹味非常,簡單加上蒜味更能點睛,如果多啲醬汁,用嚟撈飯應該唔錯。

飲品方面,真紫薯奶昔$34味道較淡,估計係無加添其他材料,所以唔會好甜,紫薯蓉與奶昔混合之後其實唔太明顯,奶味較紫薯味重,只係蕃薯本身水準好似麻麻哋,而奶昔打磨後都算滑溜,亦算綿密濃稠,只係略嫌冰度過高。

值得一提嘅係,是次選擇嘅公園有係有洗手間,只不過據北區區議會文件顯示,係一個最終動用港幣962萬興建嘅公共廁所,限時朝早7點至夜晚11點開放,被網民戲謔為「千萬金廁」,工程造價嚴重超支,從624萬到962萬,建築成本、顧問費佔多,未計每年需要嘅維修費、清潔費,到底呢個公廁係咪用金鑲嵌嘅呢?睇過由澤連斯基主演嘅烏克蘭喜劇《人民公僕》(Sluga Naroda)嘅話,大概會估到香港嘅工程點解會咁貴。




E.A.Tips﹕

❶ 小店對面就係上水花園第一號,只有半分鐘步程。

❷ 店舖地址雖然係馬會道,實際上係龍琛路。

❸ 注意餐牌比較混亂,其實有套餐可擇,比如一款小食,加一款腸粉或螺絲粉、再加醬汁,又或者小食加飲品。

❹ 設有派對都會服務,可以PM店方。

❸ 野餐時,自己垃圾謹記自己帶走!

❹ 野餐要盡量使用可循環再用之餐具器皿。

❺ 可以挑選有長櫈嘅地方,會較方便。

❻ 有需要可自備小餐枱、小型露營櫈用餐,可以隨時去到邊食到邊。

❼ 野餐時正對海景用餐會比較Chill。

❽ 最好挑選較少人嘅地方,避免接觸人群。

❾ 野餐地同食肆最好距離不足15分鐘步程,以免食物及熱飲冷卻,有需要就自備保溫袋。

❿ 野餐時最好唔好完全除晒口罩,拉低口罩用餐時一定要拎住食物或飲品。

艾粒是叻

  • 上水馬會道184號後座地下B號舖
  • 星期一至五12:00 – 22:30;星期六至日12:00 – 23:00
  • 9700 2828

上水花園第一號

  • 上水龍琛路
  • 24hours
  • 2679 2826

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!