西貢外賣限定英式炸魚薯條專門店 最高人氣係邊款小食？
英國事物往往令香港人愛慕，連飲食亦如是，炸魚薯條係受本地人喜愛嘅英國小食，西貢就有間以賣炸魚薯條為主嘅外賣小食店，無堂食，但可以拍拖兩個人自行於店外用餐，不過最受歡迎嘅小食竟然唔係炸魚薯條！
呢間外賣小食店Chip in fish & chips以炸魚薯條起家，一度由西貢開頭灣仔，近來更開到紅磡，不過灣仔店已經結業，西貢店則一直存在。翻查資料，其實現時Chip in fish & chips為特許經營模式，只要$150,000可加盟3年。
炸魚薯條係去過外國一定會試過嘅小食，而對於英屬香港居民嘅你一定唔陌生，店舖頂端更有一支支英國國旗，食吓呢啲小食，都有異國感。Signature fish & chips +Coconut Water，正宗英式炸魚薯條餐，配天然椰青水，招牌更標明採用MSC認證大西洋鱈魚，每份套餐$78，而素魚亦為同等價錢。
炸魚以大西洋鱈魚柳炮製，有指含豐富Omega-3，醃料唔多，炸漿恰好，唔會太厚，炸皮乾脆，呈金黃色。Fish Fillet魚肉夠厚，亦夠肥美，質地則較坊間炸魚結實，片片魚肉清晰可見，相當飽滿，魚柳有魚油香，略有魚味，夠晒嫩滑。
而薯條就不過不失，為粗薯條，來自比利時，都算有薯香，並非薯粉，唔算太乾身，有少少香甜，只係配搭他他醬有驚喜，一定比茄汁滋味，薯條黏上醬汁後，帶上一抺清新，解去炸物膩感，醬汁有少少洋蔥香。
想有澱粉質落肚，可以連同麵包，當中有Fish butty & chips 魚柳包薯條套餐$55，而淨魚柳包則為$38。魚柳包只係將炸魚放於麵包內，炸魚保持本來嘅香脆，而麵包烘烤過，入口暖笠笠，外脆內軟，有啲似蘇格蘭白軟包。
店內出品大多數都係炸物，除咗炸魚薯條，亦有炸雞塊、洋蔥圈、魷魚圈等，只係講到另一個招牌之作，一定係Signature Deep-fried Oreo $20/3粒，即係炸Oreo。原來將平平無奇嘅Oreo沾上炸粉，掉落油鑊炸，亦可以變成一款受歡迎小食，店方更稱係首創。炸Oreo其實唔太沾粉，炸粉同Oreo有啲離罩，但就完全包裹整片Oreo餅乾。平常食Oreo通常都係餅乾加白色軟Cream，一係一啖啪入口，一係擰一擰、扭一扭、浸一浸，但就係無諗過原來餅乾都可以炸。
將Oreo放入油鑊炸，顏色比炸魚深色，整片餅乾變得軟身，有啲溶化感覺，就好似太陽照射於雪地上，入口有少少煙韌，甚至有煎餅及麻糬嘅混合口感，只係甜度較高。
有唔少人話食上述炸物都可以好健康，但事實上炸物始終係用油炸起，健康極有限，如果真係想健康，就食沙律啦！店內都有其他選擇，比如Mixed Salad 雜菜沙律$20，Sweet Corn 牛油粟米$10，價錢平平哋，想平衡返都可以揀選。
E.A.Tips﹕
❷ 炸物全部即叫即炸，需要等候約10分鐘。
❸ 能夠飲啤酒嘅人不妨配上手工啤。
❹ 由西貢碼頭或小巴站起步，亦只係1分鐘步程。
❺
Chip In Fish & Chips
- 西貢敬民街9號高勝樓地下11號舖
- 11:00 – 19:30
- 6418 6575
