兩個人醫吓肚,  和你Taste,  日本菜

一餐麻甩與斯文兼備!元朗隱藏版料理店躲藏小巷賣日本魚生飯 與潮州滷味店僅相隔15秒步程

瀏覽次數: 75
個人瀏覽過





你哋有試過拍拖兩個人因為食乜好而出現爭執嗎?其實,每個人每一餐想食嘅菜式都可能會唔同,如果選其中一間食店,代表一方需要遷就另一方,但如果想取得平衡,最好嘅方法就係選擇外賣!只有外賣,先可以同時品嚐唔同菜式,而價錢上可能更抵食,亦可以免卻因為食乜好而出現爭執。編輯今次就帶大家到元朗找尋一間隱藏於小巷內嘅日本料理店,而離店舖僅15秒步程,就可以到達另一間主打潮州菜嘅打冷小店,兩者Crossover之後,麻甩與斯文兼備,呢餐就變得男女皆宜啦!

元朗有一間開業有2年嘅日本料理店,由同區另一地埗搬到現時位置,2年間一直躲藏於小巷內,室內環境較狹窄,位置恍如日本當地街邊小店,而菜單上主打嘅都係魚生飯或刺身、定食款式,而燒物本身有指都算係店內招牌菜。當中,魚生飯定食現時賣$102,包含2片三文魚、2片帶子、2片劍魚腩、3片北寄貝、2隻甜蝦,每款晚市定食都會附上沙律、前菜、茶碗蒸、麵豉湯,份量上似乎好豐富,應該能夠滿足,亦可以加配$12至$20嘅小食。

前菜為中華沙律、蟹柳粟米,兩者都清爽開胃,就屬於正常發揮,麵豉湯亦不過不失,相對於平常飲到嘅麵豉湯,鹹度唔高,豉油、日式茶碗蒸亦採用同等Size嘅小碗盛載,故此合共有4個小碗。外賣版茶碗蒸賣相較差,可以估計係從堂食嘅茶碗蒸小碗倒轉反吸落外賣碗內,每一次食外賣茶碗蒸都難以逃過賣相差嘅命運,到底點先可以有賣相靚嘅外賣茶碗蒸呢?不過,茶碗蒸蛋液確實蒸得嫩滑,內有一小塊冬菇片、一小粒元貝肉,材料同調味上唔算高水準,僅帶上微微海鮮鹹味。

魚生厚薄適中,亦夠新鮮,三文魚較大塊,帶子為一開二份量,北寄貝、劍魚腩都屬正常Size,加上有頭甜蝦,帶子、甜蝦味道鮮甜,北寄貝好爽口,三文魚充滿魚脂,亦有魚油香,劍魚腩亦同樣無腥味。至於魚生飯內嘅壽司飯則份量多,飯質不過不失。

日本料理向來係比較斯文嘅菜式,而由日本料理店步出小巷,旁邊為鳳群街花園,只需走15秒步程,就可以走出鳳群徑,到達一間比較麻甩嘅潮州打冷店。店舖名稱較長,命名為飛陽砂鍋粥潮州打冷小廚,主打固然係潮州菜,當中既包含潮州滷水,亦有打冷菜式。

打冷小菜當中,以潮州蠔餅、蠔仔粥、韮菜豬紅、爽滑魚皮,甚至潮州凍烏頭、椒鹽九肚魚、椒鹽鮮魷、椒鹽豆腐、大眼雞都係受歡迎菜式,另外,潮州滷水拼盆、滷水鵝更加係招牌之作。店舖裝潢比較簡單,就如同平常大排檔風格,比較麻甩,

今次就挑選滷水鵝肉$100,但並無配搭蠔仔粥,反而配上一碗白粥$12,皆因滷水鵝肉味道較重,配搭較清淡嘅白粥先能夠更突出滷水味道。以一舊水嚟講,鵝肉份量都算係還可以,鵝片色澤油潤,賣相吸引,全部無骨,啖啖鵝肉味濃,肉質軟腍,容易入口同嘴嚼,唔會嚡口,鵝皮與鵝肉之間黏有少量油花,滲出油香,但唔算油膩,鵝片肥瘦適中。

而滷水汁嘅花椒八角味亦能夠滲透鵝肉中,當然將鵝肉再浸於滷水汁內就會更重滷水香味,毋須再蘸嘢。而伴菜嘅片片豆腐、花生亦都算入味,滷水味亦可以滲入豆腐內,豆腐比較硬身,唔容易一夾就散。




E.A.Tips﹕

❶ 大阪日本料理位於玉龍樓旁邊小巷,並非街道上,向鳳群街花園走,穿越一個貌似小商場嘅小巷就會見到。

❷ 飛陽砂鍋粥潮州打冷小廚就位處鳳群徑,但其實從小巷步出就可以見到鳳群徑,腳程只係15秒。

❸ 大阪日本料理等候時間比較長,單叫一款大概要15分鐘,而多叫幾款就要等得較耐,部份更要等候1小時。

❹ 飛陽砂鍋粥潮州打冷小廚等候時間亦大概15分鐘。

❺ 大阪日本料理方面最好預早打電話落單。










大阪日本料理

  • 元朗鳳琴街18號玉龍樓地下15號舖
  • 星期一全日休息;星期二至日12:00 – 15:00、17:30 – 22:30
  • 2332 1611

飛陽砂鍋粥潮州打冷小廚

  • 元朗鳳攸南街3號好順景大廈地下8號舖
  • 星期一至二17:30 – 22:00;星期三全日休息;星期四至日17:30 – 22:00
  • 2944 0598

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


中環鬧市3條街有6個T形街牌 1幢建築物有4個街牌通通近蘭桂坊?
驚現外賣版Omakase?上水超抵食日式定食店款款外賣限定 專用碗放有蝦茶碗蒸便攜又「靚仔」
老闆娘係姜糖?大角嘴全新兩餸飯店有驚喜 近30款餸任揀三餸飯僅$37!
深水埗黃竹街2間小食店僅幾步之遙 即試黑椒牛漢堡Crossover和牛牛丸
重陽去拜山!上水出發經沙嶺公墓直闖麥景陶碉堡 圓嶺仔一河之隔眺羅湖口岸
旺角鬧市3塊超古老T形街牌探究 快富街/黑布街/奶路臣街成區內碩果僅存舊街道
【野餐隨行】筲箕灣道2間餐廳毗連炸雞店電車站 直闖大浪灣泳灘沖浪勝地野餐
樓上咖啡店自選高水準五品料理!旺角西洋菜南街神秘角落點只賣咖啡綠茶
【野餐隨行】大埔商場便攜素食便當/一口雲吞蝦籽麵 元洲仔全海景公園Chill住歎咖啡
上水Homy Cafe 9月尾結業 咖哩雞扒香口惹味 上水千萬公廁旁小公園野餐
【野餐隨行】上水罨耷微舖小食醬汁乃精華所在 市中心野餐地有枱有櫈兼參觀豪華公廁?
太安樓起家!筲箕灣東大街人氣雪糕班戟 暖笠笠法式甜品配涼浸浸雪糕球 歎埋消暑雪頂茶飲啖啖舔舔脷
近大潭水塘!陽明山莊僅存殖民時代皇冠電話亭 紅噹噹包廂懷舊味濃
【野餐隨行】油麻地一級歷史建築鬧市空中花園野餐 神秘台式廚師發辦$100有找!
【野餐隨行】石硤尾池畔叢林小餐廳歎日式超靚便當 街角文具店兼賣醉雞麻醬蕎麥麵
大角嘴迷你威尼斯西餐廳Risotto出色 中西合璧加臘味賣Fusion?