兩個人影吓相,  港島,  神秘之地

免搭船!穿梭大橋徒步過海往返香港仔鴨脷洲 360度探視珍寶海鮮舫最後景象

瀏覽次數:104
個人瀏覽過





位於南區深灣、靠近香港仔嘅珍寶海鮮舫因疫情已停業2年,最近宣佈將於6月正式移離香港,而近日珍寶海鮮舫嘅一艘廚房躉船又突然傾側,如同鐵達尼號般向下沉,令珍寶海鮮舫成為話題,吸引唔少人前往影相留念。我哋決定都帶大家拍拖兩個人去巡察呢個最早建於50年代嘅珍寶王國,有半個世紀歷史,但編輯打算帶大家一方面360度探視珍寶海鮮舫,另一方面會順道帶大家徒步遊走香港仔至鴨脷洲,睇完你就會發現,步行過海比搭船過海更方便快捷!

黃竹坑、香港仔、鴨脷洲隔住香港仔避風塘、深灣,三地只有一道陸路連接,而唔少人來往香港仔至鴨脷洲,都只會諗到乘搭香港仔嘅橫水渡,以致依賴橫水渡嘅人數不少。但事實上該唯一陸路不單止供車四線來回行駛,亦有兩邊行人通道容許行人徒步往返,黃竹坑方向起點為香港仔工業學校對面,鴨脷洲起點則為鴨脷洲公園。而該陸路為鴨脷洲大橋,全長有230米,為一道箱梁橋,橋高約14米,橫跨香港仔海峽,將黃竹坑、香港仔、鴨脷洲完全連接。

鴨脷洲大橋一端為深灣海峽,不過近年就被地下鐵路南港島線阻擋,否則可以完全直視珍寶海鮮舫;另一端則為香港仔避風塘,香港仔與鴨脷洲兩岸景色一覽無遺。而橋底下不時有漁船經過,穿梭香港仔避風塘,以往端午節更可睇爬龍舟。整體風景亦算不俗,抬頭既可望Jumbo珍寶海鮮舫一角,亦可眺望海洋公園機動遊戲。如果將大橋髹上鮮艷奪目嘅色彩,大概會變成乜乜人氣打卡位。

於鴨脷洲公園轉向右邊鴨脷洲海傍道,走向深灣軒、南灣方向,經過剛才走過嘅鴨脷洲大橋橋底,就可以從海傍道眺望珍寶海鮮舫,此角度更可觀望剛剛因入水而傾斜及向下沉嘅廚房躉船,廚房位置為珍寶海鮮舫、太白海鮮舫後面。海傍道能夠環瞰深灣至布廠灣一帶,既可直視珍寶海鮮舫背面,亦可遠眺海洋公園機動遊戲,環境尚算寧靜,捕魚嘅漁船佈滿海面,泊滿整個海灣,部份不時穿梭香港仔避風塘。

如果想前往珍寶海鮮舫正面方向,就要返回剛才鴨脷洲大橋嘅黃竹坑方向,又或者係經橫水渡返回香港仔,轉右邊方向並依循香港仔海傍道走,經香葉徑穿過小橋,直到黃竹坑南朗山道,只需向深灣遊艇會方向步行,就可以到達珍寶海鮮舫正面方向。從南朗山道轉入惠福道,經珍寶閣轉入旁邊捷徑小路,下行樓梯就會到達迴旋處,同時可下瞰珍寶海鮮舫入口,附近可見MARINA TOWER。

珍寶海鮮舫頂端有大大隻字寫有英文JUMBO,深灣海域當中可見大型躉船停泊於海灣,並於水上經營中菜餐廳,附近漁船眾多,不時穿梭至香港仔、鴨脷洲。不過,現時除咗漁船,海面更多咗唔少遊艇,到底多數遊艇又係從邊度嚟呢?

珍寶海鮮舫旁邊有太白海鮮舫、海角皇宮等海鮮船,但大多數人都將珍寶王國統稱為珍寶海鮮舫,珍寶王國曾經擁有一片繁華景象,構成著名香港仔地標。當中,太白海鮮舫建於1950年,比珍寶海鮮舫歷史悠久,規模亦大,係由水上人開設嘅中式酒樓,香港仔有多艘相似漁船,又叫歌堂躉,主要用作經營酒席生意,後來從香港仔海傍道移師深灣;而海角皇宮則建於1958年,只係不到4年就被澳門賭王何鴻燊收購,更改裝成賭船移師澳門,淨低部份繼續於香港經營。至於較多人認知嘅珍寶海鮮舫,由擁有太白海鮮舫嘅王老吉集資,並於60年代末先建成,但到1971年又發生四級大火事件,翌年以3000萬港幣將業權賣俾何鴻燊、鄭裕彤,重新建立新船,最後珍寶海鮮舫於1975年先喺香港仔重開,創下一個高峰期。聽聞當時有外國遊客會將硬幣投擲落海,海底滿佈一個個硬幣,有人甚至會潛落水底嘗試掘金,有傳部份人曾經因此得到千元收入。其後,珍寶海鮮舫於2003年又重新裝修,正式合稱珍寶王國。

講到珍寶海鮮舫,最為人熟悉嘅一定係各個電影場面,皆因多部電影都曾經於海鮮舫取景,除咗李小龍主演嘅《龍爭虎鬥》、美國荷里活電影《生死戀》,其中周星馳主演嘅電影《食神》就係佼佼者,電影中嘅第二十八屆超級食神大賽嘅食神爭霸戰場面就於珍寶海鮮舫拍攝,有味公主之稱嘅食神大賽評委薛家燕就坐於2樓金鑾殿皇帝龍椅上,從電影畫面中可見,室內以仿宮廷式設計,滿佈壁畫、裝飾,場面金碧輝煌。

而事實上,珍寶王國本來一度由香港仔飲食集團打骰,母公司為新濠國際發展有限公司,後來於2020年將海鮮舫捐俾海洋公園,但目前被疫情影響,飲食業、旅遊業被直接衝擊,因資金經費不足,入不敷支,加上未能尋獲第三方機構繼續營運,決定將整個珍寶王國移離香港,都算係一個時代嘅結束。

從外面可見,珍寶海鮮舫深灣碼頭豎立嘅歡迎光臨牌包含中文、英文、日文翻譯,可見珍寶海鮮舫曾經係廣為旅客認識嘅地標,有人更喺深灣碼頭兜客,每人付$50就可以到珍寶海鮮舫門口參觀,但去唔去就自由選擇。由碼頭眺望,可見珍寶海鮮舫樓高3層,地方偌大,滲透中式皇宮風格,據知荷蘭阿姆斯特丹海上皇宮都係依據珍寶王國嚟設計。另外,近期人氣男團Mirror嘅《All in One》音樂錄影帶亦曾選址珍寶海鮮舫拍攝,但講到最值得留意嘅地方,一定係英屬香港居民嘅祖國英女皇伊利沙伯二世亦曾經到訪珍寶海鮮舫啦!




E.A.Tips :

❶ 深灣碼頭有小船可往返珍寶王國,但人均$50。

❷ 鴨脷洲大橋黃竹坑方向入口為香港仔工業學校對面,而鴨脷洲方向入口則為鴨脷洲公園對出。

❸ 從赤柱乘搭小巴路線52號,可以直達黃竹坑。

❹ 香港仔至鴨脷洲橫水渡船程雖然只係2分鐘,但沿兩邊海傍道走向正面及背面珍寶王國則比較遠。












鴨脷洲大橋

  • 鴨脷洲

珍寶海鮮舫

  • 鴨脷洲

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


西貢外賣限定英式炸魚薯條專門店 最高人氣係邊款小食?
經偽鳥居登長洲最高點北眺亭 關公忠義亭附近躲藏超隱秘殖民時代懷舊T形街牌/皇冠郵筒
【野餐隨行】牛頭角消失的後山?鱷魚山81米高隱蔽小公園眺海景 歎近50年老牌上海菜館米芝蓮正宗滬菜
後生仔主理!旺角女人街$50海南雞飯 4款口味有咩揀?
【野餐隨行】元朗人氣壽司丼飯店係驚喜定驚嚇?公園大草地野餐望姆明小屋百鳥塔
旺角點心專門店外賣自取!$56一個人點心拼盤唔使怕選擇現分歧
娛苑起步!142級樓梯登元朗後山豬黃嶺 超矮標高柱眺望雞公嶺淋坑山
樂富唯二!茶餐廳中伏食物多?尋隱藏三和砵仔蒸飯水準不俗
東梅古道起步登昂坪救援徑現代棧道 一隅400米高近距離下瞰香港赤臘角機場宛如觀景台
【野餐隨行】天水圍新北江商場消暑刀削麵 實試公園湖邊草地旁用餐到底有咩問題?
離潮流特區僅3分鐘步程!旺角砵蘭街越南河內料理必食牛柳粉 牛湯濃郁菜式地道
【土瓜灣半日遊】前馬頭圍大廈朝聖193 Cafe!香港花見小路/日系粉紅橋打卡 牛棚藝術公園探索牲口棚遺跡【野餐隨行】
【野餐隨行】隨手買午餐登灣仔半山!跑馬地箕璉坊藏配水庫大草地緩跑徑
招牌豬骨煲材料充足滿口骨膠原 大角嘴靚煲皇賣高水準火鍋餐
舊店傳承!灣仔70年老字號小食店細舖搬大舖 年輕人接手重現臘味糯米飯/港式街頭小食
愉景灣小歐洲度假風情 大嶼山稔樹灣菲人村旁藏長沙欄無人沙灘