葵涌點心燉湯專門店同區2間分店！10款足料燉湯+11款黏軟蒸飯任揀

香港人工作忙碌，好多時候都少有自己煮飯煲湯，主打住家燉湯嘅小店愈開愈多，有啲燉湯隨時醉到劏，有啲就無味精而滋潤十足，可能會適合唔煮飯又唔煲湯嘅拍拖兩個人享用。

原本位於荃灣嘅一意點心燉湯專門店，顧名思議係以點心、燉湯為主，近月將大本營轉移至葵涌，目前同區更有2間分店，其中1間位置就靠近人氣店嘉寶漢堡。店內餐牌同樣以燉湯、點心為主，更配有蒸飯、滋潤飲品選擇，對於無飯家庭應該會幾適合。

當中，有11款蒸飯，有指係砂鍋蒸飯，其中一款為經典嘅鳳爪排骨飯$43，飯粒微黏，有飯香，質感黏軟，唔會太乾身，而鳳爪都算入味，排骨肉質亦軟腍。飯粒內除咗已經加添甜豉油，亦有肉香，但唔算重，大概係有少少排骨肉香滲入飯粒內。

店內有10款燉湯，當中一款叫做百、海、無、雪$38，望落略有詩意，但其實令人完全一頭霧水，只不過飲落就馬上知道該燉湯係咩意思，簡單嚟講，即係百合海底椰無花果雪耳湯，有效潤肺、護肺，而且合家佳宜，燉湯暖笠笠而滋潤。燉湯內湯料份量充足，除咗4款主要材料，湯渣中亦有豬骨、杞子，清甜潤喉，湯水比較稠身，表面有少少油份。外賣湯盒嘅盒蓋為特製，令湯汁唔容易溢出，令外賣更為方便，甚至可以繼續循環使用。

至於點心則需時約8至15分鐘，每款點心都係即叫即蒸，鮑魚燒賣$30/2粒、蝦餃$30/4粒，燒賣肥肉唔多，但有種以前啲燒賣嘅豬油香，表皮唔會軟爛，頂端依附一小隻鮑魚仔，感覺矜貴，但鮑魚燒賣同普通燒賣價錢相差不大；蝦餃則有爽口彈牙蝦肉，蝦仁份量適中，蝦汁唔會太鹹；而柱候金錢肚$28 份量尚算適中，醬汁濃稠，蒸得軟身，容易咬入口，配角豆卜都能吸收醬汁精華，不過醬汁比以往酒樓嘅金錢肚稍為淺色。馬拉糕$16 甜度適中，質感略有鬆軟，不過就有啲紮實，唯獨外賣無茶水提供佐以點心係略為遜色。