中菜,  九龍,  兩個人影吓相,  兩個人醫吓肚,  和你Taste,  神秘之地,  野餐隨行

【野餐隨行】牛頭角消失的後山?鱷魚山81米高隱蔽小公園眺海景 歎近50年老牌上海菜館米芝蓮正宗滬菜

瀏覽次數: 38
個人瀏覽過





香港有唔少隱藏小山丘,牛頭角表面多為住宅區,但其實本身係一座名為鱷魚山嘅小山,山上有一個清靜小公園,適合拍拖兩個人前往,既可俯視牛頭角、觀塘一帶市景,亦可眺望海景,今次編輯帶同山下一間老牌上海菜館嘅菜式野餐,發覺係一個鮮為人知嘅野餐好地方。

位置同時靠近觀塘、牛頭角住宅區嘅上海榮華川菜館,離瑞和街市政大廈不遠,由1975年開業至今有近50年,切切實實係老字號街坊店,現時係一間舊店傳承嘅小店,由80後年輕人接手。室外門面透視幾分舊時色彩,室內裝潢則與港式傳統冰室無異,陳舊中略有簡潔,簡約中帶有懷舊感,原來該店曾經於2012年獲米芝蓮指南選為優質食店推介,估唔到竟然係一間米芝蓮高級食府。

上海菜一般統稱為滬菜,傳統叫本幫菜,亦有衍生嘅其他西菜,多數以濃油赤醬為重點,色澤搶眼,湯汁、醬汁醇厚,味道通常係酸、甜、鹹、糟,有獨特色香味。牛頭角近觀塘嘅呢間老牌菜館,就包含唔少正宗上海菜式,但多數以點心類為主,比如係小籠包$48、紅油抄手$55、豆沙鍋餅$55、酥炸雲吞$53等,亦有少量傳統名菜,例如菜九王鱔糊、回鍋肉、花雕醉雞、砂窩雲吞雞,甚至係8種乾果及中藥材沖泡而成嘅八寶茶,但主要都係點心、湯麵、粗炒、飯餐

由小店步行找尋附近野餐點,最方便快捷嘅係前往背後小巷樓梯,步行直接登上康寧道公園一期或二期,但編輯又豈會只帶大家到呢種普通公園?事實上,離康寧道公園不遠處,有一個隱密好地方,位於牛頭角鱷魚山上,擁有清靜環境,更有觀景位,而且人流極少,以往此位置更可以觀賞煙花景。

小公園位於康利道休憩花園,靠近觀塘功樂道,內有幾個涼亭,既有戶外座位,亦有有蓋座位,遮陰遮雨皆宜。從小平台俯視,可觀賞牛頭角至觀塘市景,山腳多為樓宇,亦可眺望海景,甚至遠眺港島東、啟德方向,只不過編輯當日為少雨天,霧氣重,故未有清晰景觀。

各款撚手菜式除咗上海擔擔麵$42、上海湯麵$52、陽春麵$40,亦有酸辣湯麵$60,以中式滬菜為主打,並無花巧,款款都算經濟實惠。不過,酸辣湯底就貌似調校過辛辣度,酸勁十足,但辣度係本地人容易接受嘅程度,相對最正宗嘅酸辣湯嘅辣度,明顯較為溫和,但又不失辣感。如果專程想食傳統酸辣湯嘅辣同重口味,可能未必適合,只係對於唔太容易接受太辣中菜口味嘅人嚟講,就會較適合。

酸辣湯內餡料豐富,除咗木耳絲、肉絲、豆腐,重有紅蘿蔔絲、豬肚絲、豬皮、筍絲等,相當爽口,令層次更明顯,紅蘿蔔絲令色澤更搶,如剛才所言,辛辣度唔算重,酸中滲出微辣,較為溫和,反而酸度較重,湯底醒胃。湯麵固然為上海麵,由於湯汁比較濃稠,狀似芡汁,麵條亦算容易掛湯,麵質偏軟身,但不至於糊口,食耐啲又變返稀身。

另外,炒飯、粗炒亦算不俗,例如係上海粗炒$68、豬扒粗炒$75,甚至素菜粗炒$75,粗炒就如同港式街頭炒麵,烏龍麵炒得香口,水份有滰乾,又唔算油膩,醬油黏滿每一條麵條,豬扒肉質軟腍,唔會嚡口,醃料亦不至於太鹹,椰菜份量算適中。

其實,該小公園正正位於鱷魚山上,但鱷魚山只係一個已經逐步消失嘅牛頭角小山丘,皆因鱷魚山已經被完全發展為高級住宅地帶,其他建築物分別係聖傑靈女子中學、康利苑、觀塘廣蔭老人院,故此大家係難以搵到上山路段。資料顯示,鱷魚山又叫樂意山,只不過係同意頭有關,山頂海拔高約70米,而從地圖中可見,康利道休憩花園海拔高約81米,位置已屬現時牛頭角鱷魚山一帶最高點。




E.A.Tips﹕

❶ 巴士路線28S、小巴22M,35,36A 可直接上康利道附近。

❷ 小店位於牛頭角至觀塘中間,比較近觀塘。

❸ 崇仁街有一道小樓梯,位於小店後面,可經康寧道公園,轉出康寧道,可循功樂道上行,前後分別係功樂道出入口。

❹ 功樂道第一個分岔路口可由下而上步行上康利道休憩花園,第二個分岔路口就可依康利道步下行至康利道休憩花園。

❺ 康利道休憩花園有有幾個涼亭,落雨都可以食飯,不過瓦遮頭可能有少少位會滴水。

❸ 野餐時,自己垃圾謹記自己帶走!

❹ 野餐要盡量使用可循環再用之餐具器皿。

❺ 可以挑選有長櫈嘅地方,會較方便。

❻ 有需要可自備小餐枱、小型露營櫈用餐,可以隨時去到邊食到邊。

❼ 野餐時正對海景用餐會比較Chill。

❽ 最好挑選較少人嘅地方,避免接觸人群。

❾ 野餐地同食肆最好距離不足15分鐘步程,以免食物及熱飲冷卻,有需要就自備保溫袋。

❿ 野餐時最好唔好完全除晒口罩,拉低口罩用餐時一定要拎住食物或飲品。


上海榮華川菜館

  • 觀塘崇仁街15號地下
  • 12:30 – 14:30、18:00 – 22:00
  • 2341 0583

康利道休憩花園

  • 牛頭角
  • 24hours

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


西貢外賣限定英式炸魚薯條專門店 最高人氣係邊款小食?
經偽鳥居登長洲最高點北眺亭 關公忠義亭附近躲藏超隱秘殖民時代懷舊T形街牌/皇冠郵筒
後生仔主理!旺角女人街$50海南雞飯 4款口味有咩揀?
【野餐隨行】元朗人氣壽司丼飯店係驚喜定驚嚇?公園大草地野餐望姆明小屋百鳥塔
旺角點心專門店外賣自取!$56一個人點心拼盤唔使怕選擇現分歧
娛苑起步!142級樓梯登元朗後山豬黃嶺 超矮標高柱眺望雞公嶺淋坑山
樂富唯二!茶餐廳中伏食物多?尋隱藏三和砵仔蒸飯水準不俗
東梅古道起步登昂坪救援徑現代棧道 一隅400米高近距離下瞰香港赤臘角機場宛如觀景台
【野餐隨行】天水圍新北江商場消暑刀削麵 實試公園湖邊草地旁用餐到底有咩問題?
離潮流特區僅3分鐘步程!旺角砵蘭街越南河內料理必食牛柳粉 牛湯濃郁菜式地道
【土瓜灣半日遊】前馬頭圍大廈朝聖193 Cafe!香港花見小路/日系粉紅橋打卡 牛棚藝術公園探索牲口棚遺跡【野餐隨行】
免搭船!穿梭大橋徒步過海往返香港仔鴨脷洲 360度探視珍寶海鮮舫最後景象
【野餐隨行】隨手買午餐登灣仔半山!跑馬地箕璉坊藏配水庫大草地緩跑徑
招牌豬骨煲材料充足滿口骨膠原 大角嘴靚煲皇賣高水準火鍋餐
舊店傳承!灣仔70年老字號小食店細舖搬大舖 年輕人接手重現臘味糯米飯/港式街頭小食
愉景灣小歐洲度假風情 大嶼山稔樹灣菲人村旁藏長沙欄無人沙灘