兩個人影吓相,  新界,  神秘之地

20分鐘步程放眼擔杆洲魚塘景!探索白鶴洲麥景陶碉堡+米埔邊境禁區

瀏覽次數: 24
個人瀏覽過





講到香港邊境風景地帶,通常會諗到靠近上水、沙頭角嘅地方,比如係鹿頸、鳳坑、谷埔,今次編輯就帶大家去靠近新田、而又較少人走過嘅邊境地帶,當中可以放眼魚塘景,觀察候鳥,亦隱藏一座英屬香港時期嘅重要建築物,更可以拍拖兩個人去探索邊境禁區前嘅風景。

於米埔村站落車,前行1分鐘後轉入擔竿洲路,可從青山公路米埔段直搗盡頭邊境禁區前,最末端為米埔自然保護區出入口、世界自然(香港)基金會辦事處,靠近元朗米埔濕地。

前往白鶴洲麥景陶碉堡(MacIntosh Forts)之前,沿途可放眼擔杆洲魚塘景色,亦可遠眺雞公嶺、羅天頂,初段更有一個個石像,有日式、泰式風格,好似想營造出一個迷你小公園模樣。由於靠近米埔觀鳥屋,魚塘附近不時有候鳥翱翔,候鳥數量未必係聚集,有啲分散,但候鳥種類不一,都算係比較方便嘅觀鳥之地。

左邊擔杆洲魚塘如同一個個調色盤,魚塘風光一覽無遺,而右邊則可遠眺深圳方向高樓大廈,對岸為皇崗口岸、福田區,而深圳河之隔就係另一個地方,相信天上輕鬆愉快翱翔嘅雀鳥目前應該難以分辨兩岸地方。另外,右邊方向遍佈草堆,以魚塘濕地同草堆狀態嚟睇,恍如元朗盛屋村、上水虎地坳村、粉嶺鹿頸南涌亭,估計係一個可以觀賞鳳眼藍嘅地方。

一直依循擔竿洲路走約20分鐘,穿過魚塘之後,就可以抵達位處白鶴洲嘅麥景陶碉堡,係米埔區內嘅白鶴洲警崗,Google地圖上叫做白鶴洲行動基地,你以為佢係一個碉堡,其實佢係一個哨站。事實上,全港麥景陶碉堡合共有7座,建於英屬香港時期,大概係1949至1953年,由當時嘅警務處處長麥景陶下令興建,通通置於邊境禁區山嶺,為英屬香港警崗,用作監視對岸解放軍同邊境形勢,以防共產黨難民湧入爆發衝突,簡單嚟講就係一個當時嘅瞭望台,又或者新界邊防線。而現時麥景陶碉堡作用已改變,主要用途有指變成反偷渡、打擊跨境罪行,但瞭望台唔再係人手操作,改為電子監察,驟眼睇似乎係已經被荒廢,但目前沿途又見到有警車往來擔竿洲路,但估計係巡邏米埔沼澤區。

白鶴洲麥景陶碉堡同上一次編輯帶大家探視嘅馬草壟麥景陶碉堡基本相同,馬草壟警崗同白鶴洲警崗都以綠色為主調,樓高兩層,以混凝土建成,牆身為防彈牆,可作防衛用途,並設計成八邊形,主樓外有洗手間、休息室、煮食區,甚至水塔、發電機房。整座麥景陶碉堡同樣被鐵絲網包圍,嚴禁公眾進入,不過7座麥景陶碉堡於1997年均被列為二級歷史建築物,白鶴洲同馬草壟嘅警崗一樣,亦可以於麥景陶碉堡後觀賞魚塘景色,只不過海拔高度比較低。

繼續沿路進入,會經過米埔自然保護區停車場、白鶴洲公廁迴旋處,呢個時候就要注意,右邊方向已到達邊境禁區範圍,對岸則為皇崗口岸,謹記切勿超越!而左邊則可通往米埔自然保護區出入口、米埔訪客中心,沿路仍可見魚塘景色,而候鳥翱翔之景比剛才擔扞洲路更豐富。不過,進入「米埔自然護理區」受《野生動物保護條例》限制,部份更屬米埔內后海灣拉姆薩爾國際重要濕地,以免米埔沼澤區內野生生物受到滋擾,要注意跨過圍欄隨時會犯上罪行,兼要罰款,所以千祈唔好隨意走入米埔自然保護區範圍內!

黃昏時份原路折返,可於擔扞洲魚塘觀賞西北方嘅日落景色,黃金夕陽斜照風景正好為一日遊作結。倘若仍然意猶未盡,可以繼續經合盛圍、青龍村,前往新田郵政局方向,遊覽東山古廟、新田公園、大夫第、魚塘藍屋,甚至對面嘅文天祥紀念公園,沿途一直有巴士、小巴路線往返元朗或上水。




E.A.Tips :

❶ 麥景陶碉堡係禁上進入,謹記唔好攀爬越過圍欄。

❷ 米埔禁區亦係禁上進入,要進入就必須事前申請,否則會干犯刑事罪行,而且會被罰款5萬蚊。

❸ 申請邊境禁區通行證可於連結預先申請﹕https://www.wwf.org.hk/reslib/resources/forms/fca_permit_application_form/。

❹ 進入米埔自然護理區前,要預先申請進入米埔沼澤區許可證,必須清晰地闡述申請原因。

❺ 乘搭巴士路線76K,可於米埔村站落車,前行轉入担竿洲路就可以直搗白鶴洲麥景陶碉堡及米埔邊境。

❻ 注意担竿洲路不時有大車小車出入,而且只有一條雙向行車路,要小心安全。








餐廳名稱

  • 地址
  • 營業時間
  • 電話

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


旺角$48越南版海南雞飯 同價海量湯粉似足二人份量
【野餐隨行】慈雲山8月新店外賣自取平過堂食 肉醬意粉多料到滿瀉套餐$40有找 公園自製High Table歎高汁炸雞/Pizza
一餐麻甩與斯文兼備!元朗隱藏版料理店躲藏小巷賣日本魚生飯 與潮州滷味店僅相隔15秒步程
西貢林蔭秘道登小堤壩眺榕樹澳漁排 水浪窩闖企嶺下賞紅樹林尋港英時代郵箱
香港西端舂坎角泳灘賞絕美夕陽餘暉 海水清澈見底完勝赤柱沙灘 西環兒時回憶傳統餅店月餅預告【野餐隨行】
香港仔偽築地帆船野餐有遮蔭 鯨魚主題小店賣魚市場直送龍躉漢堡 揭人氣日本餐廳5大問題疑不尊重客人【野餐隨行】
【野餐隨行】長洲掃街掃盡6間小店!小島必揀經典魚湯/魚燒/大魚蛋 北端沙灘海旁自製迷你Party
【野餐隨行】元朗國公園大草地歎超靚韓式吐司 款款內餡含400次滑蛋
30分鐘內輕鬆登邊陲白虎山 探索英屬香港麥景陶碉堡 蓮麻坑一路之隔眺香園圍口岸
新手路線扯旗山VS高階路線奇力山!最高登山點360°環抱港島靚景 同遊山頂空中花園連百年古蹟歷史建築物
陳舊藍屋搵唔到入口?筲箕灣隱藏版炸雞Pizza即叫即製正過連鎖店 高水準脆意雞10間分店竟淨1間!
全港3間分店!油麻地樓上泰國菜用App買外賣享9折優惠 芒果糯米飯宛如當地水準
【野餐隨行】北角潮州飯店高水準鹵水鵝片 尋海旁小型狗公園野餐
蕃茄濃湯海量茄蓉! 長洲火車頭酸辣小窩餸菜自由配搭
【南丫島一日遊】碼頭皇冠郵筒起步!20分鐘步程經神風洞闖索罟灣蘆鬚城村神秘沙灘 長期擁一級水質假日全灘僅廿人?
石壁快閃遊!全港最大水塘三甲探索監獄前皇冠郵筒/古老石刻 貝澳超長淺灘遍佈水牛