兩個人影吓相,  兩個人醫吓肚,  和你Taste,  日本菜,  野餐隨行

【野餐隨行】元朗人氣壽司丼飯店係驚喜定驚嚇?公園大草地野餐望姆明小屋百鳥塔

瀏覽次數: 9
個人瀏覽過





元朗國有唔少街坊美食,都維持街坊價錢,令居民都可以於合理價錢用餐,當中就有一間係區內拍拖人氣壽司丼飯店,編輯每次經過都見到大排長龍,未能堂食嘅編輯則嘗試兩個人叫外賣,結果要等候20分鐘,到底最後係驚喜定驚嚇?應該棒下出孝子,定和善表達意見呢?

店內以壽司、刺身、丼飯為主,貌似港日料理,招牌款式係自選丼飯、丼飯套餐,更特別之處係一碗三文魚麵豉湯、茶碗蒸,套餐經濟實惠,以丼飯套餐為例,最平$52起。網上有食評寫套餐有麵豉湯、沙律,但編輯發現根本無沙律,只配有麵豉湯,比較得別嘅係變成三文魚熬煮嘅湯,內有蘿蔔薄片、豆腐粒,味道不俗,幾有驚喜。

丼飯套餐分蕎麥冷麵配壽司定食,以及梅、竹、松三款壽司Set,當中梅Set$78包含有三文魚2件、赤身1件、油甘魚1件、鱆紅魚1件、日本魷魚1件、甘蝦1件、帶子1件、加州卷2件,全部都為壽司,再加上一份茶碗蒸,份量睇餐牌幾豐富,但實際上唔算多。壽司上魚生件件亦算正常水平,未算好新鮮,亦唔係好肥美感覺,帶子較鮮甜而爽口,其他魚類都算不過不失,魚香唔算重,亦唔太油潤。

呢份Set其實都係幾驚嚇,有啲中伏感覺,一來外賣賣相比較差,二來份量唔多,壽司賣相亦可以當作不過不失,但茶碗蒸真係實在太差,一望而知係由堂食碗倒轉反轉移到外賣膠碗內,蒸蛋四散,碎裂一地。茶碗蒸雖然賣相甚差,但蛋液質感亦算滑溜,蛋內有粉絲、鳴門卷、冬菇,並無蟹柳,材料簡單。

小店只係提供有Wasabi,但就無提供豉油,由於到公園草地外賣,難以忽然找尋壽司豉油,故此只能硬住頭皮唔蘸豉油,編輯承認自己攞外賣無即時查清楚係有所疏忽。當然,最好嘅壽司、刺身係唔應該蘸豉油,皆因豉油係會破壞壽司、刺身嘅原味同鮮甜味,連新鮮感都難以品嚐。而店內壽司則不過不失,喺唔蘸豉油嘅情況下都頂得住,只係唔算係咩高水準,到底好唔好就見人見智啦。

反而較平嘅京蔥粒粒魚生丼$52 就稍有驚喜,魚生切粒,魚肉反而比壽司偏厚身,油甘魚、三文魚等都充滿魚油味,少量三文魚腩更滲出魚脂香,魚肉鮮甜,丼飯旁有配菜,比如魚子、青瓜等,增加口感層次。盒內飯量唔多,所以無豉油都無乜問題,食完魚生之後,剛剛好食完白飯。

元朗公園係全區擁有最大面積草地嘅地方,每次於元朗買外賣之後,多數都可以選擇前往元朗公園野餐,一來非常方便,二來有足夠空間,三來人流分散,草地上隔離嘅人唔會好近。公園內,不單百鳥塔係著名地標,而姆明公園亦係近月嘅打卡點。




E.A.Tips﹕

❶ 店舖位處教育路,離元朗公園只係不足10分鐘步程。

❷ 小店係一間被標籤為少鹽少糖嘅食店。

❸ 堂食要先用the gulu攞飛,多數需要等待較長時間。

❹ 外賣可以先於app落單,然後自取,通常要等待約半小時。

❸ 野餐時,自己垃圾謹記自己帶走!

❹ 野餐要盡量使用可循環再用之餐具器皿。

❺ 可以挑選有長櫈嘅地方,會較方便。

❻ 有需要可自備小餐枱、小型露營櫈用餐,可以隨時去到邊食到邊。

❼ 野餐時正對海景用餐會比較Chill。

❽ 最好挑選較少人嘅地方,避免接觸人群。

❾ 野餐地同食肆最好距離不足15分鐘步程,以免食物及熱飲冷卻,有需要就自備保溫袋。

❿ 野餐時最好唔好完全除晒口罩,拉低口罩用餐時一定要拎住食物或飲品。


魚一壽司

  • 元朗教育路68號兆豐樓地下7號舖
  • 11:30 – 15:30、16:30 – 22:00
  • 2485 2121

元朗公園

  • 元朗公園北路1號
  • 24hours
  • 2473 6511

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


西貢外賣限定英式炸魚薯條專門店 最高人氣係邊款小食?
經偽鳥居登長洲最高點北眺亭 關公忠義亭附近躲藏超隱秘殖民時代懷舊T形街牌/皇冠郵筒
【野餐隨行】牛頭角消失的後山?鱷魚山81米高隱蔽小公園眺海景 歎近50年老牌上海菜館米芝蓮正宗滬菜
後生仔主理!旺角女人街$50海南雞飯 4款口味有咩揀?
旺角點心專門店外賣自取!$56一個人點心拼盤唔使怕選擇現分歧
娛苑起步!142級樓梯登元朗後山豬黃嶺 超矮標高柱眺望雞公嶺淋坑山
樂富唯二!茶餐廳中伏食物多?尋隱藏三和砵仔蒸飯水準不俗
東梅古道起步登昂坪救援徑現代棧道 一隅400米高近距離下瞰香港赤臘角機場宛如觀景台
【野餐隨行】天水圍新北江商場消暑刀削麵 實試公園湖邊草地旁用餐到底有咩問題?
離潮流特區僅3分鐘步程!旺角砵蘭街越南河內料理必食牛柳粉 牛湯濃郁菜式地道
【土瓜灣半日遊】前馬頭圍大廈朝聖193 Cafe!香港花見小路/日系粉紅橋打卡 牛棚藝術公園探索牲口棚遺跡【野餐隨行】
免搭船!穿梭大橋徒步過海往返香港仔鴨脷洲 360度探視珍寶海鮮舫最後景象
【野餐隨行】隨手買午餐登灣仔半山!跑馬地箕璉坊藏配水庫大草地緩跑徑
招牌豬骨煲材料充足滿口骨膠原 大角嘴靚煲皇賣高水準火鍋餐
舊店傳承!灣仔70年老字號小食店細舖搬大舖 年輕人接手重現臘味糯米飯/港式街頭小食
愉景灣小歐洲度假風情 大嶼山稔樹灣菲人村旁藏長沙欄無人沙灘