兩個人影吓相,  兩個人醫吓肚,  和你Taste,  新界,  港式,  野餐隨行

食神叉燒飯賣幾錢?元朗鹵味店兼賣燒味鹵汁香濃惹味 工業區搜羅【野餐隨行】好地方

瀏覽次數: 62
個人瀏覽過





元朗食店有好多,單單教育路就有多個選擇,其中一間鹵味店就受到區內街坊推介,主打鹵味,亦兼賣多款燒味,以鹵汁混合燒味,鹵汁鹵得入味,無論係蜜汁叉燒嘅蜜汁,抑或鹵家鴨嘅鹵汁都香甜惹味,當中有幾多款燒味可擇呢?今次帶大家到元朗,除咗元朗公園重有邊度可以野餐呢?

據稱店內大廚曾任職米芝蓮星級酒店燒味部,牆上只有簡單招牌菜嘅相,裝潢由外到內簡單得似國內鹵味店,但出品吸引唔少街坊支持,燒味、鹵味選擇唔少,包括蜜汁叉燒皇、頭抽豉油雞、特制鹽香雞、秘汁鹵家鴨、秘制鹵家雞、鹵家鵝片、梅子脆燒鴨、金牌脆燒鴨、蒜汁豬頸肉、燻蹄併海蜇、台式鹵牛腱,亦可配搭飯或粉麵,拍拖兩個人於菜式上都有唔少選擇。

而元朗除咗元朗公園大草地,重有咩地方可以野餐呢?今次就前往近工業區找尋大空地用餐,搵到東頭工業區遊樂場,內有籃球場、足球場等球場,打波嘅人唔多,人流亦較少,兩旁有座椅,中間亦有小型看台,都可以選擇。

鹵家重點固然係鹵水,而每款套餐有一碗老火湯,為住家湯水味道,亦算足料,豬肉、紅蘿蔔都煲得軟爛,湯底清甜,油份都唔多,都算有火喉。

名稱較吸引人嘅係照抄周星馳電影《食神》「黯然銷魂飯」嘅食神叉燒飯$58,以自家製叉燒,配上煎太陽蛋嘅白飯,但就欠兩條菜芯。白飯比較軟身,叉燒都算大塊,於飯盒內排列整齊,叉燒底下滲出蜜汁,微鹹中帶甜,叉燒表皮色澤吸引,有少少焦脆,略帶焦香,肉質柔軟,甘香鬆化,脂肪較少,為較瘦削嘅叉燒。

皇牌鴛鴦飯$65,任選兩款,叉燒、鹵鴨、燒鴨、鹽香雞、豉油雞,先挑選鹵鴨、鹽香雞,鹽香雞擺上鹵鴨頂端,鹵鴨底又暗藏大豆芽墊底,編輯覺得精髓在於鹵汁,大豆芽吸附鹵汁之後,比鹵肉更出色。

鹽香雞採用雞髀肉,雞肉滑嫩,而且啖啖肉,做法特別,無乜雞油膩感,同白切雞、豉油雞唔一樣,表皮的確帶有輕微鹹香味,只簡單配上蘸白切雞嘅薑蓉蔥油,唔蘸薑蓉蔥油就較單調,但蘸上蔥油就太鹹啦。反而,鹵鴨水準更高,鹵汁鹹中帶甜,唔算太鹹,入口有啲回甘味,鴨皮偏薄,略帶香口,鴨肉亦算嫩滑,入口唔韌,鹵汁將鴨肉亦鹵得入味,鹵汁提升鴨肉鮮味,唔需要蘸嘢,原汁原味更惹味。




E.A.Tips﹕

❶ 由小店走到野餐點,步程約10至15分鐘。

❷ 午市套餐會包湯或飲品。

❸ 東頭工業區遊樂場內有洗手間。

❸ 野餐時,自己垃圾謹記自己帶走!

❹ 野餐要盡量使用可循環再用之餐具器皿。

❺ 可以挑選有長櫈嘅地方,會較方便。

❻ 有需要可自備小餐枱、小型露營櫈用餐,可以隨時去到邊食到邊。

❼ 野餐時正對海景用餐會比較Chill。

❽ 最好挑選較少人嘅地方,避免接觸人群。

❾ 野餐地同食肆最好距離不足15分鐘步程,以免食物及熱飲冷卻,有需要就自備保溫袋。

❿ 野餐時最好唔好完全除晒口罩,拉低口罩用餐時一定要拎住食物或飲品。


鹵家

  • 元朗教育路68號兆豐樓地下10及14號舖
  • 星期一至三11:30 – 22:00;星期四全日休息;星期五至日11:30 – 22:00
  • 2363 0355

東頭工業區遊樂場

  • 元朗宏業東街18號東頭工業區強業街
  • 07:00–23:00
  • 2478 4342

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


【野餐隨行】元朗國公園大草地歎超靚韓式吐司 款款內餡含400次滑蛋
30分鐘內輕鬆登邊陲白虎山 探索英屬香港麥景陶碉堡 蓮麻坑一路之隔眺香園圍口岸
新手路線扯旗山VS高階路線奇力山!最高登山點360°環抱港島靚景 同遊山頂空中花園連百年古蹟歷史建築物
陳舊藍屋搵唔到入口?筲箕灣隱藏版炸雞Pizza即叫即製正過連鎖店 高水準脆意雞10間分店竟淨1間!
全港3間分店!油麻地樓上泰國菜用App買外賣享9折優惠 芒果糯米飯宛如當地水準
【野餐隨行】北角潮州飯店高水準鹵水鵝片 尋海旁小型狗公園野餐
蕃茄濃湯海量茄蓉! 長洲火車頭酸辣小窩餸菜自由配搭
【南丫島一日遊】碼頭皇冠郵筒起步!20分鐘步程經神風洞闖索罟灣蘆鬚城村神秘沙灘 長期擁一級水質假日全灘僅廿人?
石壁快閃遊!全港最大水塘三甲探索監獄前皇冠郵筒/古老石刻 貝澳超長淺灘遍佈水牛
葵涌點心燉湯專門店同區2間分店!10款足料燉湯+11款黏軟蒸飯任揀
元朗燒味人龍店賣燒鵝燒鴨叉燒塞爆飯盒 一盒雙拼飯低至$30平過酒樓!
隱藏中環橫街窄巷 OL至愛健康越式三文治
禮頓山古典復興教堂登一級歷史建築 銅鑼灣鬧市秘道通往避風塘
皇冠郵筒起步!柴灣屋邨後山藏舊式鐵滑梯 引水道側百年英式石橋點解叫猛鬼橋?
九龍寨城舊區半日遊!市建局即將拆卸重建 窺探二戰後舊式建築物 賈炳達道休息站處處
【野餐隨行】沙田瀝源超隱秘街市小店 蒸點心/雲吞麵加添自家製辣椒油火花十足