太子人氣車仔麵湯底鹵汁混腩汁 16款麵底任揀必試低卡蒟蒻麵

個人瀏覽過

香港車仔麵店有好多，要突圍而出就要提供獨特嘅餸菜款式，連麵底都要與別不同，太子有一間車仔麵店於同一區「開雙」，而且受到歡迎，唔少人都拍拖兩個人去撐場，更不時出現排隊情況，變成一間人氣車仔麵店，事實上，餸菜款式有別於平常地踎車仔麵嘅簡樸，連麵底都足足有16款可擇。

以「何車」為店名，讀音似粵劇嘅「合尺」，聽落似中式或港式車仔麵，但從店內裝潢，以致餐牌上嘅麵底同餸菜款式，都似日式風格。當中，車仔餸有關東煮$18、日式豬軟骨$15、日式叉燒$15、竹輪及溫泉蛋$8，小食又有吉列炸蝦、吉列炸蠔、關東煮娃娃菜、大阪燒吉列豬扒、大阪燒餃子雞翼，將多款和食加於車仔餸嘅選擇，拍拖兩個人亦可以更多選擇。

老何麵十餸$62 包含豬皮、豬腸、豬紅、蘿蔔、雞翼尖或雞翼、魚蛋、肥牛、魚片頭、燒腩肉，而細何麵五餸$45 就包含豬皮、豬紅、糖心蘿蔔、鹵水雞翼皇、陳皮魚蛋，糖心蘿蔔份量唔多，但相當清甜不濁而無渣。其實，以車仔麵嚟講，價錢比較貴，到底抵唔抵食就見人見智啦。

自選車仔麵可任揀車仔餸，飛天牛腩$15、何車水魷$15、媽媽水餃$15，何車與三一餃子合作嘅有蒜芯豬肉餃、粟米豬肉餃，但今次挑選咗燒豬頸肉$15、燒牛舌芯$15、魚腐$12，豬大腸$14，當中燒物質素唔錯，牛吞芯、燒腩肉、豬頸肉、燒得香口，牛舌芯亦肉質軟嫩，肉香惹味，難得爽口而唔會韌，而魚腐亦特別吸附湯汁。

麵底$10至$15，包括日式涼拌烏冬、日式涼拌拉麵、蒜油咖哩撈麵、蒜油蝦子撈麵、蒜油蝦子撈粗、黑松露撈麵，讚歧烏冬、日式拉麵、出前一丁、粗麵、油麵、河粉、米粉、幼麵、米線，但更有趣嘅係有蒟蒻麵$15，熱量低，低卡路里，而啖啖爽口，比芋絲粗身，似絲瓜麵。

湯底亦有啲特別，有豬骨熬煮嘅鮮甜，亦有各種藥材、香料味，湯汁偏甜，可自由加添配料蔥、芫荽、乾蒜、蒜，加蒜之後，蒜味香濃，但就會蓋過湯汁本身味道。亦可於湯汁上加色，包含有鹵水汁、腩汁，甚至將兩者混合，更可以加上秘製辣汁、咖哩、麻辣，口味變化眾多，湯汁加上鹵水亦唔會太鹹，混合起嚟比鹵水汁清淡。

---

---

---

E.A.Tips﹕

---

---