兩個人影吓相,  兩個人醫吓肚,  和你Taste,  新界,  港式,  神秘之地,  野餐隨行

【野餐隨行】齊柏林涉足兩餸飯開足4間分店 屯門蝴蝶灣草地野餐兼探索一代革命之父一級歷史建築公園

瀏覽次數: 25
個人瀏覽過





齊柏林品牌係廣為人知嘅售賣熱狗嘅連鎖店,而兩餸飯掀起熱潮,「齊字頭」近月更涉足兩餸飯行列,到目前為止已經開設4間分店,主要分佈於新界,最新消息亦有於九龍設下分店,莫非想打造兩餸飯連鎖店?今次編輯就挑選其中屯門一間分店,再帶大家拍拖前往屯門海旁草地野餐,兩個人飽餐之後再探索吓當中革命之地嘅一級歷史建築物,園內隱約仍可感覺到一股熱血。

齊記美食(Cafe de Zep)係由齊柏林熱狗店(Zeppelin Hot Dog)強勢打造,有別於本身售賣熱狗,反而打入近年大受歡迎嘅兩餸飯市場。一年前先落戶屯門虹橋開設第一間兩餸飯店,始後再殺入元朗鬧市開設分店,近月更跨區插旗九龍新蒲崗,最近逆市下再次擴充營業,於屯門友愛邨設下第四間分店,同時係屯門第二間分店,而且通通開足星期一至日,貫徹「齊字頭」本身嘅連鎖系列。

其中,屯門友愛邨分店近月(4月22日)試業,價錢一如另外三間分店,兩餸飯$36、三餸飯$42,每加一款餸$8,一盒飯包一款飲品,飲品都係基本檸茶奶茶之類或紙包飲品,並無特別之處,另有大廚推介土魷蓮藕煎肉餅、蟲草花蒸滑雞、椒鹽豬扒、咖哩雞、咖哩牛腩、南乳抆豬手、三杯雞,有指款式會不時轉換,如同廚師發辦。

店內小炒餸菜款式眾多,至少有15款餸,因為有幾款已經售罄,編輯能夠見到嘅菜式包含有咖哩雞、椒鹽豬扒、菠蘿咕嚕肉、三杯雞、肉碎蒸水蛋、麻婆豆腐、酥炸雞翼、蕃茄炒蛋、瑤柱西蘭花、羅漢齋豆卜、西芹炒雞柳、豆角炒牛肉、洋蔥牛柳、蓮藕土魷煎肉餅、香煎雞扒,隨便揀兩至三款都要食足幾日先試得完,故未至於係頹飯,同時適合一眾無飯家庭,對於搶攻兩餸飯市場,「齊字頭」似乎甚有雄心。今次先挑選其中五款,包括咖哩雞、肉碎蒸水蛋、瑤柱西蘭花、椒鹽豬扒、羅漢齋豆卜。

由屯門友愛邨到屯門碼頭蝴蝶灣海旁,只需乘搭一程小巴即可直達,屯門蝴蝶灣沙灘本身係全港第二長嘅泳灘,為正式泳灘,有基本設施之餘亦有儲物櫃,但目前疫情期間仍然暫停開放。故此,只能夠選擇海旁座位或公園草地,海濱公園內小橋流水,亦有迷宮、燒烤場、露營區。蝴蝶灣公園內,栽種咗唔少樹木,亦有花朵,部份位置自成一角,從海旁可見180度全海景,亦可眺望大嶼山、欣澳、大小磨刀海岸公園、人工島、屯赤隧道,海景一望無際,而蝴蝶灣亦靠迎西面,可以等待壯觀黃昏日落。

飯盒僅分成兩格,只為普通發泡膠飯盒,當中大面積嘅一邊擺放白飯,飯量充足,為泰國香米,約一碗白飯,飯粒清爽分明。飯盒另一邊則擺放其中一款餸菜,至於第二款餸菜則放置白飯表面,如果有第三款餸菜,就會繼續放置白飯表面,飯盒平均分成三等份。不過,如此擺法最大問題在於餸菜醬汁、材料會混淆不清,比如會出現是次豆卜會黏有咖哩汁嘅情況。

小炒餸菜基本不過不失,部份較為出色,而部份則比較遜色,當中最值得編輯推介嘅係咖哩雞,咖哩汁擁有極高水準,雞肉已非重點,醬汁僅有微微辣味,香味濃郁,唔會刺激空洞嘅胃部,亦可以滿足口腹之欲,撈飯一流!至於另一款店舖推介之作係椒鹽豬扒,但編輯就絕對不敢苟同,可能擺放太耐,豬扒表皮全變淋身,炸粉頗厚,而且肉質一般,味道亦欠奉,簡單嚟講就係無乜味,即使計算車程到打開飯盒嘅時間,亦未致於會變成呢個狀況。

而肉碎蒸水蛋、瑤柱西蘭花都係另一款推介,前者蛋液質感滑溜,蛋中混有肉碎,為蒸蛋添上層次同咬口,頂端再添加適量蔥花點綴,據悉有粉絲,但編輯連半條粉絲蹤影都唔見,結果就只有豬肉碎,既然無粉絲,純蒸水蛋似乎會比加添肉碎更好,肉碎有啲畫蛇添足之感;而後者則有驚喜,每舊西蘭花都黏附芡汁,而芡汁上又黏有條條瑤柱絲,西蘭花甚爽口。

飽餐之後,最適宜到附近散吓步,但編輯所講嘅唔係於蝴蝶灣公園或屯門碼頭海旁,甚至係屯門海濱花園盡頭長堤邊散步,而係前往離蝴蝶灣公園只係約5分鐘步程嘅龍門路中山公園,又叫屯門中山公園,或者直接叫中山公園。

先前往中山公園旁邊嘅「紅樓休憩處」,內有一個紅色涼亭,周圍滿佈青綠小草地毯,紅紅綠綠畫面本應非常亮麗,而且可以於選擇於此地野餐,但現場一度變成「大媽K場」,音樂聲響徹雲霄,瞬間造成噪音污染。另外,附近村民向編輯提到,此地不時有村民於草地放狗兼留下狗糞,毫無公德心,該村民甚至於隔離中山公園偷摘農地食品。

折返龍門路入口,穿過「中山公園」牌坊可見「紅樓」指示牌,一直前行會見到少量農地,然後再穿過紅色柱子、綠色簷篷上嘅「紅樓中山公園」牌匾,背後即為「紅樓」建築物,呢幢建築物充滿20年代至30年代風格,為紅磚房屋設計,中西合璧,大宅坐西北、向東南,原為「青山農場」辦事處,後來於2009年終被列為香港一級歷史建築物,但就唔包括中山公園,不過「紅樓」甚為破舊,一片頹垣敗瓦,似乎日久失修。據悉,由於「紅樓」位置隱蔽,既係興中會秘密基地,亦為孫中山策劃推翻滿清政府革命行動之地。

中山公園等同於西營盤海旁嘅中山紀念公園,都係用作紀念一代「革命之父」孫中山,屯門中山公園於1910年落成,屹今有112年歷史,絕對歷史悠久,係一個靠近屯門市區而又少人涉足嘅秘密公園。屯門中山公園同西營盤中山紀念公園都有矗立一個孫中山紀念雕像,前者現時仍可見雕像之下嘅幾則碑文。翻查資料,屯門中山公園原來本身曾經當年孫中山同革命同志聚會之地,亦曾為武器儲存倉庫,隔住張相都Feel到一股熱血,而公園內嘅青山紅樓更被列為一級歷史建築物。

繼續前行,即會到達孫中山銅像、紀念碑,石級旁邊有由孫中山親自提字嘅「廣慈博愛」石碑,後面亦有同樣有「博愛」石碑,同樣以孫文留名,「博愛」石碑背後寫有「世界潮流、浩浩蕩蕩、順之則昌、逆之則亡」。據悉該位置本來有6棵由孫中山、黃興種植嘅桄榔樹,但現時已經並無蹤影,連樹下記載嘅碑文都唔見,整個空間只留有孫中山銅像、少數紀念碑。

「革命尚未成功、同志仍須努力」係閱讀孫中山歷史事蹟時從小聽到大嘅句子,而「國父」孫中山半身銅像發出閃亮耀眼嘅金光,銅像之下基石刻有「天下為公」碑文,「國父」孫中山於民國14年嘅遺囑。銅像之上石柱則刻有「孫逸仙博士紀念碑」,頂端有中華民國國徽,粗略估計有6米高。石柱之下四面均有碑文,包含有「孫逸仙博士紀念碑記」、「國父革命事蹟」,都為鳴謝碑文,而銅像於民國58年建立,即1969年,與紀念碑同年建立。

若然大家夠細心,應該會發現園內有啲碑文已經逐步被消失,當中原先「天下為公」嘅牌匾已未能見到,而「廣慈博愛」石碑下嘅四個碑文亦被無故消失,皆因現場明顯見到四個凸出嘅「格仔」,全部被髹上同牆壁一樣嘅天藍色顏料。從天藍色漆油痕跡可以預計,大概已經髹上約兩至三年,到底係咩原因需要隱藏此等碑文呢?

再度翻查舊圖,發現該四個「格仔」本來分別包括有「屯門青山紅樓中山公園碑記」、「重修紅樓中山公園記」、「中華民國建國一百週年元旦奠基」,碑文只不過係歷史記載,到底呢幾則碑文有何問題而需要隱藏呢?

中華民國派之人每年都會於中山公園內嘅銅像及紀念碑舉起象徵台灣嘅青天白日滿地紅旗,同時高唱台灣國歌,尤其係雙十國慶、元旦日。不過,目前未見有任何青天白日滿地紅旗,只見旗桿上隱約有掛旗幟嘅痕跡。

未有高高懸掛多面青天白日滿地紅旗嘅中山公園,令場內感覺荒涼,似乎日久失修、無人打理,銅像、紀念碑背後垃圾遍地、雜草叢生,如同廢棄地帶,走過龍門路亦未必會發現呢個秘密公園。據了解,中山公園內嘅「紅樓」於2018年雙十國慶已經被中國大陸商人收購,而《港區國安法》生效之後,似乎未再有人於此地紀念「雙十節」,亦未再有中華民國嘅慶祝活動舉行,難怪中山公園變得更為蒼涼。

即使心中嘅「國父」孫中山浩氣長存,但實際上到最後,辛亥革命遺址到底會何去何從?




E.A.Tips﹕

❶ 齊記美食現時有4間分店,包括有屯門青菱徑3號東威閣地下G03號舖、元朗屏昌徑14至48號聯愛樓地下14E舖、新蒲崗寧遠街3-23號越秀廣場地下G18號舖、屯門愛勇街12號友愛街市12號舖。

❷ 注意係先取餐,後付款。

❸ 特別留意店內只收現金。

❹ 蝴蝶灣公園及沙灘鄰近蝴蝶邨,亦近美樂花園。

❺ 蝴蝶灣沙灘現時暫停開放。

❻ 單餸$40、雙餸$50、白飯$10,而飲品單買就$12

❼ 另有一款叫鯧魚飯$42。

❸ 於友愛邨乘搭小巴路線44號,就可以直達蝴蝶灣,步行約5分鐘就會到達公園。

❸ 由蝴蝶灣公園步行至中山公園,腳程只係約5分鐘,而中山公園折返屯門碼頭亦只係10分鐘步程。

❸ 野餐時,自己垃圾謹記自己帶走!

❹ 野餐要盡量使用可循環再用之餐具器皿。

❺ 可以挑選有長櫈嘅地方,會較方便。

❻ 有需要可自備小餐枱、小型露營櫈用餐,可以隨時去到邊食到邊。

❼ 野餐時正對海景用餐會比較Chill。

❽ 最好挑選較少人嘅地方,避免接觸人群。

❾ 野餐地同食肆最好距離不足15分鐘步程,以免食物及熱飲冷卻,有需要就自備保溫袋。

❿ 野餐時最好唔好完全除晒口罩,拉低口罩用餐時一定要拎住食物或飲品。

❿ 巴士路線 60M,60X,61A,61M,61X, 62X,260C,261,263,263A, 263C,506,961,A33X,E33,E37C, N30,N30P,N260,NA33,R33 都可到達友愛邨。

❿ 蝴蝶灣公園草地有蚊蟲,要做足防蚊措施。

❿ 中山公園毗鄰賽馬會公眾騎術學校,於蝴蝶灣公園斜對面,同時靠近蝴蝶邨及兆山苑。


齊記美食

  • 屯門愛勇街12號友愛街市12號舖
  • 星期一至日11:30 – 21:00

蝴蝶灣公園

  • 屯門龍門路45號
  • 24hours
  • 2404 5979

中山公園

  • 龍門路中山公園
  • 24hours

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


西貢外賣限定英式炸魚薯條專門店 最高人氣係邊款小食?
經偽鳥居登長洲最高點北眺亭 關公忠義亭附近躲藏超隱秘殖民時代懷舊T形街牌/皇冠郵筒
【野餐隨行】牛頭角消失的後山?鱷魚山81米高隱蔽小公園眺海景 歎近50年老牌上海菜館米芝蓮正宗滬菜
後生仔主理!旺角女人街$50海南雞飯 4款口味有咩揀?
【野餐隨行】元朗人氣壽司丼飯店係驚喜定驚嚇?公園大草地野餐望姆明小屋百鳥塔
旺角點心專門店外賣自取!$56一個人點心拼盤唔使怕選擇現分歧
娛苑起步!142級樓梯登元朗後山豬黃嶺 超矮標高柱眺望雞公嶺淋坑山
樂富唯二!茶餐廳中伏食物多?尋隱藏三和砵仔蒸飯水準不俗
東梅古道起步登昂坪救援徑現代棧道 一隅400米高近距離下瞰香港赤臘角機場宛如觀景台
【野餐隨行】天水圍新北江商場消暑刀削麵 實試公園湖邊草地旁用餐到底有咩問題?
離潮流特區僅3分鐘步程!旺角砵蘭街越南河內料理必食牛柳粉 牛湯濃郁菜式地道
【土瓜灣半日遊】前馬頭圍大廈朝聖193 Cafe!香港花見小路/日系粉紅橋打卡 牛棚藝術公園探索牲口棚遺跡【野餐隨行】
免搭船!穿梭大橋徒步過海往返香港仔鴨脷洲 360度探視珍寶海鮮舫最後景象
【野餐隨行】隨手買午餐登灣仔半山!跑馬地箕璉坊藏配水庫大草地緩跑徑
招牌豬骨煲材料充足滿口骨膠原 大角嘴靚煲皇賣高水準火鍋餐
舊店傳承!灣仔70年老字號小食店細舖搬大舖 年輕人接手重現臘味糯米飯/港式街頭小食