兩個人醫吓肚,  和你Taste,  東南亞菜

離潮流特區僅3分鐘步程!旺角砵蘭街越南河內料理必食牛柳粉 牛湯濃郁菜式地道

瀏覽次數:105
個人瀏覽過





旺角鬧市食店眾多,中西美日俄各類菜式任君選擇,當中越南菜雖不止一間,但越南河內料理就比較少見,旺角近油麻地就有一間以河內美食為主打嘅食店,食飯時間會有人排隊等候入座,而據悉連越南華僑亦大讚菜式正宗,似乎係一間適合拍拖兩個人一試嘅食店。

靠近登打士街嘅越發地道河內料理,以地道河內美食為主,招牌之作為牛柳牛丸粉,另有其他越南菜式,而其中有一款菜式係連美國前總統奧巴馬都讚不絕口,名字叫做奧巴馬粉。事緣係奧巴馬於2016年訪問越南期間,同著名美食節目主持人名廚安東尼波登於越南餐館品嘗燒肉河粉,呢間小店就叫Bun Cha Hanoi 碳燒豬肉拌越南檬粉$82。

不過喺只能外賣嘅條件之下,未知咩原因,店內只有3款菜式能供應外賣,包含Pho Bo河內牛柳粉$82、Pho Bo Vien 招牌牛柳牛丸粉$98、Cha Gio 招牌越南脆春卷$68。

其實河內牛柳粉、招牌牛柳牛丸粉係咪有咩分別?驟眼看來,兩者材料相似,而湯底亦近乎一樣,後者比前者多咗兩粒牛丸,價錢相差$16,唔通一粒牛丸值$8?

至於越南河內到底喺邊?事實上,河內係越南首都,位處越南北部,有逾千年歷史,一般氣候偏熱,而且多細雨,間中有風季。越南北部嘅河粉通常都係較南部嘅粗身,湯底亦會稍為清淡。南部嘅越南粉一般會採用牛肉唔同部位,例如牛肉片、肌腱或骨髓等,而北部嘅越南粉就多選用剁碎牛肉或雞肉。配料方面,南部會加添較多香料,但北部嘅只會加上大量蔥花。北部嘅越南粉多會選用米醋、魚醬、辣椒醬作為醬汁,而南部就會使用青檸、新鮮切片辣椒、海鮮醬,辣椒醬。

普通版河內牛柳粉無「招牌」二字,只包含牛柳,價錢就平少少,湯底為牛骨煲嘅牛湯,牛湯有濃郁牛味,但偏向清甜,似牛肉清湯,並非平常比較容易食到嘅南部越南粉嘅風格,色澤亦較為清澈,同時配有油炸鬼、大量蔥花、芫荽。而河內牛柳粉選用巴西牛柳,似剁碎牛肉,而非平常越南粉嘅牛肉片,肉質明顯較鮮嫩,質感柔軟,容易嘴嚼,放入口中之後,肉汁於口腔爆發,可口非常,令人齒頰留香,但浸於外賣碗嘅熱湯內已經由半生熟變得熟透。

而招牌之作係牛柳牛丸粉,分別在於多咗兩粒都已經切半嘅牛丸,牛柳同普通牛柳粉相同,亦為剁碎牛肉,而河粉則能吸附湯汁。而牛丸則夠彈牙,而且有牛味,只係比較細粒,而且份量比較少。湯底亦採用牛骨熬煮牛湯,據知更會加入沙蟲調味,湯底基本有九成相似,只係比普通牛柳粉稍稍濃郁,入口香醇,但都係偏向清甜口味,湯底正宗。不過,牛柳粉配上新鮮切片辣椒、青檸,似乎一秒又變返南部風格。




E.A.Tips﹕

❶ 店舖離朗豪坊只係5分鐘步程,同樣位處砵蘭街。

❷ 留意店舖每月有兩日係不定期休息。

❸ 其實店舖比較靠近油麻地方向。

❹ 巴士路線60X,63X,69X,81,268X 等皆可到達登打士街、彌敦道。

❺ 外賣選擇有限。


越發地道河內料理

  • 旺角砵蘭街99號地舖
  • 星期一全日休息;星期二至日12:00 – 19:30
  • 6884 8898

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


太安樓起家!筲箕灣東大街人氣雪糕班戟 暖笠笠法式甜品配涼浸浸雪糕球 歎埋消暑雪頂茶飲啖啖舔舔脷
近大潭水塘!陽明山莊僅存殖民時代皇冠電話亭 紅噹噹包廂懷舊味濃
【野餐隨行】油麻地一級歷史建築鬧市空中花園野餐 神秘台式廚師發辦$100有找!
【野餐隨行】石硤尾池畔叢林小餐廳歎日式超靚便當 街角文具店兼賣醉雞麻醬蕎麥麵
大角嘴迷你威尼斯西餐廳Risotto出色 中西合璧加臘味賣Fusion?
【野餐隨行】小西灣角落港式下午茶 鬆軟夾餅拼金黃雞蛋仔粒粒飽滿
大角嘴海南雞專門店外賣孖寶套餐人均$79 除咗雞飯重有乜?
【邊境一日遊】尖鼻咀濕地5分鐘登龜山眺后海灣 沙橋村蠔殼田絕美夕陽餘暉
大隱隱於市!尖沙嘴鬧市藏維多利亞時代百年歷史建築物 遊走法定古蹟探視紅磚遊廊金字瓦頂
【野餐隨行】長洲歎人氣沙嗲牛米通 堤邊樹蔭全海景野餐 甜品有炸芒果糯米糍!
採環保餐盒+餐具!土瓜灣舊區鐵路便當地道台式口味 3款配菜期期轉換主食足料
【野餐隨行】元朗11款人氣名物瀑布蛋治有咩特別?大棠燒烤場變草地野餐場
深入皇后山邨直通布格仔路軍營 歷史古建築印度廟唔再神秘?
近電車總站!筲箕灣$30大大碟燒味飯 燒鴨燒肉件件皮脆肉嫩
【中秋好去處2022】灣仔藍屋重現大澳花燈節!手工五彩燈籠毗連景星街舊式T形街牌
素食Buffet有外帶!無肉食自助餐仍供應任夾外賣飯盒 全港5間分店抵過堂食低至$50