非來自台灣？本土製牛肉麵旺角/長沙灣有得食外賣自取折後$50有找

程班長已經結業返回台灣，台灣製牛肉麵又少一間，而本土製牛肉麵又如何呢？元洲牛肉麵於2019年底開業，到2020年中再接再勵於疫市開設分店，原址位處長沙灣，而分店則選址旺角鬧市地帶。雖然以台式牛肉麵為主打，但其實牛肉麵並非來自台灣，店名已經講明，只係一間位於元洲街嘅牛肉麵小店，同台灣牛肉麵又有何分別？

「元洲」嘅意思係指來自長沙灣「元洲街」，當中招牌貨有元洲牛肉麵$58，寫明「香港口味，一碗入魂」，並唔係台灣口味，反而係正宗港式口味，唔標榜正宗台灣口味嘅台式食店的確唔多，如果用台灣味嘅牛肉麵比較就唔太適合，因為單單湯頭就已經有分別，有指店舖原本係賣手打牛肉漢堡。

台灣牛肉麵以紅燒湯底為主，味道較濃厚，而本土牛肉麵則較醇，味道較清淡，據知湯底係以牛骨、雞骨、牛肉，再加上蔬菜熬煮，眼見餐牌特別提醒最好先飲幾口湯，即管先飲幾啖湯。湯頭唔油膩，有種住家湯感覺，味道唔太濃，略有牛味，帶有蔬菜甜味，似乎係來自紅蘿蔔，全無辣味，有別於台式牛肉麵嘅濃厚微辣嘅紅燒湯底。

麵底有粗麵、幼麵可擇，粗麵為白身麵，質感較煙韌彈牙，而黃身幼麵則蛋香味較重，較為掛湯，編輯比較鍾意粗身麵條，相對較有咬口，不過粗身麵條的確係唔掛湯，而麵條雖然係夠札實，但放得耐少少都會變軟，必須盡快食用。

至於牛肉，就係牛筋骨肉，炆煮得幾軟腍，牛肉厚切，夠晒大舊，牛肉經過醬油等調味料醃製後亦夠入味，編輯並非黃金舌頭，請恕未能試到咩獨特醬料。牛肉肉質軟腍，似牛𦟌肉，牛脂唔多，略有膠質，基本牛筋已除，入口唔乾柴同黐牙，的確係柔軟而啖啖肉。伴隨3件牛肉嘅重有一塊紅蘿蔔同少量蔥花，紅蘿蔔炆得夠淋身，而且清甜，但就唔夠入味。

另外，店內亦有其他招牌貨，例如係原隻無骨雞髀、牛筋麵、半筋半肉麵、豬肉餃子、手拍青瓜、滷水拼盤等，三寶麵同時有牛肉、牛筋、牛舌，牛肉麵甚至有元氣蜆湯，除咗湯麵，亦可以揀乾拌麵或飯底。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 原店位於元洲街，地址為長沙灣元州街498號青華閣地下I號舖，營業時間為星期一至五11:00 – 21:00；星期六至日12:00 – 21:00；公眾假期12:00 – 21:00，電話則為5225 4332。

❷ 星期六日有加一服務費。

❸乾拌麵要先攪勻。

❹ 湯麵最好先飲幾口湯。

❺ 辛辣度可選小中特辣，以牛脂肪、辣椒炮製，濃郁而有層次，元洲麻辣就加入花椒混合，比較重麻辣鮮香。

EATWO

Miss A

【區區有小店2024】坪洲2間尚存本土餐廳推介！鑊氣炒飯／貓咪Cafe／菠蘿包雪糕｜坪洲美食推薦2024