中菜,  兩個人影吓相,  兩個人醫吓肚,  和你Taste,  新界,  野餐隨行

【野餐隨行】天水圍新北江商場消暑刀削麵 實試公園湖邊草地旁用餐到底有咩問題?

瀏覽次數:107
個人瀏覽過





天水圍係一個有逾40年歷史嘅香港新市鎮,對區外人嚟講,結構複雜,天乜天物嘅嘅屋邨一幢又一幢,更有唔少私人屋苑,不過天水圍區內嘅嘉湖新北江商場就係區外人都會知道嘅拍拖掃街勝地,嘉湖商場一樓雲集一間間良心小店,只係$100左右嘅價錢,就足夠兩個人飽肚。

商場有天橋連接一期、二期,地下為新天地廣場,一樓既係新天地廣場,亦被稱為原宿地帶,而二樓就係嘉湖新城,當中美食集中於一樓位置,多為細舖價錢相宜,主要分佈天橋兩邊嘅C區同B區。商場似一個複合式商場,無特別規畫咁款,只係地圖上分成三個區域,其實咪又係一個劏場,區外人大概會好容易迷路,以往甚少旅客會踏入商場。

天水圍新北江商場有如葵芳嘅葵涌廣場或旺角嘅旺角中心,呢個美食集中地當中,有一間叫樂湖刀削麵嘅食店,離其中一道扶手電梯不足1分鐘距離,據知刀削麵本身有幾百年歷史,正宗製法係採用山西麵條,開放式廚房中可見師傅即席搓麵糰,兼且一隻手托住麵糰,另一隻手削出片片大小相近嘅麵條。

編輯為避免麵條變糊狀式熱湯變少,只點選比較少人揀嘅消暑冷刀削麵,而且一早明白即叫即做要等候一段時間,但發現店內有一個問題,一早點餐嘅外賣顧客需要等候較長時間,而遲遲入座嘅堂食顧客則較早可以享用餐點,更嚴重嘅係,較遲入座嘅顧客已經幾近用餐完畢,外賣依舊未能取得,結果外賣足足等待超過20分鐘,以上為編輯實地引證。只係未知道究竟係因為冷拌需要等候得比熱拌耐,抑或純粹係堂食、外賣問題啦。

天水圍公園離商場只係約5分鐘步程,今次編輯就嘗試將外賣略帶公園野餐,睇吓呢個被一度稱為悲情城市嘅地方用餐到底有幾悲情?

餐牌中可見小店係師承「山西刀削麵皇」,據知老闆係自立門戶開舖,既然主打正宗刀削麵,麵條固然係重點,刀削麵質感獨特,削得偏向粗身,略帶卷曲,狀似柳葉,質感煙韌爽滑,唔會太淋身,而麵粉厚底又扎實,所以食落好重麵粉味。餐牌內可見刀削麵可配搭清湯、麻辣、熱拌或涼拌,由於外賣買冷麵比較方便,編輯就無試熱拌刀削麵,反正個個都食熱拌,再寫大家都嫌悶啦。

刀削麵本身就為中式菜式,其中一款係口水汁系列嘅口水豬耳冷刀削麵$59,配料包含青瓜絲、花生、擔擔醬、口水汁,今次挑選配菜為豬耳。而另一款則為麻辣系列嘅麻辣手撕雞冷刀削麵$59,配料包含青瓜絲、麻辣醬、擔擔醬,今次挑選配菜為手撕雞。口水汁辛辣度比麻辣醬較低,相對容易入口,而麻辣醬則較刺激味蕾,豬耳份量充足,相當爽口開胃,手撕雞就更能黏附醬汁,香辣惹味,陣陣快感令人難以停低。

事實上,天水圍公園地方偌大,可以隨便找尋一個空間野餐,既有大草地,亦有人工湖,更有噴水池,本來係一個唔錯嘅野餐地點。不過,公園內蚊蟲眾多,短短15分鐘用餐時間內,編輯被一隻隻細小黑蚊咬得雙手雙腿都大呼救命,吸血程度比平常嚴重,一次被咬數十處,痕癢得幾乎難以完全吃完一碗麵,結果只能提早離場走人,果然係一個悲情城市,食個飯都悲情得要緊!

翻查資料,發現天水圍區內近年新聞都有圍繞區內街坊被蚊蟲困擾嘅情況,以今次為例,編輯可以肯定公園內嘅蚊蟲為蠓,而非蚊,蠓較蚊細小,雖然消退得快,但非常痕癢,而且一次會被咬多處,紅點遍佈手腳,所以都係再另覓野餐點算數。




E.A.Tips﹕

❶ 套餐配凍豆漿。

❷ 加底$10,加溫泉蛋$10。

❸ 巴士路線 69M,69X,264R,265S, 269B,269C,269D,269S, 276,276A 可到達天耀邨。

❹ 全部都可揀走辣。

❺ 嘉湖新北江商場離天水圍公園只係約5分鐘步程。

❻ 外賣需要加$1。

樂湖刀削麵

  • 天水圍天湖路1號嘉湖新北江商場1樓C41B舖
  • 12:15 – 22:00
  • 6933 3594

天水圍公園

  • 天水圍天瑞路6號
  • 24hours
  • 2445 5805

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


太安樓起家!筲箕灣東大街人氣雪糕班戟 暖笠笠法式甜品配涼浸浸雪糕球 歎埋消暑雪頂茶飲啖啖舔舔脷
近大潭水塘!陽明山莊僅存殖民時代皇冠電話亭 紅噹噹包廂懷舊味濃
【野餐隨行】油麻地一級歷史建築鬧市空中花園野餐 神秘台式廚師發辦$100有找!
【野餐隨行】石硤尾池畔叢林小餐廳歎日式超靚便當 街角文具店兼賣醉雞麻醬蕎麥麵
大角嘴迷你威尼斯西餐廳Risotto出色 中西合璧加臘味賣Fusion?
【野餐隨行】小西灣角落港式下午茶 鬆軟夾餅拼金黃雞蛋仔粒粒飽滿
大角嘴海南雞專門店外賣孖寶套餐人均$79 除咗雞飯重有乜?
【邊境一日遊】尖鼻咀濕地5分鐘登龜山眺后海灣 沙橋村蠔殼田絕美夕陽餘暉
大隱隱於市!尖沙嘴鬧市藏維多利亞時代百年歷史建築物 遊走法定古蹟探視紅磚遊廊金字瓦頂
【野餐隨行】長洲歎人氣沙嗲牛米通 堤邊樹蔭全海景野餐 甜品有炸芒果糯米糍!
採環保餐盒+餐具!土瓜灣舊區鐵路便當地道台式口味 3款配菜期期轉換主食足料
【野餐隨行】元朗11款人氣名物瀑布蛋治有咩特別?大棠燒烤場變草地野餐場
深入皇后山邨直通布格仔路軍營 歷史古建築印度廟唔再神秘?
近電車總站!筲箕灣$30大大碟燒味飯 燒鴨燒肉件件皮脆肉嫩
【中秋好去處2022】灣仔藍屋重現大澳花燈節!手工五彩燈籠毗連景星街舊式T形街牌
素食Buffet有外帶!無肉食自助餐仍供應任夾外賣飯盒 全港5間分店抵過堂食低至$50