釣魚翁+廟仔墩
兩個人影吓相,  新界,  神秘之地

坑口出發!登廟仔墩上洋山征服「三尖」釣魚翁 環瞰360度山海景俯清水灣將軍澳

瀏覽次數:106
個人瀏覽過





清水灣郊野公園係熱門郊遊選擇,而清水灣又分為南北山脊,最出名嘅要數龍蝦灣、釣魚翁,兩道郊遊徑基本上都唔算太困難,適合拍拖兩個人輕鬆遊覽,今次就由坑口出發,經上洋山前往廟仔墩,再征服被稱為「香港三尖」之一嘅釣魚翁,已經係清水灣半島內最高嘅山,2至3小時可以到達相思灣、大坳門方向。

由將軍澳單車館公園起步,向坑口方向步行,經坑口文曲里公園,依循昭信路走到迴旋處,轉入寶寧路,路口可見田公灣村。於盡頭見各村路牌,跟隨半見村指示牌走入山路,直到孟公屋卜村分岔路口,依據陳屋村指示牌前行,小橋上會見到「釣魚翁徑」天藍色人造指示牌。

釣魚翁位處清水灣半島,海拔僅高約345米,屬郊野公園範圍內,北面連接廟仔墩,而南面就連接田下山。釣魚翁地質係火山岩,最特別之處係山峰尖削突起,單單釣魚翁山峰高度就有約248米高,山形狀似翠鳥,即釣魚郎,南面較渾圓,而北面就較尖削,故釣魚翁又與蚺蛇尖、青山合稱為「香港三尖」。

一直上行至澳貝村,然後前往俞屋村、橫龍仔村,但就唔會進入左邊俞屋村村路,繼續向陳屋村、坑尾頂方向走。如果覺得村路複雜,可以依循Google Map從孟公屋下村旱廁步行至坑尾頂公廁,路線就比較簡單,一直前行就會見到釣魚翁郊遊徑中段入口。

此路線會直接前往上洋山,而原本嘅釣魚翁郊遊徑就由五塊田起步,不過兩者時間相近,大概30分鐘抵達郊遊徑接駁處,位置已經係上洋山。上行至上洋山路段基本上並唔複雜,只需緩緩登上石級,都為正常山路,而且大多數路段都有樹蔭,更有竹林隧道,路段輕鬆。而上洋山一端可望將軍澳高樓大廈市景,另一端則可望西貢鄉郊景觀,兩邊構成鮮明對比。

由上洋山繼續攀上山路,分岔路口右邊為釣魚翁郊遊徑,只有左邊則可以通往廟仔墩、釣魚翁山頂,一旦於岔路口選擇,想退出就只能折返原路,否則就要經過山路崎嶇尖削嘅釣魚翁山頂先可以落山,故必須先考慮清楚。

廟仔墩海拔高約333米,位於上洋山至釣魚翁之間,有指係由於似山腳廟仔而得名,而山勢並無釣魚翁咁危險。沿途山路景觀優美,左邊可遠眺橋咀洲、滘西洲、吊鐘洲、牛尾洲,甚至俯視附近嘅相思灣、龍蝦灣、大嶺峒,而右邊則可望將軍澳、鯉魚門方向,亦可俯首三育中學,甚至見到日出康城。

基本上,上洋山至廟仔墩只有15分鐘步程,但由廟仔墩攀登釣魚翁山頂,經過密林之後,需要30分鐘腳程。而從廟仔墩離遠可見,釣魚翁山峰明顯比上洋山、廟仔墩尖削、突出,甚為尖聳,全為山石,登巔之路非常陡峭,山脊全程崎嶇不平,山勢險要。

釣魚翁山頂位置有三角測量站,即係標高柱,雖然海拔不足350米高,但由於山勢尖削,係山頂尖端,故位置可享360度景觀,絕對係全無遮擋。釣魚翁景觀比前段嘅上洋山、廟仔墩明顯較遼闊,景觀壯麗,除咗沿途一直可以回望嘅北面將軍澳市景、上洋山、下洋山;東面嘅牛尾洲、吊鐘洲、火石洲、西貢;更可清晰俯視西面嘅日出康城、將軍澳工業邨、佛堂洲、百勝角、柴灣、魔鬼山、五桂山、照鏡環山;亦可環瞰南面嘅清水灣、東龍島方向湛藍海岸,甚至果洲群島,一個個小島就於腳下,而南面同時可遙望高爾夫球場、清水灣泳灘,以及依釣魚翁山路繼續前行嘅布袋澳村、田下山,碧綠嘅藍塘海峽、清水灣美景基本上一覽無遺。

由釣魚翁山頂落山直奔清水灣道、相思灣路,腳程需要45分鐘,因為落山路段因風化作用而滿佈沙石,山腳郊遊徑出入口就係巴士站位置,距離大坳門迴旋處則約5分鐘步程,位置係龍蝦灣郊遊徑起點。




E.A.Tips :

❶ 乘搭巴士路線91號、小巴路線103,103M,16 分別可來往鑽石山、將軍澳、寶琳,都可以到達五塊田、相思灣落車,直達清水灣道、相思灣路,前往釣魚翁郊遊徑入口。

❷ 如果想行低級路線,可以只走分岔路口另一邊嘅釣魚翁郊遊徑,就唔需要經釣魚翁山頂。

❸ 沿遊係並無補給點,謹記要準備充足糧水。

❹ 只有初段有公廁,所以上山之前就要先方便。

❺ 釣魚翁山路一邊係郊遊徑,另一邊係越野單車徑,都係行返郊遊徑啦。

❻ 廟仔墩、釣魚翁山頂路段都唔係郊遊徑範圍內。

❼ 山頂路段非常崎嶇不平,全為石路,非常陡峭,碎石繁多,所以一定要準備充足,因為路段要手腳並用,最好要有有經驗人士陪同。

❽ 如果要去山頂睇日落,最好拎定頭燈,因為落山需時,行到落山隨時天黑。

❾ 如果唔上山頂,可以喺廟仔墩退出,行返郊遊徑。

❿ 謹記自己垃圾自己帶走。

❿ 相思灣路巴士站、小巴站可能會多人,未必有位,可以步行5分鐘去大坳門巴士站、小巴站,會比較容易上車。

❿ 如果要走釣魚翁山頂,編輯比較建議依循我嘄方向由北向南走因為南面山勢感覺更長更崎嶇,而北面方向落山斜幅較大。

❿ 廟仔墩、釣魚翁路段都有豎立危險警告牌,寫有類似懸崖危險、切勿前進嘅字句,警告遊人前段艱險難行,謹記小心,切勿隨便前進。

釣魚翁/廟仔墩

  • 香港新界東南部

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


長假期後人氣熱點頓變空蕩蕩巨石陣 30分鐘從炮台山日式庭園登北角後山新手路線紅香爐峰
【野餐隨行】鰂魚涌香港人高水準兩餸飯最平$32 闖北角清靜海邊公園野餐近汽車渡輪碼頭
新田加州花園保留罕見赤紅色殖民時代電話亭 英式小庭園探索圓柱形皇冠郵筒/貴族風時鐘
【野餐隨行】黃大仙近30年騎呢《西遊記》公園野餐 本土自家製熱狗店推分店限定優惠
大圍舊式茶樓客香邨現已恢復24小時營業 火鍋店616班底接手保留經典糯米包/魚翅餃
非來自台灣?本土製牛肉麵旺角/長沙灣有得食 外賣自取折後$50有找
近屯門碼頭!屯門蝴蝶灣泰國冬蔭功蝦湯奶白變橙紅 估吓一碗有幾多隻蝦?
鑽石山出發勇闖石礦場!山中秘道探索高聳東南亞樹屋 上中下三條路線直抵城市後山入口
【野餐隨行】登紅燈山觀九龍半島!何文田勝利道姊妹店廚房打通 兄弟邦x鮮丼家一舖兩用賣日式丼飯
太子人氣車仔麵湯底鹵汁混腩汁 16款麵底任揀必試低卡蒟蒻麵
薄扶林榕樹小徑驚現獨特樹洞仙境!一條路線走過殖民建築玫瑰邨+歷史古蹟伯大尼教堂/舊牛奶公司牧場
「食街」搵食遊!西貢巷弄7間夏日必去本土小食店 離碼頭僅2分鐘步程
全港7間兩餸飯專門店良心地圖!港九新界遍地開花間間平靚正低至$32!(最新消息﹕5月鰂魚涌有新店)
近天澤商場!天水圍後山矮過嘉頓山 秘道闖淋坑山賞北方黃昏景【野餐隨行】
【野餐隨行】鴨脷洲海邊歎有料車仔麵 前臨南區純白燈塔眺東博寮海峽3支煙囪 30分鐘輕鬆走完小玉桂山
月前旺角設分店齊齊叫雞!上水鳳鳴居足料無味精雞湯麵濃郁可口 醉雞嫩滑+10款湯底回頭率極高