週末拍拖兩個人去邊好？好多人想去離島一日遊，只會諗到坪洲、長洲、南丫島等著名島嶼，以致幾個小島經常被擠得水洩不通，但事實上想登小島遊覽，亦有其他選擇。今次編輯就帶大家到兩個真正嘅香港小島，吉澳、鴨洲係香港最北端嘅小島，比東平洲更近邊境，一個有天然地質公園風土地貌，另一個有2021年9月先開通嘅文化徑，而船班次亦係週末限定，只有指定時間先會來往兩個小島，十足真正嘅香港「Local Tour」！
今次本地旅行團以馬料水為起點，只需乘搭一程街渡，就可以抵達吉澳、鴨洲，今次吉澳、鴨洲一日遊行程同香港Local Tour如出一轍，船程時間已經被安排好，只需跟隨時間上落船，其餘都係自由活動時間。基本上，整個行程中有2.5小時遊覽吉澳全島，亦有1.5小時遊覽鴨洲全島，時間上亦算相當充裕，因為兩個小島面積不大，即使深度遊都會有充足時間。
街渡會依沙田灣經馬鞍山、船灣淡水湖，一直向東北面走，沿途會經過深涌、荔枝莊之餘，亦會經過赤門海硤、黃竹角咀，一窺「鬼手岩」真面目，大概1小時船程就可以近距離觀賞「鬼手岩」。本來「鬼手岩」係行山考牌路線之一，岬角盡頭被唔少人稱之為「環湖出咀摸鬼手」，山路極長，到達船灣淡水湖水壩後仍需要走一大段山路，有約30公里，隨時要走9至12小時，山路崎嶇兼少見遮蔭位，亦需要爆林、綑邊，陸路前往確實有一定危險度。但現時乘搭街渡從水路前往，就可以輕鬆觀賞香港奇景「鬼手岩」，未水漲嘅時候，「鬼手」形岩石佇立岸邊清晰可見，「手指」位置遍佈坑紋。本身黃竹角咀有遠超過四憶年嘅岩層，地質受風化假蝕，形成唔同岩石，水路毋須走山路都可以望到「鬼手岩」，的確係安全得多。
穿過娥眉洲，就可以到達印洲塘海，街渡會先抵達吉澳，然後再停泊鴨洲，由馬料水到鴨洲，船程約2小時。依據街渡時間嚟安排行程，可以先經吉澳海前往鴨洲小島遊覽，再折返吉澳小島，會比較順利同完整。兩個小島都位處香港東北面，係本地最北端嘅小島，吉澳、鴨洲甚至比最東面嘅東平洲更靠近邊境，一河之隔就係深圳鹽田港、大鵬灣、沙頭角海。鴨洲面積僅約4公頃，最高嘅觀景台亦只有海拔約25米；而吉澳則有235公頃，最高點海拔高約122米，位置係吉澳內嘅雞公嶺，只係與元朗雞公嶺同名。
鴨洲只係一個超迷你嘅香港北區島嶼，英文只係直譯為Ap Chau，位處吉澳西面，因岩層受風化作用、海浪侵蝕，島形狹長，小島形狀離遠睇似足一隻半浮水面嘅鴨仔，所以被稱為鴨洲。而鴨洲地貌比吉澳更純樸，而且係零商業化地帶，雖然有指居民已經受美國經濟援助協會 (CARE USA)資助，靠炒外匯為生，但單純以環境上嚟睇，都算係蘊藏香港嘅風土地貌一級景色，當中「鴨眼」更媲美鶴咀人氣打卡位「蟹洞」，如同「上帝之眼」！
落船之後，一直向西面方向走到盡頭，就會到達小島嘅「鴨頭」，當中就可見一個恍如「上帝之眼」嘅「鴨眼」，有幾分似人類眼窩，奇幻非常。事實上，鴨洲係香港聯合國教科文組織世界地質公園之一，地質公園內岩石嶙峋，皆因鴨洲本身係由水成岩形成，而水成岩又屬於沉積岩。「鴨眼」本身都係由於海蝕拱先會形成眼睛模樣，大概高近2米，闊約10米，大自然的確係鬼斧神工。
而「鴨頭」位置可見粉紅色角礫層，最盡頭更有一個海蝕平台，亦有海蝕崖、海蝕柱，島上嘅岩石都為沉積岩嘅一種。至於「鴨頭」與「鴨身」之間有一個小空隙，正正係「鴨頸」所在地，係岩層斷裂帶，都係同樣經海浪侵蝕而成，中間形成一個窄小鴻溝，似足一個崖壁，質感獨特而有層次。
折返原路會經過鴨洲小村落、貝殼灘，小島房屋極少，居民亦唔多，本來為漁村地帶，50年代高峰期有約千人居住，但據悉現時只剩3人，居民少得恍如世外桃源。鴨洲村落旁邊有一個籃球場、鴨洲休憩處，紅色欄杆、綠色牆壁背後可見一座原為鴨洲漁民子弟學校嘅鴨洲故事館，只係疫情期間已暫停開放。學校牌匾只為白底黑字，建築物頂端可見學校建於1953年。
鴨洲故事館左邊有一座真耶穌教會、鴨洲村公所，教會信奉嘅係來自台灣嘅宗教，而右邊直上樓梯，可以抵達一個小型觀景台，景觀遼闊，雖然海拔僅約25米高，但幾近360度風景通通一覽無遺，除咗對岸吉澳，亦包括沙頭角、深圳鹽田港、荔枝窩、印洲塘海岸公園等，你同時會發現標高柱位置亦可回望鴨洲全景。而剛才村落背後就有一座發電站、廢木堆放處，小山路雖然係倔頭路，但充滿花香氣息。
折返鴨洲碼頭，可以見到碼頭旁邊有一個直昇機停機坪，所謂處處皆風景，停機坪旁邊亦有岩石層，同時可享無敵海景，方便等待上船嘅時候散吓步休息一番，離開前再次感受呢個靜謐小島。其後，只需15分鐘船程，就可以從鴨洲返回吉澳碼頭。
至於吉澳，英文為Crooked Island，意指彎曲小島，同樣位處沙頭角東面，東平洲西面、印洲塘海北面，亦近大鵬灣水域，地方比鴨洲稍大，居民曾養殖珍珠，而居民數目亦多少少，現時約有50人居住，但事實上全盛時期係有約一萬人聚居，只不過都已經搬離小島。不過，有指當年漁民覺得小島吉祥，所以先會稱之為吉澳。相對於鴨洲狹長島形嚟講，吉澳海岸較彎彎曲曲，係天然避風港，小島嶼呈「之」字形，但同樣係生態旅遊勝地之一。
吉澳大街大多為無名士多，只有一間比較出名嘅益民火鍋海鮮酒家，因為係有70年代開業，而且係吉澳大街內第一間餐廳，內有客家炆豬肉飯$65、招牌墨魚丸飯$65、白切雞飯$60，採用客家40年馳名墨魚、客家鹹雞做法，亦有蒸吊桶魚乾仔、以柴火燉製、清熱潤肺嘅自製陳皮燉檸檬$20。只係小島難以找尋同路人小店，大家都係自行選擇啦，That’s All。
當中，近碼頭嘅一間無名小店客家蒸豆豉豬肉砵飯$50、滑蛋叉燒飯$50、雞髀蛋飯$50，客家蒸飯調味稍重，一般香港人好可能會覺得比較鹹，甚至帶有油膩感，但陳皮豆豉香又的確幾獨特，豬肉齒頰留香。至於另一間無名小店就有自製茶果$20/3件，自製糯米糍$20、西米糕、涼茶、蝦乾等，其中雞屎藤就有黑芝麻或花生味，艾草有黑芝麻花生紅豆綠豆味等，每一口都煙煙韌韌，甜度十足。
由上年9月起，吉澳村民連同漁農自然護理署合作，特別推出一道長約3.5公里嘅「吉澳文化徑」，推廣吉澳內嘅歷史文化，等更多人能夠體驗吉澳深度遊，現場可見吉澳大街內明顯多咗一塊又一塊介紹牌，據悉有27塊解說牌，用作導賞。雖然吉澳比鴨洲稍稍商業化，但有大街上唔少地方已經變成廢棄地帶，包括一間又一間小屋，又或者比如全島唯一嘅學校已經於2005年停辦，位於劉觀南紀念運動場內嘅吉澳公立學校，亦曾為吉澳社會服務中心。
吉澳公立學校近吉澳遊樂場，學校內陳設已經破舊非常，如同廢墟，但仍可見到只有地面一層嘅學校有小操場，亦有校長室、校務署、音樂室、幾個課室，牌匾下更有一座破爛嘅電視機櫃。課室內嘅黑板雖然被畫花，不過有一點比較意外，音樂室內壁佈板上嘅佈置竟然未有破爛或發黃。
鴨洲係「直線」行程，由碼頭直踩至鴨頭，而吉澳則為「繞圈」行程，要遊走吉澳，只需圍繞一圈而走，就可以行完吉澳。吉澳大街右邊盡頭即達吉澳廣場，牌匾背後寫有「人傑地靈」四個大字，內有吉澳警崗、吉澳地質教育中心、吉澳天后宮、吉澳水月宮、九華亭，亦有屹立百年嘅吉澳姻緣樹。海邊天后廟依山而建，有逾200年歷史，係香港三級歷史建築物，本來就用作祈求風調雨順之用，現時吉澳天后宮旁邊就係吉澳故事館，內有以往漁民嘅居住環境同用具可供參考，都係來自吉澳原居民捐出嘅物資，等外界能夠更深入了解昔日水上人生活。
繼續依循澳背塘村向山上方向走，繞個圈就可以直抵高棚頂，可從兩條分支登山，山路已經舖砌完成，跟住黃色欄杆走就能夠輕鬆上落高地頂、高棚頂觀景台小山丘。高棚頂景觀開揚，可回望印洲塘海域、吉澳漁村風景，海面湛藍，北面連深圳鹽田港貨櫃碼頭都清晰可見。只不過高棚頂並非吉澳最高點，另一端吉澳雞公嶺先至係全島海拔最高點嘅地方，只不過似乎未完全開發。一直沿路向下走，就會走到涼亭位置，小涼亭同平常公園阿伯捉棋嘅源亭無異，涼亭旁邊下行山路可以返回碼頭地面方向。
赤角頭為吉澳最北端位置，距離深圳鹽田港不足一公里，基本上好有可能係全港最接近深圳嘅小島嶼，都算係咫尺之間。赤角頭方向小村落有如馬灣舊村，無乜人居住，部份被廢棄，盡頭亦有海邊風景。如果你夠細心，會發現通往赤角頭嘅海邊步道旁邊不單有現代公廁，海邊更有一個古時嘅公廁，表面貌似一間小石屋，但事實上係舊時居民嘅方便之處，同現代公廁最大分別就係將排泄物直接沖出大海，不過呢個舊式公廁已經變成廢棄地帶，唔知點解會有人以此作打卡點，難明。
E.A.Tips :
❷ 乘搭巴士路線43P,43S,73D,74D,74P, 82C,82D,263A,263C,271B, 272A,272K,272P,272S,274P ,900,A47X 可以直達馬料水公眾碼頭，近吐露港公路，過隧道就到海旁，腳程約5分鐘。
❸ 而乘搭巴士路線43P,82C,87K,87S,99R, 263A,272A,272K,289K,A47X 則可到達大學鐵路站，近香港中文大學，過橋再過隧道就可以到達馬料水三號梯台，腳程約15分鐘。
❹ 週末開船之前，都會有臨時售票處，即場有船飛買，去程$45，回程同價，來回船飛人均$90，只有一班船，船隻編號為A5523。
❺ 注意此街渡只限星期六、星期日及公眾假期行駛，而且只有一個班次。朝早09:00會於馬料水開出，船程約2小時，大概11:00之前會抵達吉澳，船會先停泊吉澳，如果想同時遊覽吉澳及鴨洲，就唔好落船，大概10:45會喺吉澳再開出，15分鐘船程就會抵達鴨洲。12:30又會喺鴨洲開出，然後再次前往吉澳，最後15:30就會喺吉澳開出，折返馬料水，詳情請參閱街渡時間表﹕https://www.td.gov.hk/tc/transport_in_hong_kong/public_transport/ferries/kaito_services_map/service_details/index.html#k18 。
❻ 必須注意街渡時間表，因為逾時不候。
❼ 鴨洲並無補給點，而吉澳就較鴨洲商業化，碼頭附近有幾間店舖。
❽ 謹記愛護環境，自己垃圾自己帶走。
❾ 吉澳、鴨洲嘅洗手間數目都算充足，碼頭同海邊都有。
❿ 吉澳有街渡來往沙頭角，同樣經鴨洲，但每日每方向只有4班船，而沙頭角街渡碼頭為禁區範圍，必須禁區紙先可以進入。
⓫ 鴨洲籃球場最好唔好亂走，因為一步入籃球場範圍，就好容易有幾隻陀地狗衝出吠叫。
⓬ 如果細心啲留意吓，會發現部份景點會有一張小枱俾人吸印仔，都係由於香港漁農自然護理署喺上年至今搞咗個活動，市民可以喺地質公園範圍內收集印章，於船飛背面收集印章之後，船飛唔會收回，可以俾大家留為紀念，詳情請參考官方網頁。
⓭ 登上船之後，有機會會好大風，甚至覺得凍，所以最好著多件衫。
⓮ 室內位置雖然無咁凍，但人都比較多，坐外面就比較通風。
⓯ 記得唔好喺地質公園執走任何石頭或貝殼，因為有機會會被檢控。
吉澳
香港北區
鴨洲
香港北區