舊店傳承！灣仔70年老字號小食店細舖搬大舖年輕人接手重現臘味糯米飯/港式街頭小食

瀏覽次數： 30

個人瀏覽過

香港最重要係傳承，灣仔有一間屹立逾70年嘅老字號港式小食店，於2016至2022年都獲得米芝蓮街頭小食推介，亦係一間舊店傳承嘅小店，兩者同時加持之下，受到新舊客歡迎，近月搬大舖兼變堂食店，拍拖兩個人記得唔好去錯位置啦！

原本位處馬師道嘅強記美食，由1951年於灣仔開業至今，經歷車仔檔時期，一直紮根灣仔，據悉目前已經係第三代經營，上年底更由細舖搬大舖，由典型港式小食外賣店變成一間新裝修駱克道堂食店，環境光潔亮麗，但仍舊保留唔少經典菜式，繼續賣多款港式街頭小食，更有舊舖招牌之作臘味糯米飯。

招牌作臘味糯米飯可以自選臘腸、潤腸或鴛鴦腸，當中臘腸雜錦臘味糯米飯$54 細細碗定價比較高，甚至可以叫做好鬼貴。臘味飯材料非常豐富，以本地臘腸配上泰國香米炮製糯米飯，入口暖笠笠，飯粒煙韌，略帶黏身，唔會一糰糰，反而同時能夠做到粒粒分明又有咬口，清爽亦軟糯。糯米飯同時吸收臘味精華，打開蓋之後聞落香噴噴。

臘腸充滿鹹香，臘腸肉唔會太肥膩，肥瘦適中，口感係半肥瘦，入口鬆化而有肉汁。生炒臘味飯配料更包含臘肉碎、蝦米、冬菇，亦撒上蔥花，再拌上甜豉油，飯香味充滿層次，飯面有光澤同油潤嘅同時，油香四溢，但食落又無乜油膩感，極為誘人，真係好難去挑剔。

粥品都係值得一試，砂鍋鮮牛粥、砂鍋燒鴨粥、花生旺菜豬骨粥$36 為軟綿綿粥底，香滑之餘亦有適量配料，豬骨熬煮粥底鮮甜之餘更添肉香。粥底內有豬骨鮮味，而旺菜略帶鮮甜，難得係豬骨連肉上枱，配料更有蠔豉仔，同時亦有花生香，香氣撲鼻。

港式小食有豆卜芽菜豉油王炒麵、煎蝦米腸粉，亦有碗仔翅、燒賣、魚蛋等，平常魚蛋、燒賣、豬皮、蘿蔔通常都係配咖哩汁，配上南乳湯嘅豬皮蘿蔔$24 係另類港式風味，雖然不過不失，但南乳味略嫌唔足夠，同時未夠入味。另外，香菇木耳碗仔翅$28、魚肉碗仔翅$28，基本上不過不失，相對其他菜式唔太突出，但都有碗仔翅濃稠嘅質感，木耳絲、粉絲、冬菇等配料充足，只係略嫌魚肉未夠彈牙。